Xa son 52 as bases de BiciCoruña que están activas na cidade, reforzando así un servizo municipal que segue batindo marcas de uso (o último os 172.000 rexistrados só no mes de xullo), e que está cambiando a mobilidade da cidade como nunca antes en décadas.
O Concello vén de poñer en funcionamento 3 novas estacións: en Lonzas, no parque de Vioño e na rolda de Monte Alto, coa novidade de que estas dúas últimas son as primeiras en funcionar con subministración de enerxía solar.
A estación de Vioño está situada á altura do número 33 da avenida José María Rivera Corral, moi preto dos bloques residenciais de vivendas que lindan coa área verde do barrio, preto do polígono de Agrela (a medio camiño entre a xa existente na rúa Gutemberg e a carón da praza de San Rosendo, na Sagrada Familia), onde cada día hai un tránsito de case 20.000 persoas traballadoras.
A de Monte Alto está a altura do nº48 da rolda de Monte Alto, e a de Lonzas está situada na avenida do Ferrocarril.
A expansión do servizo continúa
A previsión do Concello é que BiciCoruña vaia sumando máis bases noutros puntos da cidade nas vindeiras semanas. Por exemplo, en barrios como Novo Mesoiro ou O Birloque, entre outros.
