O 1 de abril, é non e broma, comezaron as obras de «formigonización» dos Cantóns que «por ineludíbeis necesidades técnicas e sempre durante o menor tempo posíbel manterán pechado ao tráfico de autobuses urbanos a avenida da Mariña entre o edificio de Correos e o teatro Rosalía de Castro». As coruñesas xa temos claro que «a segunda modernización da cidade» é un calco da primeira e todo son obras, talla de árbores e «aparentar ser» o que non se é: ese costume tan propio dos nacionalistas dos Cantóns.
As usuarias da Compañía de Tranvías memorizamos as novas rutinas que durante as vindeiras «cinco semanas» teremos que seguir para baixar ao centro ou ir ao Abente e Lago. Xa estamos afeitas após convivir coa brillante despeonalización de santo André e outras obras públicas de humanización que nos fan estar «na cabeza da península ibérica» en tantas e tantas cousas. Durante cinco semanas, serán máis, xa sabemos que «unha obra se sabe cando comeza mais nunca cando remata», as coruñesas non poderemos usar transportes colectivos na avenida da Mariña. Acatamos a norma polo ben común e respectando a vontade do noso goberno local.
Todas as coruñesas? Non, hai un pequeno grupo que resiste a regulamentación do Inesato: os servos da gebla do grupo Inditex non están sometidos ao dereito común e teñen as súas propias normas ao marxe das municipais e autonómicas. Onte e hoxe, durante todo o día, os autobuses que recollen á persoal do multimillonario leonés, claramente rotulados («Inditex», «Pull & Bear», etc) seguen a facer uso da avenida da Mariña e as súas beirarrúas (leron ben: as beirarrúas) para que ese cadro de persoal que vive no centro do centro non teña que camiñar, como o común dos mortais, até A Terraza para poder ir traballar a Arteixo.
Este dereito de rodada é un pequeno tributo que as cidadás temos que facer ao noso señor feudal e o seus vasalos e que as coruñesas asumimos coa nosa tradicional alegría democrática porque sabemos todo o que contribúen ao noso benestar e que, se seguimos a ser tan guiadiños, nos recompensarán amosándonos fotos bonitas «de balde».
- Rodrigo Osorio Guerrero, do colectivo lugrisán In Nave Civitas.
