O PP amplía a súa maioría, como no resto do país.
Achan o corpo sen vida dunha muller no mar nas proximidades do acuario da Coruña
Axentes da Policía Local atoparon na mañá deste sábado o cadáver dunha muller que flotaba no mar nas proximidades do acuario da Coruña.
Segundo informou o 112 Galicia, os axentes deron aviso deste achado á central de emerxencias ás 09.05 horas.
Así, activouse un operativo para o seu rescate, do que formaron parte Urxencias Sanitarias de Galicia-061, Salvamento Marítimo, o Servizo de Gardacostas de Galicia, o grupo acuático dos Bombeiros da Coruña e os axentes da Policía Nacional e Local.
Os membros do Grupo de Rescate Acuático dos Bombeiros da Coruña recuperaron o corpo que, a continuación, foi trasladado a terra a bordo dunha embarcación de Salvamento Marítimo, a Salvamar Betelgeuse.
As forzas da orde traballan para esclarecer as circunstancias do suceso.
Betanzos volve restrinxir o consumo de auga tralas analíticas de Augas
Xa avisou o venres, e este sábado o Concello de Betanzos decretou, apenas un mes despois de levantala, a restrición do uso de auga de abastecemento municipal. Faino despois da notificación realizada este mesmo sábado pola Consellería de Sanidade, na que se cualifica a auga como ‘Non apta para consumo’, tras os resultados da analíticas da auga feitas o pasado día 20 pola empresa concesionaria.
Nun comunicado, o consistorio municipal explicou que toma esta decisión tras a reunión de urxencia mantida durante a tarde deste sábado entre o Concello, a empresa concesionaria e a Consellería.
Con ela, sinalou, búscase evitar episodios de gastroentiritis como o do mes pasado. Con todo, asegurou que ata o momento non se produciu un aumento de casos de gastroentiritis por encima dos habituais.
O Concello xa puxo en marcha un protocolo de medidas operativas para garantir a subministración de auga con cisternas que estarán nos seguintes puntos: Praza García Irmáns, Bellavista e Carregal. Ademais, incorporarase repartición de garrafas a maiores que viven sós, veciños con problemas de mobilidade e familias en situación de vulnerabilidade.
Así mesmo, detallou que si se pode empregar a auga para hixiene persoal (lavado de mans e ducha) e para uso doméstico de limpeza, pero non para beber, lavar alimentos nin para hixiene bucodental.
INSPECCIÓN
A alcaldesa, María Barral, pediu nas últimas horas a Augas de Galicia unha inspección urxente e “palmo a palmo” do río Mendo, augas arriba da captación que ten Betanzos, para coñecer exactamente o punto no que se produce a vertedura de norovirus.
Así mesmo, Barral pediu a Augas de Galicia este esforzo como “responsable” de eliminar e vixiar as verteduras nos ríos. “Betanzos non pode vivir permanentemente pendente desta situación que está a afectando a todo o municipio”, manifestou.
As restricións manteranse ata que a situación mellore e os parámetros de auga sexan propicios para o seu consumo, segundo indique Sanidade. A próxima reunión de seguimento será o mércores para analizar a situación, sobre levantar as restricións ou non.
Evacuado en helicóptero un mozo de 23 anos que deu varias voltas de campá co coche tras sufrir unha saída de vía na AP-9 en Abegondo
Os servizos sanitarios evacuaron en helicóptero a un mozo de 23 anos, con iniciais J.A.V., que resultou ferido tras sufrir unha saída de vía na autoestrada AP-9, ao seu paso polo municipio coruñés de Abegondo.
Segundo confirmou o 112 Galicia, o accidente produciuse no quilómetro 29 da autoestrada en sentido norte. Sobre as 15.45 horas, un particular alertaba á central de emerxencias de que un vehículo dera varias voltas de campá e terminara envorcado neste punto.
Ao ter coñecemento do suceso, os operadores do 112 deron aviso ao Servizo de Urxencias Sanitarias de Galicia-061, que mobilizou ata o punto o helicóptero medicalizado con base en Santiago, ademais da Garda Civil de Tráfico, aos Bombeiros de Ordes e a persoal do servizo de mantemento de estradas.
Ademais do helicóptero medicalizado, que trasladou ao ferido ao Complexo Hospitalario Universitario da Coruña, o 061 enviou tamén unha ambulancia asistencial de soporte vital básico.
O tráfico permaneceu cortado no punto durante o tempo que durou a intervención, o que ocasionou retencións. A esta hora, segundo confirmaron fontes de Tráfico do Noroeste, a circulación xa se atopa restablecida e non se rexistra ningunha incidencia.
Olladas doutro tempo: Fábrica de Tabacos
A Palloza garda moita historia, aínda que non semelle tal cousa. Na segunda metade do século XVIII desviouse e canalizouse o tramo final do Río de Monelos -pola actual rúa que leva o seu nome e pasa diante do Fórum Metropolitano- coa idea de crear na Palloza o peirao de Correos Marítimos. Unha especie de Porto de Indias que conectaba Coruña con América. Dende alí partiu Alexander Von Humboldt a bordo da corbeta Pizarro cara á súa famosa viaxe científica polo mundo adiante.
Para o edificio que vemos na postal, imaxe de inicios do século XX, aproveitouse o almacén xeral de víveres para o servicio de Correos Marítimos. Esta institución funcionaría na cidade ata 1802, cando se trasladaría a Ferrol. Será entón cando se iniciaría a reforma das instalacións para o seu novo uso. A Real Fábrica de Tabacos inaugurouse en 1808 con 120 traballadoras. En 1812 ya eran 1300, e aumentaría case ata as 4000 en 1890. Un número enorme, tendo en conta que a poboación coruñesa nesa época non chegaba ós 40.000 habitantes.
A Fábrica de Tabacos foi todo un símbolo da industria coruñesa, e inspiraría a Emilia Pardo Bazán para escribir a famosísima novela “La Tribuna”. Esta fantástica obra está protagonizada por unha traballadora coruñesa e pola propia cidade, pois as descripcións da Coruña de 1883 son tan atractivas coma a trama que desenrolan as personaxes. A escritora falaría das cigarreiras deste xeito: “No es la cigarrera la tosca mujer del campo, de sentidos torpes y obtusos, de tarda comprensión, tímida al par que brutal: es al contrario una criatura lista como la pólvora, de afinados nervios y rápidas impresiones. El trato y roce contínuo con sus compañeras la hace sociable y comunicativa; la atmósfera saturada de tabaco, las largas horas de trabajo sedentario, empalidecen su tez y aligeran su sangre”.
Elas constituían o maior colectivo obreiro nunha soa instalación de toda Galicia. Pero non só eran moitas, senón que formaban un grupo moi unido. Eran solidarias, pero tamén eran bravas. Cando estaban descontentas, eran capaces de calquera cousa. Chegando mesmo a provocar revoltas sonadas, coma a de decembro de 1857. A dirección da fábrica adquirira maquinaria para picar e liar cigarrillos. Elas perderían postos de traballo e empeorarían as súas condicións laborais. Non o ían consentir: pechadas na fábrica, romperon as novas máquinas, tiraron os seus anacos polas fiestras directamente ó mar, que daquela bordeaba a fábrica, e subiron ó tellado. Dende alí defendéronse lanzando tellas. Ata que foron detidas e desaloxadas. Pero para iso as autoridades tiveron que enviar tropas de infantería e cabalería para sofocar o alboroto. As detidas foron levadas ó cárcere do Parrote por mar, para evitar máis protestas polas rúas. Pero ó chegar as embarcacións ó Parrote, grupos de mulleres apedraron á escolta, ata que a Garda Civil conseguiu escorrentalas.
A pesar de loitar con tódalas súas forzas, non foron quen de deter os avances tecnolóxicos. A novas formas de producción de tabaco farían menguar os planteis de traballadoras paulatinamente. En 1906 eran 2600 as traballadoras da factoría. En 1995, tan só 361. O debate non está obsoleto, hoxe en día a automatización laboral mellora a produción e a rendibilidade dende o punto de vista do empresario, aínda que aumenta a preocupación polo futuro laboral en moitas profesións. O prezo do progreso.
- Fernando Campos. Coruñés ata a médula e fanático da Historia, sobre todo se esa Historia é coruñesa. Máis de quince anos impartindo obradoiros culturais coma “Un paseo pola cidade”, “Personaxes da cidade” ou “A Cidade Perdida” no Fórum Metropolitano e no Centro Ágora.
OLLADAS DOUTRO TEMPO
- San Amaro (1920).
- “Orzán, oleaxe”.
- Campo da Derruba.
- Avda. Da Mariña (1858). A foto máis antiga da Coruña.
- Camiño de Garás.
- SANTO DOMINGO DENDE CORTADURÍA.
- CASA GÓTICA
- San Andrés con Santa Catalina.
- Porta do Parrote.
- San Francisco e A Maestranza.
- Cantón Grande.
- Praza de Mina. 1906.
- San Andrés. Avrillón.
- Praia do Parrote e Cárcere Real.
- Mercado do Peixe. San Agustín.
- Santa Catalina.
Estar coa familia ou ir de vermú, entre os plans dos líderes galegos este sábado, con Feijóo na Coruña
Os líderes das principais forzas políticas galegas e os seus candidatos ao Congreso teñen previsto pasar este sábado coa familia, tomar o vermú ou ir de festival, nunha xornada de reflexión na que o líder do PP nacional, Alberto Núñez Feijóo, estará na Coruña coa súa familia.
Este sábado xa non se pode pedir o voto, segundo dita a Lei Orgánica do Réxime Electoral Xeneral, e os candidatos aproveitarán para tentar desconectar e recuperar parte dos seus hábitos privados.
Así, o presidente do PPdeG, Alfonso Rueda, acudirá ao mediodía ao festival Atlantic Fest, que se celebra na localidade pontevedresa de Vilagarcía de Arousa, e no que actuarán grupos como Sidonie, Sidecars, Cupido, Leiva ou Joe Crepúsculo.
Pasar o día en familia é a opción elixida polo secretario xeral do PSdeG, Valentín González Formoso, quen aproveitará para coidar á súa sogra recentemente operada. Tamén prevé practicar algo de deporte e, se é posible, sairá a andar en bicicleta.
En canto ás cabezas de cartel, o ministro de Sanidade, José Miñones (A Coruña), comerá co seu pai en Raxó e, posteriormente, dará un paseo por Poio (Pontevedra). Se o tempo acompaña, irá á praia. Mentres, en Lugo, José Ramón Gómez Besteiro prevé ir facer a compra e cociñar, unha das súas afeccións.
ELIXIR VERMÚ
A ourensá Marga Marín aproveitará a xornada de reflexión para facer labores pendentes en casa. E tamén tomará o vermú con familiares e amigos nunha cafetaría do barrio da que é habitual.
O vermú é a opción elixida, así mesmo, pola portavoz nacional do BNG, Ana Pontón, quen aproveitará para descansar e pasar o día coa familia. Así, pouco despois de mediodía, coincidirá xunto á cabeza de lista da Coruña, Néstor Rego, nun establecemento da zona da praza de Abastos compostelá.
E nese mesmo emprazamento, aínda que segundo as axendas difundidas noutro local hostaleiro, a cabeza de lista de Sumar pola Coruña, Marta Lois, tamén gozará do aperitivo tras unhas compras na praza de Abastos a partir das 11,30 horas. Mentres, o un por Pontevedra, Verónica M. Barbeiro, acudirá á Feira do Libro Antigo de Vigo sobre esa mesma hora, na Praza de Compostela.
Os candidatos por Lugo e Ourense do BNG, Daniel Castro e Noa Presas, destinarán parte da súa xornada a facer deporte, no primeiro dos casos, e a estar coa familia que vive no estranxeiro e regresa a Galicia no verán, no caso da deputada ourensá.
FEIJÓO EN GALICIA
Tras o peche de campaña na Coruña, o líder do PP e candidato á Presidencia do Goberno, Alberto Núñez Feijóo, pasará este sábado a xornada de reflexión na cidade herculina coa súa familia e dará un paseo pola cidade, segundo informaron fontes do seu equipo.
O líder dos populares volverá a Madrid o domingo para votar e pola tarde estará na sede nacional do PP na rúa Xénova para seguir o reconto electoral das xerais.
O luns ten previsto, en principio, convocar á Xunta Directiva do PP para analizar os resultados e o martes regresará a Galicia con motivo da festividade de Santiago Apóstolo.
Petición de seis anos de cárcere para o loteiro acusado de quedar cunha primitiva millonaria
O Ministerio Fiscal pide penas de cárcere para o loteiro da Coruña acusado de quedar cunha primitiva millonaria, por importe de 4,7 millóns de euros, e para o seu irmán, que era delegado de Lotarías en 2012 cando, presuntamente, producíronse os feitos.
Serán os únicos aos que se xulgará despois de que a Audiencia Provincial da Coruña desestimase no seu día os seus recursos e si admitise o formulado pola Avogacía do Estado e acordase o sobresemento provisional da causa respecto doutro catro investigados, altos cargos de Lotarías do Estado no momento dos feitos.
Trátase dun caso no que varias persoas se postularon como posibles donos e co argumento do loteiro de que non aparecera o propietario do boleto premiado. Ao ano seguinte de selarse, o Concello da Coruña iniciou un “expediente de achado” para buscar ao gañador do billete premiado, que o loteiro dixo atopar na súa administración da praza de San Agustín, na Coruña.
Con posterioridade, iniciouse a investigación policial. Nela, cuestionouse a versión facilitada polo home sobre o achado casual do boleto chegando a considerarse que lle ocultou o premio ao verdadeiro dono, apuntando a investigación a un lexítimo propietario, xa falecido, e cuxos heredereos agora reclaman o premio.
Tampouco se descartou posibles responsabilidades por parte do seu irmán e de representantes de Lotarías do Estado no momento dos feitos, aínda que no caso destes últimos acordouse o sobresemento provisional.
FEITOS, SEGUNDO FISCALÍA
Agora, no seu escrito, remitido ao Xulgado de Instrución número 8 da Coruña por ser o competente nun caso para o que non hai data de xuízo, Fiscalía, segundo informou, sostén que o home falecido e ao que se considera o propietario, acudiu ao establecemento do loteiro para comprobar se os boletos que tiñan estaban premiados.
Sobre o sucedido, subliña que este tiña a obrigación de “devolver o resgardo premiado ao seu titular para que procedese ao cobro do premio” cando este acudiu en xullo de 2012 a pescudar se estaban premiados os boletos que comprara.
Con todo, sostén que o loteiro “coñecedor do alto importe do premio, quedoullo para así, xunto cos demais boletos, e non comunicou ao apostante devandito extremo nin tampouco lle devolveu o resgardo nin o comprobante expedido polo terminal“.
“Co boleto no seu poder e completamente seguro do alto valor que tiña, ese mesmo día acudiu á delegación provincial de Lotarías e Apostas do Estado da Coruña”, na que estaba á fronte o seu irmán “coa finalidade de acelerar os trámites do cobro do resgardo, prescindindo de calquera procedemento regulado e coma se fose lexítimo posuidor”.
“Sendo plenamente consciente da ilexitimidade da posesión deste título por parte do seu irmán”, asegura que este “se dispuxo a achandar o camiño” con actos tendentes “a disfrazar a verdadeira orixe do boleto” para os efectos de que se puidese “facer efectivo o premio”. Tamén sinala que “omitió toda actuació, como delegado provincial, que puidese servir para verificar a orixe real do boleto”.
PENAS
“Desde ese momento os acusados despregaron unha actuación continuada para evitar a incoación de calquera procedemento que puidese atrasar o cobro efectivo do boleto”, engade o Ministerio Público quen subliña que realizaron diversas peticións de cobro cando xa estaban incoados procedementos civís de reclamación da titularidade. O mesmo, precisa, segue depositado en Lotarías do Estado, sen que se produciu o seu cobro.
No seu escrito, Fiscalía pide unha pena de seis anos de prisión por un delito de estafa ou, alternativamente, de apropiación indebida para o loteiro. No caso do seu irmán, solicita a mesma pena por branqueo de capitais ou, de forma alternativa, tres anos de cárcere por encubrimento.
A Feira Medieval da Coruña ofrecerá cinco días con diversas actividades
A XXVII edición da Feira das Marabillas comezou este venres coa apertura dos postos e o inicio das actividades.
O evento ten orixe na Feira Franca do século XVI e retomouse no 1993 como feira de ambientación medieval. A Cidade Vella recreará A Coruña da Idade Media, con cinco días de actividades gratuítas para todos os públicos.
A alcaldesa, Inés Rei, presidiu os actos de apertura da Feira das Marabillas, acompañada polo concelleiro da área de Fomento e Promoción da Cidade, Gonzalo Castro; a concelleira de Turismo, Comercio e Hostalaría, Diana Cabanas, e o presidente de ACECA (Asociación de Comerciantes da Cidade Vella), Adolfo López.
“Esta feira permitirá a coruñeses e visitantes coñecer a orixe da Coruña, a Cidade Vella, podendo percorrer as súas rúas e descubrir os puntos de interese cos que conta” sinalou a rexedora.
O Estado pecha de novo e pon vixilancia 24 horas no Cárcere Vello
Unha semana despois da nosa publicación sobre a apertura do Cárcere Vello por parte de dous activistas, e trala visión rancia doutros medios da cidade, o goberno estatal vén de decidir volver a pechar e poñer seguridade na antiga Prisión Provincial.
Os dous activistas abriron as portas, desaloxaron a xente que estaba consumindo dentro, e realizaron unhas labores de limpeza de rescoldos importantísima, para denunciar o abandono dun edificio tan emblemático.
Antonte, Policía Local e Policía Nacional, que xa visitaran nos dous últimos meses aos activistas, desaloxaron aos activistas, que “abandonaron o edificio sen obxección ningunha”.
Mentres a burocracia se enreda, a propietaria Sociedade de Infraestructuras y Equipamientos Penitenciarios e da Seguridade do Estado (Siepse), recupera a vixilancia durante 24 horas. Unha vixilancia que xa estaba efectiva o ano pasado, pero dende que expirou o contrato o pasado mes de decembro, o Cárcere Vello quedou sen control. “Por motivos de seguridade tanto das persoas que se atopaban no interior como das que puideron acceder, tomáronse as medidas correspondentes”, explican dende a Delegación do Goberno.
Mentres, o edificio espera que políticos e administracións cheguen a un acordo para darlle unha nova vida ao edificio. O pasado ano Estado e Concello chegaban a un acordo extraxudicial, polo que o Concello faríase coa propiedade pagando 2,3 millóns ao Goberno Central, pero PP e BNG votaron en contra deixando claro que dúas administracións non poden especular cun edificio patrimonbial como este, esixindo a cesión gratuita para que o Concello rehabilite e poña en mans da cultura e a cidadanía o edificio.
Máis info
A alcaldesa da Coruña anuncia o apoio do Concello ao Centro Oceanográfico e ás súas actividades
A alcaldesa da Coruña, Inés Rey, comprometeu apoio ao Centro Oceanográfico situado na cidade, así como ás súas actividades, durante unha visita ás instalacións.
O Centro Oceanográfico da Coruña, que conta con 55 anos de historia, está dirixido actualmente pola investigadora Luz García. Desde as súas instalacións no paseo marítimo, levan a cabo investigacións sobre oceanografía, ecoloxía mariña, biodiversidade e avaliación de recursos pesqueiros.
Na visita, a rexedora puxo en valor o traballo que se desempeña no mesmo en materia de estudo e concienciación sobre o medio mariño, ademais de comprometer o apoio do goberno municipal.
Por outra banda, con motivo da xunta de goberno local, o consistorio informou da aprobación do proxecto para acometer un modificativo de crédito por valor de 2,2 millóns de euros, que, no seu maior parte, irá destinado a reforzar a programación cultural do concello, explica.
