A praza de Azcárraga, na Cidade Vella, será o epicentro das celebracións de San Patricio. Así o presentaron esta pasada noite de xoves na Fundación Luis Seoane.
Entre este venres 13 e o domingo 15 haberá diferentes actividades na praza de Azcárraga, incluíndo actuacións musicais, concurso de tiraxe de cervexa, un curso de cultura da cervexa e sorteos.
Durante a fin de semana tamén haberá propostas gastronómicas, reparto de gorros de San Patricio e distintas variedades de cervexas irlandesas.
Este venres arrincarán as actuacións musicais en Azcárraga con Maghúa (19.30 horas) e Son d’aquí (20.30 horas). Haberá tamén unha actuación sorpresa para pechar a noite.
O sábado 14 actuarán Os Viqueiras ás 13.30 horas. Xa pola tarde, ás 19.30, será a quenda de Os Gaiteiriños, aos que seguirán Donaire (21.00) e As Bestas (22.30).
O domingo pecharase este evento coa actuación de Folerpas ás 13.30 horas.
A xornada sabatina complétase coa Foliada Libre no Fiandón, a carón do Campo da Leña, coas Pandeireperras.
