Continúa o proceso de construción da urbanización de máis 1.000 novas vivendas no Castrillón. E continúa presentando o proxecto á veciñanza.
A Xunta de Compensación “API Q28 Parque de Oza” (a figura legal urbanística que permite desenvolver este tipo de desenvolvementos, formada por propietarios particulares do barrio -arredor do 50%, que xuntaron as súas propiedades para urbanizar conxuntamente- e outros grandes tenedores como a Fundación Juana de Vega, Aliseda, Sareb e Concello) xa ten rematado o borrador do PERI (Plan Especial de Reforma Interior) e o documento de Avaliación Ambiental Estratéxica. Así, inicia unha serie de encontros con representantes das asciacións veciñais.
Hoxe manten senllos encontros cos responsables das Asociación de Veciños O Cruceiro e da Asociación A Gaiteira. O próximo luns o encontro será coa Asociación de Veciños do Castrillón.
Trátase de encontros informais previos a que a Xunta de Compensación que integra a todos os propietarios con chan nesa área (máis do 50% deles propietarios particulares veciños do propio barrio) aprobe ambos os documentos para que o Concello poida iniciar a súa tramitación e remisión á Xunta de Galicia para o inicio da avaliación ambiental estratéxica.
Criterios
Falamos dun proxecto que contempla a construción de 1.000 vivendas en 6 mazás de edificación (as M que vemos no mapa), cunhas arredor de 20 edificacións (os edificios en si mesmos aínda non están fixados) de entre 2 e 17 alturas (os números romanos indican as alturas).
A pesar dos rumores que circulan polo barrio e a distribución de carteis polos portais que apuntan a un aumento da edificabilidade, a Xunta de Compensación insiste: o proxecto mantén exactamente a edificabilidade fixada no PXOM da Coruña do 2013 (o vixente na actualidade) e aumenta de maneira voluntaria as zonas verdes e o espazo público. A edificabilidade fixada no PXOM é de 136.704,50 metros cadrados. E esa é a proxectada.
Aseguran que si que ampliaron as zonas verdes e o espazo público con respecto ao primeiro borrador “buscando humanizar o barrio, como o conseguirá o bulevard previsto na Avenida de Casanova de Eirís”. Todo iso faise porque o urbanismo actual foxe dos volumes en mazá tan en boga nas últimas décadas do XX e principios do XXI. Neste caso, executar ese desenvolvemento en mazá illaría aínda máis o barrio do Castrillón cara á Ronda de Outeiro e cara ao propio parque de Oza.
Desde a Xunta de Compensación deixan claro, iso si, que os dereitos edificatorios dos propietarios son irrenunciables. Hai que lembrar que hai xa dúas décadas os propietarios adiantaron a cesión de miles de metros cadrados para o uso e goce dos veciños, convertidos desde entón no Parque de Oza, o auténtico pulmón verde do Castrillón de máis de 55.000 metros cadrados, o Centro Deportivo que alberga a piscina municipal (case 5.000 m2) , 840 m2 de chan para a ampliación do instituto Monelos, e a mellora das vías que vertebran o barrio: 3.600 m2 para a apertura de tramos na rúa Antonio Ríos, 3.300 m2 para a Avda da Concordia e 4300 m2 para Casanova de Eirís.
Máis novas do proceso
A Xunta de Compensación “Parque de Oza” presenta o borrador do PERI da urbanización do Castrillón
A veciñanza do Castrillón pide menos edificabilidade e máis VPO na nova urbanización
A veciñanza do Castrillón amosa as súas inquedanzas ante a creación de 1.000 novas vivendas
