O concelleiro de Economía e Planificación Estratéxica e portavoz do goberno municipal da Coruña, José Manuel Lage, puxo o acento na necesidade de asentar a política metropolitana entre A Coruña e os concellos da área “priorizando os servizos á cidadanía, con fórmulas de cooperación entre concellos”.
O edil presidiu este martes a Comisión Informativa Especial creada para abordar este ámbito, co obxectivo de “formular e activar ferramentas eficaces de coordinación e xestión, atendendo a factores como os fluxos diarios de mobilidade, o mercado de traballo, a localización empresarial, os equipamentos, a vivenda e as dinámicas económicas que levan décadas a ir máis alá dos límites administrativos municipais”.
Nesa reunión, informa o goberno local, Lage defendeu a “cooperación voluntaria, a prestación compartida de servizos, a planificación conxunta e a construción progresiva de confianza entre concellos como os catro eixos clave para avanzar na liña doutras iniciativas previas que obtiveron bos resultados, como a área metropolitana de Barcelona”.
Neste sentido, lembrou que “máis do 80% das relacións funcionais entre os concellos da área se materializan a diario mediante desprazamentos por motivos laborais, educativos ou de acceso a servizos”. Con todo, engade, o “sistema actual continúa fragmentado entre transporte urbano e interurbano, operadores distintos e competencias administrativas separadas”.
Por iso, o edil defendeu a creación do Consorcio Metropolitano de Transportes da área da Coruña. “Non entendido como unha nova administración política, senón como un organismo de cooperación participado, que o Concello formula coa finalidade de propiciar a planificación conxunta do transporte público, coordinar as liñas urbanas e interurbanas e avanzar na senda dunha integración tarifaria”.
POSTURA DO BNG
Pola súa banda, o BNG manifestou, nun comunicado, que celebra que a Comisión da área metropolitana, creada en xullo de 2023, se volvese reunir nesta xornada “cumprindo o mandato da moción da formación nacionalista aprobada no pleno de xuño”. Neste sentido, propuxo que nesa comisión “comparezan representantes de distintos axentes sociais para achegar a súa visión sobre a realidade metropolitana da Coruña”.
