Co BNG, pero sen a veciñanza. Así semella que o goberno municipal vai sacar adiante no pleno deste xoves o convenio asinado co fondo de investimento suizo, Ginkgo Advisor, para urbanizar o mariñeiro barrio das Xubias.
Mentres a veciñanza enteirouse, como o resto da cidade, pola filtración a un medio de prensa, e despois das primeiras críticas de PP e Sumar, o goberno, co apoio do BNG, aprobará un proxecto que cambiará a fisionomía dun dos barrios máis auténticos da cidade.
Defende o BNG os avances acordados nos últimos meses na actualización do convenio. “A diferenza do que acontecía na primeira versión do convenio das Xubias -aprobado na Xunta de Goberno Local o 30 de xullo de 2024- a actualización que irá ao Pleno deste xoves garante a ordenación conxunta de todo o bordo litoral, até a Ponte da Pasaxe”. Isto significa que o ámbito incluído no convenio das Xubias asinado con Ginkgo Advisor non ficará excluído da modificación puntual do PXOM cuxa tramitación iniciou o Goberno Local en 2020.
Asegura o BNG que a edificabilidade baixará de 660 a 240 vivendas, a pesar de que o goberno non levou aínda a pleno esa modificación do PXOM previamente aprobada pola Xunta de Goberno hai varios anos. O plan, deste xeito, aseguran, non afectará ao núcleo mariñeiro das Xubias de Abaixo e permitirá o mantemento da vía do tren que atravesa o lugar, necesaria tamén para a saída da cidade dende o porto.
A veciñanza parece “tranquila”, se ben esperaban non enteirarse dunha nova tan importante a través da prensa, e esperan que canto antes lles presenten o plan urbanístico.
