Trala escueta rolda de prensa na que Concello, RC Deportivo e Deputación anunciaban a renuncia ao Mundial 2030 e avanzaban o novo acordo de colaboración para remodelar a cidade deportiva de Riazor, a alcaldesa Inés Rey púxose á disposición dos numerosos xornalistas.
Na rolda de preguntas, a rexedora foi explicando a decisión. “Houbo que elixir, e nós escollemos o benestar do club, e unha etapa de entendemento mutuo”, sinalou deixando patente o rexeitamento da dirección do RC Deportivo. Falou da “inflexibilidade da FIFA” para coas zonas VIP, co aforo, cos aparcamentos… evidenciando que esas “inflexibilidades serían contrarias aos intereses do club”. “Había unha serie de esixencias por parte da FIFA, máis alá do aforo, que fixeron o proxecto inviable, sobre todo pensando no club”, reiterou, facendo fincapé no “importante momento para a cidade ao volver a termos consenso entre Concello e club”. “Non queríamos hipotecar á cidade e ao club por un evento de 3-4 días”.
Cidade Deportiva por concretar
As primeiras preguntas roldaron sobre se había datas sobre o “novo complexo deportivo de Riazor que vai estar adaptado ás nosas necesidades”, e sufragado polas tres institucións, Concello, RC Deportivo e Deputación. Con todo, deixou claro que non hai detalles todavía do proxecto sobre datas, aforo, impacto da reforma, e avanzou que realizarán un “proxecto de modernización da cidade deportiva de Riazor, para o que faremos unha comisión de coordinación entre o Club e o Concello que iremos contando paso a paso”.
Vaise utilizar o estadio para grandes eventos culturais/concertos? “Falouse de usar o complexo de Riazor 365 días ao ano para actividades cidadás. Iremos definindo os usos do complexo en xeral, non só do estadio”, deixou aberta a rexedora.
Unha dura decisión
Unha vez que o Concello xa informou á FIFA da súa decisión, Rey recoñeceu que “non foi fácil tomar a decisión. Non é agradable, pero ás veces é mellor ter os pés na terra, e para o Mundial as contas eran maiores que os pros”.
”Pero gobernar é tomar decisións pensando no ben común e no do club”, repetiu ás preguntas, sen límite, dos xornalistas “Optamos por unha decisión sensata e tomamos unha decisión que suporá unha enorme ilusión para a cidade.
Sobre a candidatura de Vigo “non vou falar”, sinalou a rexedora ás preguntas.
Máis novas
As críticas de PP e BNG trala renuncia do Concello a ser sede do Mundial 2030
O Concello camufla a renuncia ao Mundial cun proxecto de remodelación da cidade deportiva de Riazor
