Xa comunica de maneira unificada a Candidatura Unitaria de Esquerdas Coruña. Os grupos de Sumar e Podemos trasladan unha das primeiras notas de prensa conxuntas cun asunto que saca de quicio a milleiros de veciños e veciñas: os altísimos prezos dos aparcadoiros do CHUAC e do Materno Infantil.
Os candidatos Trinidad Palacios e Aitor Neira (quedará por decidir conxuntamente quen finalmente lidera a candidatura conxunta, unha vez que tamén os grupos de EU, Partido Verde-EQUO, e, quizais, a Marea Atlántica), apostan por aparcadoiros públicos e prezos asequibles fronte ao modelo actual do CHUAC e do Materno Infantil. Ambos denuncian que os problemas para aparcar no CHUAC e no Hospital Materno Infantil Teresa Herrera representan un modelo que debe cambiar: falta de alternativas públicas suficientes e dependencia de aparcadoiros privados para pacientes, familias e persoal sanitario.
Lembran que no CHUAC, o abono mensual chegou aos 90 euros e unha xornada completa custa
15 euros. No Materno Infantil repítese unha situación semellante: o propio Sergas recoñece a escaseza de estacionamento e remite os usuarios a un aparcadoiro privado.
Palacios, considera que «xa abonda de facer negocio coa necesidade das familias. Ninguén vai ao CHUAC ou ao Materno por ocio: son pacientes, pais e nais con nenos ingresados, familiares e traballadores que necesitan unha solución». Lembra ademais que o aparcadoiro que dá servizo ao Materno e ao Oncolóxico foi construído con 3,5 millóns de euros de investimento público, pero a súa explotación quedou en mans privadas. «Este é o exemplo do que non queremos repetir nun goberno de esquerdas. Se hai investimento público, o obxectivo debe ser ofrecer un servizo público e accesible, non que a falta de alternativas obrigue as familias a pagar prezos elevados», afirma Neira.
«Queremos transporte público suficiente, accesos dignos e aparcadoiros públicos a prezos asumibles. Ir ao hospital non pode converterse nun luxo», conclúen.
