Coñece esta mañá a cidade, a través dunha nova filtrada á un só medio de comunicación, o desbloqueo do acordo con Ginkgo para levar adiante o proxecto urbanístico das Xubias. Un convenio que foi rexeitado polo pleno, pero que segundo La Voz quedaría desbloqueado e iría ao pleno esta mesma semana.
As primeiras críticas non se fixeron esperar. O PP critica a Inés Rey por seguir carecendo de transparencia con respecto ao acordo cun fondo estranxeiro en As Xubias. “Hai un ano, anunciou o acordo de súpeto, no verán, sen ningún tipo de diálogo cos veciños nin coa oposición. Agora, anuncia a través da prensa que o levará ao pleno de súpeto, no verán, sen ningún tipo de diálogo, e presenta a documentación uns minutos antes da reunión da comisión”, sinala Lorenzo.
“Inés Rey leva un novo acordo ao pleno sen cumprir coa moción aprobada por unanimidade en outubro de 2024, que pedía a súa suspensión e a aprobación da modificación do Plan de Actuación (PXOM) reducindo a edificabilidade na zona”, denuncia o PP.
Críticas de Sumar: “O litoral non é un negocio”
”Esta decisión política perpetúa un modelo urbanístico baseado na especulación, na falta de transparencia e na exclusión da veciñanza”, denuncia o movemento Sumar A Coruña tras coñecer a nova.
”Xa en xullo de 2024 o convenio foi asinado pola alcaldesa mediante Xunta de Goberno urxente e en pleno verán, nunha manobra máis propia da nocturnidade e oportunismo ca da transparencia. Un ano despois, o goberno local repite a mesma estratexia, acelerando a tramitación cando a atención cidadá baixa e o escrutinio público é menor”, critica o grupo.
”Tras meses de rexeitamento social e alegacións por parte de colectivos veciñais, organización sociais e forzas políticas, o goberno local opta por ignorar todas as advertencias e insiste nunha vergoña urbanística que exclúe o PXOM e entrega solo público sen planificación democrática. O convenio permite ao fondo privado construír en solo estratéxico sen reservas de vivenda protexida, sen límites á turistificación e sen garantir servizos públicos.”
A portavoz de Movemento Sumar Coruña, Trinidad Palacios, valorou así a situación: “A alcaldesa presenta isto como unha recuperación, pero o que se aproba é un convenio feito á medida dun fondo especulador”. Palacios tamén advertiu: “Queremos paseos e zonas verdes, si, pero non a cambio de expulsar á xente do barrio”, ao tempo que propón “suspender este convenio e retomar unha planificación pública, aberta e participativa para o barrio das Xubias”.
Máis novas
Análise: Que foi do interese xeral na reordenación urbanística da fachada litoral nas Xubias?
O bronco pleno rexeita convenio co fondo de investimento para urbanizar as Xubias
