Dende hoxe martes 16 e ata o 22 de setembro, a Praza de Pontevedra acolle unha marea de actividades no marco da Semana Europea da Mobilidade, unha iniciativa a escala continental que conta, un ano máis, coa participación do Concello, en colaboración co Ministerio para la Transición Ecológica y el Reto Demográfico (MITECO).
Baixo o lema #MobilidadeParaTod@s, e despois de ter aprobada en pleno a nova ordenanza de mobilidade, esta cita serve para seguir fomentando o respecto ao peatón e o uso dos vehículos ciclables e o transporte público compartido.
O acto inaugural da SEM2025 terá lugar o vindeiro martes 16 ás 13.00 horas, en colaboración coa Compañía de Tranvías da Coruña, a asociación STOP Accidentes e tamén profesionais dos servizos municipais da Policía Local, a Concellaría de Medio Ambiente e do Centro Integral de Mobilidade (CiMob).
Haberá actividades de educación viaria con centros educativos da cidade, tamén de divulgación medioambiental e talleres de formación e orientación sobre a circulación en bicicleta. Tamén haberá foro participativo no que explicaremos ao detalle a nova ordenanza de mobilidade sostible, que terá lugar o mércores 17, a partir das 10.40 horas, no salón de actos do IES Eusebio da Guarda.
Outra das xornadas destacadas na SEM2025 que se celebrará na Coruña será o Día Europeo sen Coches, que terá lugar o domingo 21 de setembro con actividades de concienciación en materia de mobilidade e a colaboración da DGT, Stop Accidentes, Mobiliza e Galicia Rollers.
Ademais, o Concello colaborará con asociacións como Mobi-liza, a Agrupación de Montañeros Independientes (AMI) e Galicia Rollers na organización de roteiros didácticos, saídas de marcha nórdica e unha nova edición da Friday Mobility Night.
Tamén haberá sorteos de agasallos entre as persoas usuarias do servizo de transporte urbano entre os días 16 e 22, semana na que A Coruña tamén participará no Reto Europeo de Pasos, unha campaña a nivel europeo na que a cidade compite por ser a urbe que máis camiña, a través dun desafío colectivo coa app Walk15.
Podedes descargar aquí o programa completo da Semana da Mobilidade da Coruña.
Outras novas
Aberta a inscrición para roteiros didácticos para usuarios de BiciCoruña
