A Coruña instalará case tres millóns de luces led e medio milleiro de arcos, repartidos polos barrios da cidade, con motivo do Nadal e co ex xogador do Deportivo Bebeto como protagonista do acendido o próximo día 28.

Nestes momentos, están a habilitarse os arcos luminosos e os motivos festivos que se repartirán polos barrios da cidade. Serán 2,8 millóns de luces led, que supoñen un investimento anual de 770.000 euros.

Entre as figuras máis rechamantes do Nadal estarán a esfera luminosa da dársena da Mariña e tamén a árbore xigante de luces que habitualmente se situaba no Obelisco. Este ano, polas obras de reurbanización dos Cantóns, o abeto de Nadal estará emprazado no Parrote, onde se iniciaron as tarefas de montaxe a inicios de mes.