• A estrea oficial de Voa formará parte dos actos vencellados ao Trofeo Teresa Herrera.

— — —

O Deportivo da Coruña presentou este xoves o seu novo himno, ‘Voa’, unha creación de Xoel López na que colaboran a Orquestra Sinfónica de Galicia (OSG), a gaita de Susana Seivane, os Kilomberos de Monte Alto, as pandereteiras da asociación cultural Xacarandaina e o Coro Infantil e Xuvenil Cantabile. A canción estrearase nas horas previas ao Trofeo Teresa Herrera, que se disputará o próximo 12 de agosto na Coruña.

“Lanzarémolo nas horas previas ao Teresa Herrera”, avanzou Xoel López durante unha rolda de prensa celebrada no Teatro Colón, na que estivo acompañado por varios dos participantes no proxecto. A composición foi concibida no marco da celebración do 120º aniversario do club e procura reunir nunha mesma peza o sentimento deportivista e diferentes expresións da música galega. “O himno inclúe toda a xente deportivista e toda a música da terra”, salientou o artista coruñés. Xoel López insistiu en que a canción “está feita con moitísimo corazón, por deportivistas para deportivistas”.

UNIÓN, PAIXÓN E SENTIMENTO ENTRE XERACIÓNS

Pola súa banda, o responsable do departamento de marca do RC Deportivo, Borja Calvo, explicou que o obxectivo desta nova melodía “non é modificar a esencia do Dépor, senón reforzar a identidade e os valores que representa o club”. Entre eses valores citou a “unión, paixón, sentimento, o paso de xeración en xeración, o compromiso e o inconformismo”. “Voa” converterase así nunha das pezas centrais das celebracións polo 120º aniversario do Deportivo e nun novo símbolo musical co que o club busca conectar a súa historia coas xeracións máis novas.

Outras novas

A inxustiza, o relato, e a xentrificación poden levar por diante o mellor momento do Deportivo