O portavoz do grupo popular no Parlamento galego, Alberto Pazos, acusou as rexedoras da Coruña e Santiago, Inés Rey e Goretti Sanmartín, de buscar “un culpable externo” do que cualificou como “fracaso das súas políticas” en materia de vivenda, tras a declaración de ambas cidades como mercado tensionado.

En declaracións aos medios, acompañado polo deputado do PPdeG Roberto Rodríguez e polo portavoz do grupo municipal do PP no Concello da Coruña, Miguel Lorenzo, asegurou que a citada declaración “conseguiu reducir a oferta e subir os prezos“. “Terán que repensalo e adoptar medidas alternativas”, sentenciou.

Isto na xornada en que ambas rexedoras mantiveron, en Santiago de Compostela, unha reunión. “Tentan crear escusas absurdas arredor dunha achega do Goberno do Estado que permitiría construír algo menos de 30 vivendas entre Santiago e A Coruña, esquécense de que, dese diñeiro que reclaman, a Xunta non recibiu aínda nin un só euro”, apostilou ante as demandas das alcaldesas.

De “polémicas estériles” cualificou as críticas das rexedoras á Xunta, ao tempo que defendeu que hai “compromisos orzamentarios” nesta materia por parte do Goberno autonómico. Pola súa banda, Miguel Lorenzo aseverou que o Goberno da socialista Inés Rey “demostrou a súa incapacidade total de xestión en política de vivenda”. “Dixeron que nun ano ían construír vivendas para alugueiro social, tardaron máis de tres anos en construílas e hoxe en día aínda non foron entregadas”, apostilou.