Este sábado 6 de xuño ás 12:00h na Praza de Ourense arrinca a Manifestación baixo o lema “Nin os alugueiros polas nubes. Nin os salarios polo chan”. Convocada na cidade pola Plataforma polo Dereito á Vivenda, o Sindicato de Barrio Os Mallos Falperra e o seu espazo da Revolteira, e apoiada pola CGT ou o Sindicato de Estudantes, a mobilización forma parte dunha onda de protestas en máis de 20 cidades do Estado tamén convocadas polo Sindicato de Inquilinas.
“Porque a vivenda é un dereito, non un privilexio” é unha das claras liñas artgumentais que lanzan os colectivos convocantes, que poñen datos enriba da mesa:
- O aluguer subiu máis dun 50% en 5 anos e máis dun 80% na última década.
- A compra supera xa os 2.800 €/m² de media na cidade
Toda esta subida, mentres os salarios fican practicamente estancados. “É o resultado de anos de políticas que protexeron a especulación: as SOCIMI con privilexios fiscais, a Sareb mal xestionada, os pisos turísticos sen control e un parque público de vivenda que segue sendo dos máis baixos de Europa”, explican dende a Plataforma a nivel europeo.
Pero tamén afían datos locais, denunciando que “o Concello non controla o cumprimento da Zona Tensionada”; que “as VUT ilegais que denunciamos seguen abertas”, e que hai moitas urbanizacións de vivenda nova na cidade, pero “non hai plan de vivenda pública nin de mobilización de baleiros”.
Neste sentido lembran que nos últimos 7 anos de goberno socialista se levan realizado “2.500 desafiuzamentos; o aluguer subiu un 80% e o prezo de venta disparouse un 175%; os pisos turísticos multiplicáronse por 8, pasando de 200 a máis de 1.600. Deles, máis de 1.000 sen licenza; e o parque de vivenda pública é só un 0,68% do total é dicir, 0,3 vivendas por cada 100 persoas”.
“Mentres a cidade se enche de Airbnbs e os desafiuzamentos están á orde do día, o Concello segue mirando para outro lado. Isto non é xestión, é abandono”, denuncia a Plataforma.
Esquerda Unida, Podemos Coruña e Movemento Sumar Coruña apoian a manifestación
Os 3 partidos da esquerda que buscan unir comunicados para fundirse nunha única candidatura de cara ás eleccións municipais de 2027, fan un chamamento á cidadanía coruñesa para participar na manifestación polo dereito á vivenda convocada este sábado.
As tres organizacións consideran que “a crise da vivenda é un dos principais problemas que afronta hoxe A Coruña. O incremento dos alugueiros, a falta de oferta accesible e a escaseza de vivenda pública están a converter un dereito básico nun luxo para unha parte crecente da veciñanza, especialmente para a mocidade e as familias traballadoras.”
Neste contexto, reclaman “un Concello moito máis activo na mobilización de vivenda pública municipal e unha interlocución firme coa Xunta para esixir os investimentos e actuacións que a cidade precisa”.
View this post on Instagram
Máis novas
O 6 de xuño, nova mobilización polo dereito a unha vivenda e contra a especulación
A Agra do Orzán berrou contra a especulación arredor da vivenda
