Unha persoa tivo que ser trasladada ao hospital con queimaduras tras declararse un incendio nunha vivenda do municipio coruñés de Culleredo, segundo informou o CIAE 112 Galicia. Os feitos ocorreron pasadas as 5.00 horas deste xoves, cando un particular chamou a Emerxencias para informar de que estaba a arder un colchón no piso superior dunha vivenda situada na rúa Cadaval, en Rutis (Culleredo). Durante a chamada, o alertador explicou que non conseguía apagar as chamas e que xa estaban no exterior.
O 112 deu aviso a Urxencias Sanitarias de Galicia-061, aos bombeiros de Arteixo e Betanzos, á Garda Civil, bombeiros da Coruña e Policía Local de Culleredo. Neste sinistro unha persoa resultou ferida, con queimaduras nunha perna, e foi trasladada ao Complexo Hospitalario da Coruña. Os bombeiros traballaron para apagar o lume, que se propagou por toda a vivenda e que quedou controlado sobre as 7.00 horas, aínda que permaneceron na zona para levar a cabo labores de arrefriado.
INCENDIO NA CORUÑA
Por outra banda, o 112 Galicia tamén informou doutro incendio, ocorrido na rúa Germán Taibo da Coruña, na noite deste mércores. Nese caso, o lume queimou un colchón e varios mobles dunha vivenda, e os servizos sanitarios tiveron que trasladar a outras dúas persoas afectadas por inhalación de fume.
