Unha vintena de traballadoras de diferentes tendas de Inditex demandaron melloras laborais e sociais no ámbito da provincia da Coruña na sede de Arteixo, no que, inicialmente, situaron nunha nova protesta con “peche” que, finalmente, non levaron a cabo ao ser recibidos por representantes da empresa.
Desde Inditex aclararon que, aínda que non estaba prevista “a súa visita”, reuníronse “con total normalidade co devandito grupo de empregadas de tenda inmediatamente despois da súa chegada á sede da compañía”.
Inicialmente, a central sindical CIG apuntou a “un peche no control de acceso á sede da multinacional” no polígono de Sabón, en Arteixo para solicitar ser recibidas polo departamento de Recursos Humanos.
Con todo, fontes sindicais consultadas por Europa Press, ratificaron que ese era a intención inicial pero que non houbo, finalmente, tal acción ao ser recibidas, “aínda que sen entrar na nosa solicitude”, apuntaron sobre o contido do encontro.
Nun comunicado, precisaron que a súa presenza na sede de Inditex obedeceu á entrega na empresa de “as firmas individuais recollidas nas dúas últimas semanas entre máis do 70% das traballadoras das tendas da provincia da Coruña reclamando que se reactive a mesa de negociación provincial para abordar as melloras que quedaron pendentes”.
Estas firmas, explican, apoian os escritos trasladados a Inditex por cada un dos comités das diferentes cadeas nos que se solicitaba a apertura dunha mesa similar á de 2016 para tratar os puntos que só afectan á provincia, como, engaden, avanzar na equiparación co persoal doutras empresas.
O Palacio Municipal de María Pita acolle desde este xoves e ata o 17 de xuño a mostra ‘Luísa Villalta. A música das palabras’, no marco das iniciativas programadas polo Día das Letras Galegas.
Trátase unha mostra organizada polo Concello da Coruña e a Xunta de Galicia e comisariada por Xesús Domínguez que repasa a traxectoria biográfica e profesional de Luísa Villalta, facendo un percorrido vital para explicar a súa figura no panorama contemporáneo cultural de Galicia.
O proxecto componse dun total de 14 paneis (un de presentación, un de créditos e doce explicativos) con textos divulgativos. Dous dos paneis tratan especificamente a súa relación coa Coruña, cidade na que naceu e viviu parte da súa vida.
Galicia celebra un ano máis a festa da súa lingua e das súas letras. A Coruña, localidade natal de Luisa Villalta — e que bautizou como ‘Cidade Alta’ –, acollerá gran parte dos actos de homenaxe e celebración do Día das Letras Galegas, entre eles, o tradicional Pleno da Real Academia Galega (RAG) e o concerto organizado polo Consello da Cultura Galega.
O pleno da RAG do venres será unha sesión pública, de entrada libre ata completar a capacidade do recinto e celebrarase a partir das 12:30 horas no Teatro Rosalía. Emitirase en directo desde academia.gal e a canle de Youtube da RAG. As alocucións sobre a homenaxeada serán pronunciadas polas académicas Ana Romaní e Margarita Ledo e o académico Euloxio R. Ruibal.
A parte musical correrá a cargo da violinista da Real Filharmonía de Galicia, Kiyoko Ohashi, e da cantante e poeta coruñesa Estíbaliz Espinosa. O repertorio incidirá nos gustos da dramaturga, poeta, narradora, ensaísta e articulista homenaxeada, ademais de violinista, vocación que apartou para dedicarse á docencia e á escritura, pero que non deixou de aldo “como fonte de inspiración vital e literaria”.
Euloxio R. Ruibal, Ana Romaní e Margarita Ledo profundarán en distintos aspectos da vida e da obra da autora, á que a RAG dedica este 17 de maio de 2024, coincidindo co vixésimo aniversario do seu falecemento por unha meninxite, aos 46 anos de idade.
CONCERTO DE LETRAS GALEGAS
A cidade herculina tamén é o lugar escollido polo Consello da Cultura Galega (CCG) para celebrar a cuarta edición do Concerto das Letras Galegas, que organiza a entidade co apoio do Concello da Coruña.
A cita será este xoves 16 de maio, no Teatro Colón ás 20,30 horas, a cargo do Grupo Instrumental Século XX, dirixido por Florian Vlashi.
Ademais dos compositores preferidos da homenaxeada, no programa estrearase a peza ‘Concerto para un home só’, baseada na obra homónima de Luísa Villalta e que o CCG encargoulle a Federico Mosquera (A Coruña, 1986). Tamén participará o actor Xosé Barato (que fará de ‘home só’). A escenografía corresponde ás Dúas e Punto. O concerto, de entrada libre ata completar aforamento, tamén se poderá seguir en directo na páxina web do CCG e nas plataformas da CRTVG.
O ministro de Transportes e Mobilidade Sustentable, Óscar Puente, cualificou de “urxente” dar unha resposta ao futuro dos peiraos do porto interior da Coruña e á débeda contraída pola Autoridade Portuaria pola execución do porto exterior, durante a súa visita na cidade.
Para iso apelou ao consenso como fixo tamén o presidente da Xunta, Alfonso Rueda, e a alcaldesa, Inés Rey, de cara á reunión que as administracións, xunto a outros representantes implicados, manterán o próximo 22 de maio na cidade herculina. Foi con motivo da presentación do avance do plan director do Corredor Atlántico para Galicia, no Palacio Municipal de María Pita, e tras a viaxe do ministro desde Madrid ata A Coruña nun dos novos trens de alta velocidade da serie 106 de Renfe, que Talgo comezou a entregar a finais de abril co nome comercial de Avril.
“É urxente dar unha solución ao porto interior que faga viable a situación financeira da Autoridade Portuaria”, sinalou o ministro quen incidiu, ademais, nos usos futuros para abrir esa zona á cidade. Neste sentido, expuxo que traballan, no seu caso, con tres liñas: un convenio coa Xunta e o Concello patra o traslado da actividade ao porto exterior, un acordo para o uso conveniado de “as 80 hectáreas liberadas” e unha reestruturación da débeda contraída pola Autoridade Portuaria co Estado.
“SEGUNDA VIDA” Á CIDADE
Pola súa banda, o presidente da Xunta, Alfonso Rueda, asegurou, en referencia a unhas negociacións que supoñen abrir unha nova vía fronte aos convenios de 2004, que hai que “reinventar” para que haxa unha “mellora” nas actuacións previstas. Todo iso de cara a unha “solución” e “unha segunda vida a esta cidade”, engadiu sobre o que a alcaldesa, Inés Rey, cualificou como a “segunda modernización”.
No seu discurso, ante as autoridades presentes e outros representantes, Rueda avogou polo diálogo e a colaboración “por encima de formulacións ideolóxicas”. A iso, referiuse tamén a rexedora coruñesa quen defendeu unha “colaboración interadministrativa” e un traballo “da man” para a integración da fachada marítima da cidade. “A maior transformación en décadas”, apostilou.
ESTACIÓN INTERMODAL
O acto contou tamén coa presenza do comisionado do Ministerio para o Corredor Atlántico, José Antonio Sebastián, que fixo balance do plan director do mesmo. Durante a súa intervención, remarcou que a previsión é que a estación intermodal da Coruña estea finalizada en xuño de 2026, mentres subliñou o investimento na execución da mesma.
Emerxe o “tradi” máis electrónico, e tamén emerxe no país a música urbana. Os Boyanka Kostova, Medomedá, Los Jentes del Trópico, Rabelo, Berto… van abrindo camiño para que os ritmos máis desenfadados e actuais vaian collendo acento “gallegho”. Hai aí unha imperiosa necesidade de crear referentes galegos da música máis escoitada pola mocidade, de estruturar a escena urbana, ou máis ben “rur-urbana”.
Ese é o principal obxectivo da nova produtoraAaldea Music,“apoiar e potenciar o talento emerxente, democratizar o acceso á industria da música e estruturar a escena da música rur-urbana galega”. Así de claro o ten Jaime Lanchas (A Falperra, 1991), o seu CEO, tamén coñecido como SkyJota. Non hai nin un ano que puxo en marcha a produtora pero a base de “honestidade, cercanía, humildade e confianza” cre na posibilidade de ir tecendo unha rede que xa ten o “tradi” no “mercado galego” da música fresca, para cumplir o seu propósito: ”levantar a industria de música galega”.
Ten xa en cartel xentes comoC Mirazo, que o está petando dende unha aldea de Brión; Kid Mount (Xinzo), Eris Mackenzie (un rapaz de Castelo, Carral, que fai un indie pop experimental, fusionando o tradicional con música electrónica),C Maldito (Santiago/Muros), Willow GZ (As Neves, Porriño), Juantxo (da Falperra pero cirado en Bruxelas, que “rapea duro) ou a coruñesa/ceense Hydn, que non vai parar ata cantar na lúa (no Luar xa o conseguíu, por suposto).
”Hai que apoiar esta xente. Para nós é primordial, fan falta referentes. Se non os rapaces van ir buscalos a outro lado”, valora.
Identidade
Unha das partes fundamentais da produtora é a identidade. E para identificarse é necesaria a lingua galega. “É certo que non queremos facer un activismo explícito, iso xa existe, pero nós facémolo como nos nace, temos un rollo máis fácil, máis distendido. O asunto é normalizalo, eu canto así porque eu falo así, como lle cantaría aos meus colegas. Non é un statement, son galego. Pode parecer un rap de Atlanta, pero é Mirazo en galego dende a súa aldea de Chave de Carballo, en Brión, porque fala en galego, que lle vai facer”, explica Jota coa meirande naturalidade. “Non prestamos moita atención ás normativas, nin corrección cos castelanismos, é máis ben unha aposta pola honestidade da fala natural, porque falamos así. Podes escoitar unha colaboración que temos C Mirazo, Kid Mount e mais eu e hai 3 galegos distintos e igual de reais, un de Brión, un das Neves, un de Castelo.”.
”Para lin a lingua vai máis aló que a lingua en si, é como te expresas. Mirazo ten temas en castelán, pero en español de Galicia. E tamén vai do que falas. Se eu che falo de que estou en Miami con mi chori, vas pensar “pero que di este tío”. Pero se che falo que vou por unha pista, ou que estou detrás do palco coa miña moza… se traio esas referencias máis nosas xa sei que te estou contando unha historia de verdade. E a través deses costumbrismo, desas cousas que temos todos diante, imos medrando”.
E de feito, xa se ve nos vídeos que lanza a produtora, con cociñas de ferro, pistas repletas de eucaliptos ou faiados (“se digo desván xa non é o mesmo”). “Un barrio de negratas parécese máis a unha aldea galega que a un barrio residencial de Madrid”, conclúe.
Produtor
SkyJota, tamén canta, “pero a nivel cantar prefiro ser un secundario, céntrome máis en intentar desenvolver as carreiras dos demais”, apunta consciente de que para ofrecer confianza non pode poñerse por diante.
Comezaba en 2008 autoeditándose un EP ao rematar Son na EIS de Someso, intentando centrarse na comercialización. Tivo a súa banda de trap, Monte Alto Diablos, e ten feito de promotor, ás veces facendo cousas máis técnicas, como organizador, facendo marketing, electrónica… Tamén compaxinaba coa hostalería, e coa pandemia marchou a Madrid a facer un master de produción, e conseguíu facer unha beca nunha escola internacional. Pero tiña claro que quería volver a casa.
”Eu quero facer colectivo aquí. Penso que xa se nos está tomando en conta. Pero tamén creo que faltan conexións orgánicas naturais entre a chavalada da a música urbana, e a industria. Fai falta unha escena coordinada como xa hai na electrónica. E creo que aí aportar o noso para unificar”, apunta sinalando que a produtora quere apoiar proxectos emerxentes, solidarios…
C Mirazo no estudio Aaldea con Skyjota
O tradi e o trap
Á pregunta das sinerxias que pode haber entre a efervescencia do “tradi”, e o “boom da música urbana galaica”, Jaime creo que o camiño ten que ir da man. “Os que se criaron nos 80 tendes esa base de rockanroll, despois está a xente do tradi, que naceu aí, pero que ten que engadir ese rollo electrónico por esa reinminscencia, porque lle falta esa presión do baixo gordo. Pero esta xeración o que escoita cando vai de festa é música urbana, mainly. Somos fillos dese mainstream dese bombardeo comercial”. Entón tes por un lado o “o tradi con toques electrónicos, e agora xa comeza música urbana poñéndolle o tradi como engadido”.
Confiado no camiño aberto avisa de que “de aquí a 4 anos imos ter un nicho de urbana pero con identificación galega, máis o menos grandes”, e pon de exemplo a Hydn, “que fai un pop algo máis “serio” con toques identitarios, pero como fixo no seu momento Rihana cos roques afro”. “Hydn creo que podería ser unha diva con identidade galega. É meticulosa, esixente, moi traballadora, a cabeza vaille rapidísimo, e é moi ambiciosa pero no bo sentido… falando con ela sempre lle digo que cando estea cantando por todo o mundo vaime pedir que a leve a unha estación espacial.”
”Cando máis empuxe esta xeración máis fácil o terá a seguinte”, conclúe.
A Deputación da Coruña abriu o prazo de presentación de candidaturas para o V edición dos Premios PEL ás mellores empresas da provincia. As inscricións poderán realizarse ata o próximo 18 de xuño. A institución provincial informa de que as empresas gañadoras recibirán 72.000 euros en premios, 18.000 en cada unha do catro categorías.
As modalidades deste ano son mellor iniciativa empresarial nova, mellor iniciativa empresarial consolidada, mellor empresa verde e mellor iniciativa transformadora do rural.
Segundo recalca a institución, para o seu presidente, Valentín González Formoso, o obxectivo destes galardóns é “recoñecer o esforzo e implicación das empresas, emprendedores, profesionais autónomos e asociacións empresariais da provincia no desenvolvemento económico e na creación de emprego no territorio”.
O estudio virtual Coruña Estudo Inmersivo, impulsado pola Deputación da Coruña, estará operativo a finais de ano, segundo as previsións que trasladou o presidente do organismo provincial, Valentín González Formoso.
En declaracións aos xornalistas, concretou que as probas serán en outubro. Fíxoo con motivo da constitución da comisión político-técnica para a xestión do citado estudio virtual.
A mesma está integrada por representantes políticos e técnicos dos distintos servizos da Deputación que participan no proxecto e do Clúster audiovisual galego, que agrupa ás principais empresas do sector en Galicia.
“Só hai outro en toda Europa”, subliñou Formoso, quen destacou que o obxectivo é o posicionamento dentro do Hub Audiovisual e cun estudio situado na Cidade do TIC.
A sección segunda da Sala do Contencioso-administrativo do Tribunal Superior de Xustiza de Galicia (TSXG) concluíu que o Concello da Coruña está a executar e cumprindo o acordo alcanzado polas partes no preito derivado da licenza de rehabilitación concedida ao antigo edificio Conde de Fenosa, na Coruña.
Por iso, desestimou o incidente de execución promovido pola parte demandante, a cal entende que o Concello está a incumprir o acordo de mediación por non construír o edificio de vivendas sociais que se comprometeu a erixir en Xuxán.
O alto tribunal galego destaca que os traballos preparatorios da licitación do proxecto, solicitando a elaboración dos pregos, comezaron en marzo de 2019, é dicir, un mes despois de que se notificase o auto polo que o TSXG aprobou a homologación xudicial dos acordos.
Ademais, os maxistrados explican que o 21 de febreiro de 2024 procedeuse á aprobación do proxecto para a construción do edificio de 50 vivendas de promoción pública na parcela Z37 de Xuxán.
Os xuíces, ademais, lembran á parte demandante que a sentenza foi debidamente executada, sen prexuízo de que se proceda ao definitivo cumprimento, por parte da Administración municipal, do acordado na cláusula terceira do acordo de mediación. Por iso, advirten que non cabe residenciar na Sala “un seguimento que non procede”, ao non tratarse dunha execución de sentenza.
Os demandantes, segundo consta no incidente de execución, entenden que continúan pendentes de indemnización os danos patrimoniais e os prexuízos profesionais que lles infligió o Concello; e que, aínda que finalmente construísese o edificio, o atraso debería ser indemnizado.
O TSXG, con todo, destaca que “non existe constancia de incumprimento do conveniado na cláusula terceira -que é a referente ao edificio-, na que non se establecen prazos”. A Sala engade que, tras examinar a estipulación terceira, aprecia “que non se especificaba indemnización algunha en compensación na forma pretendida pola parte demandante”.
Publicaba esta pasada noite o Real Club Deportivo da Coruña, despois do agrio cruce de declaracións co Concello da Coruña, este comunicado do seu presidente, Ávaro García Diéguez:
➡️ O RC Deportivo proponlle ao Concello prorrogar o convenio actual para o uso de ABANCA-RIAZOR.
Un comunicado no que, a pesar de asegurar que a “alcaldesa falta a verdade, moitos entenderon como unha “recollida de cable”, no que propón renovar o convenio vixente, asinado entre a directiva de Tino Fernández e a Marea Atlántica no ano 2000 e con vencemento no 2025.
Así o entende tamén a alcaldesa Inés Rey, que chamou esta mañá ao presidente do Real Club Deportivo para retomar a relación entre ambas institucións. “O Concello acepta rectificación feita pública pola dirección do RC Deportivo anunciando que o accionista maioritario desbota a súa pretensión inicial de obter a cesión do estadio durante 40 anos e acepta tamén a chamada cláusula de arraigo que desde un primeiro momento propuxo o Goberno local, renunciando tamén á explotación económica do estadio fóra da actividade deportiva”, explica esta mañá o Concello nun comunicado.
A alcaldesa valorou “moi positivamente a súa disposición a firmar o convenio para o uso gratuito de Riazor durante os próximos 25 anos nos termos propostos polo goberno, moi semellantes aos agora vixentes e que evitan calquer tipo de especulación co patrimonio público municipal”.
A rexedora lembra que a praza e o Palacio Municipal, indicou Rey, están abertas para acoller aos xogadores e ao cadro técnico para celebrar á volta do club ao fútbol profesional.
Pola súa banda, o portavoz do goberno local coruñés e concelleiro de Economía e Planificación Urbana, José Manuel Lage, cuestionado por este asunto polos xornalistas, recalcou que a “posición” da alcaldesa e do goberno municipal é “sempre á beira do Deportivo, da súa afección e da cidade”.
“Hai que abrir unha nova etapa de entendemento e de cooperación”, insistiu, en alusión ás relacións entre o consistorio e o Real Club Deportivo. “O goberno municipal ten sempre a maior disposición para entenderse con todas as institucións públicas e privadas”, apuntou para engadir que “hai condicións para poder renovar ese acordo co clube”.
“Contra a Nakba 1948-2024” e “Palestina libre do río ao mar” serán algunhas das arengas que se escoitarán esta tarde de mércores 15 de maio, a partir das 19:00h na Praza das Conchiñas. Os colectivos mñais comprometidos coa causa queren levar á loita aos barrios e por iso levan esta concentración co gallo do aniversario da Nakba. Nakba significa en árabe “desastre”, “catástrofe”.
Así, BDS Coruña, xunto cos Sindicatos CGT, CUT, Sindicato de Elevación, CNT e Sindicato de Estudantes, unen forzas coa Asociación Veciñal da Agra do Orzán, neste acto no que se poñerán fotos das mártires palestinas nas diferentes masacres cometidas por Isrel desde a Nakba.
Por outra banda, os sindicatos e as traballadoras galegas respostan ao chamado dos sindicatos palestinos ás traballadoras de todo o mundo a parar de armar a Israel e a rematar con toda complicidade co sionismo.
Lembran a historia da Nakba, a limpeza étnica das palestinas levada a cabo por Israel en 1948 a través da súa expulsión violenta, desposesión de terras, fogares e pertenzas, xunto coa destrución da súa sociedade, cultura, identidade, dereitos políticos e aspiracións nacionais.
A chave como símbolo da resistencia
Moitas das palestinas da diáspora conservan coma un tesouro a chave da vivenda que tiñan en Palestina antes da expulsión. Na Praza das Conchiñas se fará alusión a este símbolo de esperanza de retorno.
