A próxima semana chegará aos tribunais o xuízo contra o loteiro da Coruña acusado de quedar cunha Primitiva millonaria, unha vista na que tamén estará o seu irmán, que era no momento dos feitos delegado provincial de Loterías e Apostas do Estado e que a Fiscalía considera que tamén delinquiu. En concreto, o loteiro está acusado de quedar cun boleto premiado con 4,7 millóns de euros dun cliente, e o seu irmán de colaborar para que iso fose posible, segundo a acusación. A Fiscalía solicita para o primeiro seis anos de cárcere por un delito de estafa ou, alternativamente, por apropiación indebida. Para o seu irmán pide a mesma pena de prisión por branqueo de capitais ou por encubrimento.
O loteiro e o seu irmán, que en 2012 —ano dos feitos— era delegado de Loterías, serán os únicos aos que se xulgará despois de que a Audiencia Provincial da Coruña desestimase no seu día os seus recursos e si admitise o formulado pola Avogacía do Estado, acordando o sobresemento provisional da causa respecto doutros catro investigados, altos cargos de Loterías do Estado. O caso ten a súa orixe nun dos episodios máis lembrados sobre o cobro de premios de lotaría: o dun boleto agraciado con 4,7 millóns de euros que o loteiro dixo atoparse tirado e que, durante anos, tivo unha propiedade discutida. Varias persoas postuláronse como posibles donas deste premio, mentres que o loteiro argumentaba que non aparecera o propietario e, por tanto, tiña dereito a cobrar o montante.
Ao ano seguinte de selarse, o Concello da Coruña iniciou un “expediente de achado” para buscar o gañador do billete premiado, que o loteiro dixo atopar na súa administración da Praza de San Agustín. Con posterioridade, iniciouse a investigación policial. Nela, cuestionouse a versión facilitada polo home sobre o achado casual do billete, chegando a considerarse que el mesmo lle ocultara o premio ao verdadeiro dono cando este acudira comprobar o boleto. A investigación sinalou un presunto lexítimo propietario, xa falecido, e cuxos herdeiros reclaman agora o premio.
RELATO DA FISCALÍA
A Fiscalía relata que o home xa falecido, ao que se considera o propietario, acudiu en xullo de 2012 ao establecemento do loteiro para comprobar se os boletos que tiña estaban premiados. Con todo, sostén o Ministerio Público, o acusado, “coñecedor do alto importe do premio, quedou con el xunto cos demais boletos e non lle comunicou ao apostante ese extremo nin tampouco lle devolveu o resgardo nin o comprobante expedido polo terminal”.
“Co boleto no seu poder e completamente seguro do alto valor que tiña, ese mesmo día acudiu á delegación provincial de Loterías e Apostas do Estado da Coruña”, na que estaba á fronte o seu irmán, “coa finalidade de acelerar os trámites do cobro do resgardo, prescindindo de calquera procedemento regulado e coma se fose lexítimo posuidor”. “Sendo plenamente consciente da ilexitimidade da posesión deste título por parte do seu irmán”, a Fiscalía asegura que este “dispúxose a achandarlle o camiño” con actos tendentes a “disfrazar a verdadeira orixe do boleto” para os efectos de que se puidese “facer efectivo o premio”. Tamén sinala que “omitiu toda actuación, como delegado provincial, que puidese servir para verificar a orixe real do boleto”.
