“A xente está farta de vivir sen información”. Así valora a ANPA do IES Zalaeta a nova concentración de familias tralo convulso comezo de curso entre andamios e amianto. As familias xa se concentraban o primeiro día de curso e esta mañá de venres volvían acodir ás 8:00h para denunciar a falta de información á que están sendo sometidas mentres se desenvolven as obras de reforma integral da cuberta.
Onte esperaban ter recibido da Xunta, como lles prometeran o mércores, o informe asinado de que as obras se están realizando baixo premisas de seguridade e salubridade total para o desenvolvento da actividade educativa. Pero non chegou este documento, imprescindible para garantir a tranquilidade e seguridade da comunidade educativa.
De feito, moitas familias decidiron non levar aos seus fillos e fillas durante estes días á clase. De feito, en Bacharelato a asistencia puido situarse arredor dos 30 alumnos/as, sobre un total de 155 matriculados/as.
Desde a ANPA sinalan que van pedirlle á dirección do centro, coa que teñen moi boa relación, os datos exactos relativos ás faltas de asistencia rexistradas en todas as etapas educativas, co obxectivo de coñecer con precisión o alcance das ausencias e dispoñer de información obxectiva sobre a situación.
En paralelo, a ANPA realizou unha enquisa entre os máis dun cento socios e socias da ANPA para coñecer a súa opinión. A maioría trasladou “a súa preocupación e desconfianza pola escasa información da que dispoñemos actualmente”.
Do mesmo xeito, a maioría das familias manifestaron a súa vontade de continuar coas mobilizacións mentres non reciban o informe de salubridade do centro.
Dende a ANPA valoran convocar novas mobilizacións diante da porta do instituto, incluíndo a posibilidade de atrasar durante 10 minutos a entrada do alumnado. Pero tamén propoñen organizar unha manifestación diante do edificio da Xunta de Galicia en Monelos.
Máis novas
Outras novas
