O Festival Internacional da Banda Deseñada Viñetas desde o Atlántico iniciou este luns, 11 de agosto, a súa 27ª edición coa apertura oficial no Kiosko Alfonso ás 18:00 horas. A primeira xornada pechará ás 21:00 horas na Carpa Rúa BD cun concerto gráfico a cargo de Don Rogelio J.

UN MARTES CHEO DE ACTIVIDADES

A programación do martes 12 combinará charlas, presentacións, obradoiros, visitas guiadas e sinaturas repartidas por diferentes localizacións da cidade.

Pola mañá, a Carpa Rúa BD acollerá ás 11:00 horas a charla “Con voz propia: historias del yo”, centrada na situación das mulleres no sector da banda deseñada, coa participación de Marika Vila, Montse Mazorriaga e Sara Jotabé, nun acto en colaboración coa Sectorial del Cómic. Ás 12:00 horas, Alba Ceide e Óscar Losada presentarán A tese de Margot en colaboración con Komic Librería.

No Palacio Municipal María Pita, tamén ás 12:00 horas, Inacio e Iván Suárez guiarán unha visita á exposición Castelao en BD. A mesma hora, a Sala Palexco ofrecerá un obradoiro de iniciación ao fanzine dirixido a nenos e nenas a partir de seis anos, en colaboración con Autobán.

Pola tarde, a Carpa Rúa BD iniciará ás 17:00 horas unha sesión de sinaturas con varios autores e continuará ás 18:30 horas cunha charla sobre a internacionalización do cómic español e o proxecto WILDCAT de ENCRE, a cargo de Alejandro V. Casasola Medina e Emilio Gonzalo Mallo.

Ás 19:30 horas, Jordi Bayarri falará sobre o uso do crowdfunding na autoedición, e ás 20:30 horas Pedro Medina presentará o proxecto Tebeos a Una.

A Sala Palexco ofrecerá ás 18:00 horas o obradoiro “Elixe (ou non) a túa propia aventura”, impartido por Diego Burdío e dirixido a participantes de entre 8 e 16 anos.