Fermosa, emotiva e comprometida noite de sábado a vivida no Parque Europa. A Asociación de Veciños Oza-Gaiteira-Os Castros deron unha lección de compromiso na estrea do festival Lembranza Rock. Unha cita que ten visos de ficar como parte fixa da axenda das Festas de María Pita, gracias á gran acollida de boa parte do barrio e de moitos achegados, amantes da música galega implicada.
Porque na vida hai que posicionarse, como deixou claro Sés en varias das súas intervencións, e a dirección da Asociación mollouse e moito, tanto coa elección dos artistas (todo bandas galegas e que “loitan por causas xustas”) como pola declaración que fixeron entre concerto e concerto. Dous membros da directiva sacaron a bandeira de Palestina entre Rebeliom de Inframundo e Sés, e deron un discurso rotundo, criticando o falso posicionamento da sociedade estatal, e a necesaria parálise mundial en contra do xenocidio.
A música galega, protagonista
Xa é posicionarse traer só bandas galegas, e estas tres ademais xa é directa a mensaxe. Arrincaron co seu potente directo a banda Rebeliom de Inframundo. Acompañados por un séquito de fieis que sabían cada letra, trouxeron dende Ponteareas o seu rap combativo, con letras ferventes, que pasaron do “Eu chorar chorei o domingo a tarde” ao “Se non tendes sacho taerémolo nós”.
View this post on Instagram
Tomou o relevo Sés, coa súa potencia desgarradora sobre o escenario. Desta volta, algo máis relaxada que outras veces, sempre co discurso histórico de defensa da nosa lingua e o noso patrimonio inmaterial, e sempre maridando ritmos que atravesaron unha e outra vez o Atlántico, e que tan ben maridan coas nosas pandeiretas. Destacou a fermosura de ser “de barrio” e lembrou o seu Elviña, antes de que o seu himno xeracional, “Tempestades de sal”, atronase o barrio da Gaiteira.
View this post on Instagram
Caían unhas pingas pero non impediu o gran remate da festa pangalaica coa rabia dos Ruxe Ruxe. Unha das bandas máis lonxevas do rock galego, formada en 1996 en Aríns (Compostela), non cambia a súa forma de entender a música, e deu o seu poderoso directo de guitarras crúas e letras cheas de implicación.
View this post on Instagram
