Un home de 66 anos, con iniciais V.D.O.I, faleceu este luns na Coruña despois de sufrir unha indisposición cando conducía o seu vehículo pola zona de San Xosé e chocar contra outro turismo.
Segundo trasladou o 112 Galicia, o suceso ocorreu pasadas as 12,30 horas. Nese momento, o Servizo de Urxencias Sanitarias de Galicia-061 contactou coa central de emerxencias para informar de que unha UVI móbil dirixíase cara a ese lugar para atender a unha persoa tras producirse unha colisión entre dous turismos.
Con esta información, o Centro Integrado de Atención ás Emerxencias de Galicia deu aviso á Policía Local e aos Bombeiros da Coruña. Finalmente, os profesionais sanitarios tan só puideron confirmar a morte do home.
Os aeroportos de Vigo e Santiago de Compostela superaron en xaneiro o número de viaxeiros rexistrados no mesmo mes de 2019, antes do estalido da pandemia do coronavirus, mentres que o aeródromo da Coruña continúa aínda con datos inferiores a ese ano.
Segundo cifras publicadas este luns por Aena, o aeroporto de Lavacolla Rosalía de Castro contabilizou 214.616 viaxeiros o pasado xaneiro, un 20% máis que no mesmo período de 2019. Deles, 212.729 foron viaxeiros de voos comerciais, con 45.281 persoas que voaron en ligazóns internacionais, un 68,4% máis que en 2019. O aeroporto compostelán operou 1.734 voos, un 16,9% máis que en xaneiro de 2019. A terminal de carga manexou 372 toneladas de mercadoría un 48,6% máis.
No caso de Peinador, rexistrou un total de 74.233 pasaxeiros en xaneiro, un 3,3% máis en comparación co mesmo mes de 2019. As operacións subiron un 45,8%, ata 1.220 voos, dos cales 738 foron comerciais, un 6,2% máis. O aeródromo vigués contabilizou máis de 30 toneladas de mercadoría, un 72,4% máis.
Pola súa banda, desde A Coruña voaron 82.624 persoas, quedándose aínda no 90,7% do tráfico de pasaxeiros previo á pandemia, sendo así o único aeroporto galego que non recuperou niveis previos ao coronavirus. O número de operacións foi de 1.104, delas 746 foron voos comerciais, tamén menos que en 2019.
DATOS ESTATAIS
A nievl nacional, máis de 16,9 millóns de pasaxeiros transitaron polos aeroportos de Aena o pasado mes de xaneiro, o que supón un incremento do 2,1% con respecto ao mesmo mes de 2019 e, por tanto, a primeira vez que as cifras superan as prepandemia.
Ademais, esta cifra representa un aumento do 62,7% con respecto a xaneiro do ano pasado. En canto aos movementos de aeronaves, en xaneiro xestionáronse 156.500, o 98,1% dos de 2019 e un 18,7% máis que en 2022. En xaneiro movéronse 74.547 toneladas de mercadoría, o que supón unha recuperación do 96,4% con respecto ao mesmo mes de 2019 e un 97,2% fronte a xaneiro de 2022.
Un turismo e un autobús escolar chocaron este luns, sobre as 11,00 horas, no municipio coruñés de Arteixo. En concreto, o choque produciuse á altura dunha parada de autobús situada na AC-552.
Segundo trasladou o 112, no autobús, que se dirixía á Biblioteca de Arteixo, viaxaban 43 nenos, de idades comprendidas entre o tres e o seis anos, e cinco mestres, ademais do condutor e o acompañante. Ningún deles resultou ferido.
Ata o lugar, mobilizados polo 112 Galicia, acudiron axentes da Garda Civil de Tráfico, da Policía Local e efectivos do Servizo Municipal de Protección Civil de Arteixo.
A alcaldesa da Coruña, Inés Rey, e alcaldes e rexedoras do Consorcio das Mariñas mantiveron este luns unha reunión, no consistorio coruñés, para abordar o modelo de xestión da planta de residuos de Nostián e o tratamento dos mesmos.
Fixérono ao ser os concellos que integran o Consorcio usuarios da citada planta e despois de que o consistorio aprobase o anteproxecto para a licitación da renovación da planta.
Ademais do alcalde de Abegondo e presidente do Consorcio das Mariñas, José Antonio Santiso; asistiron a alcaldesa de Bergondo, Alejandra Pérez e a de Betanzos, María Barral. Tamén o fixeron o rexedor de Carral, Javier Gestal; o de Culleredo, José Ramón Rioboo e o de Oleiros, Anxo García Seoane, xunto á alcaldesa de Sada, María Nogareda.
Do contido da reunión, a alcaldesa declinou facer valoracións remitíndose a unha decisión de todos os presentes a este respecto.
CRITICAS NA OPOSICIÓN
Si o fixo a portavoz municipal da Marea Atlántica, María García e ex concelleira de Medio Ambiente na etapa de Xulio Ferreiro como alcalde, quen, a preguntas dos xornalistas nunha rolda de prensa que ofreceu este luns, denunciou ausencia de “prioridade” neste asunto. “Só se deron pasos atrás, é a nada durante catro anos”, declarou.
Pola súa banda, o portavoz do grupo municipal do BNG, Francisco Jorquera, manifestou que o encontro “chega tarde”. “É incrible que a alcaldesa non tivese un contacto cos alcaldes do Consorcio antes de presentar o proxecto da nova planta de Nostián”, engadiu.
Foi a Asociación Veciñal Atochas-Monte Alto-A Torre a que convocaba unha concentración este pasado sábado 11, de denuncia da “avaricia construtiva” e en defensa da recuperación da Fonte de Santo Amaro ou Fonte do Picho, unha fonte de “augas sanadoras” (e se cadra termais) recollida en numerosas publicacións e lendas.
Xurxo Souto tomou a palabra
Máis de medio centenar de persoas acodiron ao acto, que serviu para colocar un sinal na zona onde nace a fonte. Non faltaron xentes como o propio Xurxo Souto ou o historiador Felipe Senén, que considera necesario pasar a unha mobilización cidadá porque ”non só temos argumentos arqueolóxicos, históricos, mitolóxicos… senón aínda máis importante os da convivencia, urbanismo e humanismo. Necesitamos espazos onde o ser humano se exprese, e esta é zona de campas, onde a veciñanza se manifesta nas festas populares, como eran os magostos. Agora nin hai onde facer unha fogueira, hai que invadir o lugar sagrado como é o mar”, sinala.
”Isto paréceme antidemocrático o que vai en contra dos valores do humanismo”, e considera a urbanización como “un exemplo de deshumanizar a cidade”.
Tamén estivo presente a arqueóloga Ana Filgueiras, coa que se vai facer un foro aberto para seguir divulgando o asunto. En xeral, consideran necesario que a Dirección Xeral de Patrimonio interveña para controlar a edificabilidade.
Tres novas estacións de BiciCoruña veñen de ser instaladas barrio do Ventorrillo (na rúa Monasterio de Caaveiro), na contorna do parque de Oza coa rolda de Outeiro e na rúa Maxistrado Manuel Artime, lindeira á praza de Recife.
Xa están abertas para o uso e gozo da cidadanía, no seu horario habitual (das 07.00 da mañá á 01.00 da madrugada), facilitando os desprazamentos laborais a primeira hora e tamén o regreso das persoas usuarias aos seus domicilios en horario nocturno.
Son xa 35 as bases operativas, con case 7.000 persoas usuarias do servizo, máis do dobre das contabilizadas en xuño do ano pasado, cando se acometeu a primeira renovación de BiciCoruña desde a súa posta en marcha en 2009, e dende o Concello contan con chegar aos 10.000 usuari@s. Prevén a incorporación progresiva de 514 novas bicicletas, das que 172 son eléctricas e 342, mecánicas.
Máis estacións
Traballa o Concello para abrir estacións no polígono de Agrela e o barrio de Someso, “onde a implantación das novas bases de BiciCoruña esixen unha remodelación das beirarrúas e tamén a creación das instalacións necesarias para o funcionamento das estacións”.
No caso de Someso, os traballos para instalar a estación que estará situada na avenida da Universidade, fronte ao recinto ferial de Expocoruña, comezaron a inicios de semana, coa pavimentación da beirarrúa e a calzada.
A alcaldesa da Coruña, Inés Rei, cualificou de “absolutamente vergoñenta e irresponsable” a resposta “enlatada” ofrecida polos diferentes cargos do Partido Popular tras a manifestación celebrada este domingo en Santiago de Compostela en favor da sanidade pública e da Atención Primaria.
Díxoo, a preguntas dos xornalistas, ao criticar que se responsabilizase ao presidente do Goberno, Pedro Sánchez, da “incompetencia” dos populares e que, ademais, ao seu xuízo, elúdase a xestión que corresponde nesta materia á comunidade autónoma.
“Repetían un argumentario que non se sostén e son un desprezo para todos os galegos e galegas”, aseverou coincidindo coa reunión que mantivo con alcaldes e alcaldesas da área coruñesa.
Por outra banda, a rexedora agradeceu o apoio “masivo” que tivo a mobilización e destacou que a sanidade pública é un alicerce “fundamental” no Estado de Benestar que “os sucesivos gobernos do PP, polo menos aquí en Galicia, encargáronse de desmantelar, de recortar, de denigrar”.
“Onte a cidadanía galega díxolle alto e claro ao Goberno do PP que defendemos unha sanidade pública de calidade e que desde logo non imos consentir que se siga destruíndo”, destacou.
Respecto desta manifestación, o candidato da Marea Atlántica á Alcaldía da Coruña, Xan Xove, cualificouno como un “momento histórico” polo elevado número de partipación.
Case 3.000 persoas participaron este domingo no medio maratón C21 e na 5K. Fantástico o ambiente vivido na fermosa mañá dominical en toda Coruña, cun arrecendo a deporte que ergue o ánimo.
Este ano a C21 estivo acompañada dunha novidosa carreira 5K que serviu de prólogo do circuíto de carreiras populares Coruña Corre, que comezará no próximo mes
de marzo. Víctor Alonso, Yago Ignacio García e Adrián Blanco foron os primeiros
clasificados da categoría masculina, mentres que Irati Lorza, Sara Pita e Penélope Martínez
foron as mellores na categoría feminina. Houbo tamén carreiras para os máis peques, se cadra a parte máis divertida da xornada.
C21
O marroquí Hicham Sigueni e a kenyana Nancy Jepleting impuxéronse na proba de media maratón dos 21km, e finalizaron o percorrido con grandes marcas, chegando a bater o récord masculino do circuíto.
Na categoría feminina cumplíronse os prognósticos e a sub23 Nancy Jepleting gañou a proba cun tempo de 1.12:17, moi próximo ao récord do circuíto. Acompañárona no podio a
lucense María Jesús Conde e a ponteareá Sonia Abad.
Na categoría masculina, os tres atletas que subiron ao podio superaron a marca máis rápida das 15 edicións da C21, que tiña Hosea Kiplimo desde o 2020 con 1.02:30 horas. O podio estivo encabezado por Hicham Sigueni, que parou o crono en 1.01:40. Seguíronlle, en segunda e terceira posicións os kenyanos Edwin Kipruto e Peter Kariuki, respectivamente.
Xa hai ambiente de entroido polas rúas da cidade. E tamén no Palexco. O pasado venres viviuse a xornada de apertura do programa municipal de Entroido, co tradicional festival e Concurso de Comparsas. Case cheo no gran auditorio para disfrutar das coplas máis divertidas que soarán ao longo destas dúas semanas polas rúas.
A máis divertida, e áceda en termos políticos, segundo o xurado, a da comparsa Pantaleón, que gañou o primeiro premio do concurso de comparsas na categoría de música e letra, polo que será a encargada de poñer a festa en directo o vindeiro venres 17 ás 21.00 horas no acto de entronización do Deus Momo, que terá lugar no Obelisco.
Neste concurso participaron un total de sete agrupacións: Escola de Teatro Melandrainas, Como Cabras, Pantaleón, Malandros, Os Maracos, Monte Alto a 100 e Amigos da Xoldra (gañadores do ano pasado).
Dende neno sempre me chamou atención esta humilde construción, pedras de granito ben labrado, no alto da costa, ao pé do camiño de retorno da praia. Tamén a devoción que a veciñanza sentía pola auga do Picho.
“No potable”, mesmo cando lle colocaron ese triste letreiro, moitas persoas seguían acudindo coas garrafas na procura da súa auga.
Anos despois descubrín o porqué de tal devoción. O Picho era unha fonte sagrada. Ao seu carón erguíase a antiga capela de Santo Amaro. Até comezos do século XX estivo en pé. O primeiro domingo de setembro celebrábase aquí unha gran romaría na honra deste santo. Mesmo desaparecida a capela, a romaría continuou. Falo das famosas -ao mellor ti tamén estiveches nelas- “merendiñas da Torre”.
Foto Historica de San Amaro
Tan querida é dende sempre a auga do Picho que mesmo serviu para lle dar nome a unha rúa, tal como pode lerse hoxe na súa placa:“Calle/rúa Fuente de San Amaro” (sic).
Acude a esta homenaxe. Alén de fermoso, vai ser un acto especialmente didáctico. Porque, segundo algúns, a día de hoxe é imposíbel ubicar a situación orixinal da fonte.
Tal é a conclusión do informe arqueolóxico que acompaña a un gran proxecto de urbanización. Coa primavera comezarán as obras: A construción de 260 vivendas (29 torres de seis andares, algunha de nove).no pouco que queda da Agra de Santo Amaro.
Si, leu ben. 29 nove torres, enriba da praia, na propia contorna da Torre de Hércules.A especulación máis salvaxe continúa a campar na cidade da Coruña.
Como que é imposíbel situar a antiga Fonte do Picho! Se non o conseguen co xeo-radar, existe unha alternativa mellor e moito máis sinxela: abonda con falar con calquera persoa de idade da zona. Ou acudir, este sábado, á colocación do letreiro.
Como acontece coa propia lenda de Amaro, o santo navegante que atopou a illa do Paraíso, todo o que ten que ver co intento de urbanización desta agra, ten un aquel de fantástico e irracional. Velaí outro informe, esta vez da Xunta. Segundo os técnicos que o asinan, a construción das 29 torresnon vai alterar a visión do mar. Falamos entón de cemento transparente? Outra boa mostra de literatura fantástica, mais esta vez con selo de documento oficial.
O informe arqueolóxico tamén se ocupa, por suposto, da antiga capela de Santo Amaro: Tampouco a sabe situar. Mais recolle unha cita na que se indica que estaba nas proximidades da fonte. Se atopamos o Picho, teremos moitas posibilidades de encontrar tamén os alicerces da ermida. Ou sexa, uns restos arqueolóxicos que impedirían o desenvolvemento deste proxecto megalómano, verdadeiro pelotazo urbanístico (como ve, os tópicos dos días da especulación salvaxe volven ser acaídos). E obrigarían a definir unha nova proposta que poña en valor a Agra de Santo Amaro. Un proxecto no que a marabillosa tradición simbólica do lugar sexa máis importante que o negocio millonario dos propietarios deses terreos, recualificados, por certo, poucos días antes de que a Torre fose declarada patrimonio da Humanidade.
Medre a Agra de Santo Amaro. Volvamos a celebrar a beleza na contorna no Campo das Merendiñas. Que obre un novo milagre (coa nosa axuda) a auga santa da fonte do Picho!
Xurxo Souto. Dinamizador cultural eterno da vila da Coruña. Membro fundador dos Diplomáticos e do Rock Bravú, actual cantante da Banda de Shanghai, locutor de radio, escritor, contador, guía turístico e espiritual… Enciclopedia viva da Coruña.
