• O membro de Porco Bravú asegura que van intentar sacar a película!

— — —

Sarao que haia en materia audiovisual, sarao no que está Jorge Boquete e Óscar Cruz co seu Porco Bravú. A “granxa audiovisual” coruñesa leva xa unha década sendo auténtica protagonista da revolución dos contidos dixitais en Galicia, formando parte intrínseca de citas pioneiras como o Festival Carballo Interplay e participando noutros festivais de todo o planeta, ademais de ser avanzados no mundo do streaming.

Foi aló por 2013 cando Jorge e Óscar, aínda na Facultade, se lanzaron á crear a primeira webserie, “Conversas con Cunqueiro”, un proxecto “superamateur” pero xa daba conta do seu talento en plena praza do Humor.

Seguiron outros proxectos como “Peter Brandon” ou “El Método Sueco”, antes de lanzarse con novo “A arte de ser mal pai”. Esta nova webserie anda triunfando por festivais de todo o planeta. Despois de estrearse e gañar o premio á Mellor Webserie en galego no Carballo Interplay do ano pasado, de pasar por Lima ou Chile, veñen de ser escollidos como o premio a “Mellor Piloto” no X festival Serielizados de Barcelona e Madrid. Malia non poder estar o pasado sábado en Barcelona na Gala para recibir o premio, a serie escrita por Cruz e dirixida por Boquete resultou a escollida polo xurado entre as máis de 100 series de toda España, sendo a primeira vez que é en dez anos que unha serie en galego recolle o galardón no festival de series máis importante do país. “O mellor episodio piloto do ano en España é unha serie galega e en galego. Por fin estamos a romper as barreiras lingüísticas no país. A xente xa está disposta a poñer os subtítulos”, recoñece un contentísimo Boquete.

O proxecto naceu das gañas de Óscar e Jorge de volver crear xuntos, e por primeira vez puideron traballar cunha produtora seria detrás como é Miraveo, onde ademais traballan. Presentáronse ás Axudas de talento de Agadic, e saíu adiante este proxecto que nace das conversas que ten oscar con Xose Esperante noutras rodaxes, da experiencia de ser pai. “É un reflexo de todos os medos que temos os dous, que non somos pero seríamos un desastre, como Xosé, na serie, que na vida real é un padre de 10”, conta Boquete. “É unha miniterapia para ver os nosos medos en pantalla grande e poder aprender deles”.

Contan con actores de confianza cos que levan colaborando anos, “actores top aos que sempre lles estamos pedindo cousas e que sempre nos axudan e que sempre son a nosa primeira opción, que son actores TOP e cos que queríamos facer algún traballo digno”. Aí aparecen Marita Martínez, Sabela Arán, Fede Pérez ou María Costas, ademais dos protagonistas, o propio Xosé M. Esperante e Jacoba de Llano.

A serie, está entre unha comedia dramática ou un drama con notas de comedia, que compaxina risas e bágoas ao 50 por cen. Conta a historia dun pai corentón interpretado por Xosé M. Esperante, obrigado a despedirse da súa filla, a novísima e poderosa actriz Jacoba de Llano. Durante os tres días nos que sucede a emocionante historia, os creadores ofrecen unha mirada profunda e conmovedora sobre os desafíos da paternidade e a complexidade do que significa ser adolescente neste mundo moderno.

Agora, estanse presentando aos Mestre Mateo, a ver se colan entre os finalistas, pero miran cara adiante. Ao ser unha serie pechada (son 48 minutos que conta unha historia concreta e alongar a serie sería complicado), si que nos avanza Boquete que “vendo a acollida, estamos intentando convertir en película o proxecto. Imos aproveitar a boa onda”1.