Os sindicatos convocantes da folga no sector hostaleiro da Coruña –CC.OO., UXT e CIG– denunciaron que varios empresarios do sector hostaleiro e hoteleiro da provincia ofreceron aos seus empregados aumentos salariais condicionados a non participar na folga prevista para o 12 de agosto, o día da eclipse.
Nunha nota de prensa, os representantes dos traballadores aseguraron que esta situación responde á “inacción da patronal” que, segundo denunciaron, prometeu enviar unha oferta “a finais de xuño” e “aínda non chegou”.
Neste contexto, UXT, CC.OO. e CIG continúan cos preparativos da folga. Para iso, leste mesmo luns celebran asembleas informativas en Ferrol, Santiago e A Coruña. A partir deste martes, distribuiranse folletos informativos aos centros de traballo e á cidadanía en xeral.
Ademais, programáronse varias concentracións diante dos principais hoteis das cidades para o 12 de agosto. Na Coruña, terán lugar ás 10.30 horas no Eurostar Atlántico, ás 12.00 horas no Finisterre, ás 13.30 horas no Meliá, ás 16.00 horas no Riazor e ás 17.30 horas no Hesperia.
Por último, o tres sindicatos reiteraron a súa disposición a sentar na mesa de negociación “calquera día e a calquera hora” para resolver a situación.
Convocada folga na hostalaría na provincia da Coruña o día da eclipse
