A pesar de non poder ter desenvolto o Encontro Internacional este pasado mes de xuño pola rebaixa da aportación municipal, a Rede Acampa pola Paz segue moi viva e moi comprometida co pobo palestino.
En cada unha das súas edicións sempre houbo un espazo para a ocupación das terras palestinas por parte do goberno sionista de Israel (o último, o recoñecemento á Defensa dos Dereitos Humanos ao oftalmólogo e activista palestino Mohammed Safa), pero para o Movemento Acampa, despois de 2 anos asistindo en directo a un xenocidio, chegou o momento de dar unha inmensa resposta unitaria, de que a forza cívica conflúa. “Todas e todos xuntos temos o deber de parar este sufrimento insoportable. É tempo de unidade e de tomar as rúas coa bandeira dos DDHH que, neste momento da historia, está máis que representada na bandeira palestina”, sinalan.
Diríxense así publicamente “a todas as organizacións que integran a súa rede, aos partidos políticos, sindicatos, ONGs, asociacións e entidades de todo tipo para que, por unha vez desde a unidade, levanten a voz e tomen as rúas baixo a bandeira dos DDHH que neste momento da historia está máis que representada na bandeira palestina”. Convida pois a todos a sumarse “ás mobilizacións e á confluencia da forza cívica para que o berro social sexa enxordecedor”.
“Vemos como a sociedade mobilízase por todas partes e de todas as formas posibles pero aínda así os gobernos, que teñen a capacidade de exercer a presión necesaria para poñer fin a esta barbarie, seguen plegados aos intereses xenocidas do goberno de Israel contra a vontade mesma das súas poboacións”, aseguran desde a organización. Por iso, Acampa chama á acción. É necesaria unha resposta unitaria, “conscientes de que a estratexia de exterminio do pobo palestino avanza como un laboratorio de impunidade, como un test de valoración da capacidade de resposta da humanidade, para aplicar a mesma receita noutros territorios”.
“Se perdemos Gaza, se permitimos o exterminio do pobo palestino, renunciamos á idea de que os Dereitos Humanos son un valor internacional que debe ser defendido e respectado”, insisten. Por iso é esencial rearmar os DDHH e conseguir que a Corte Penal Internacional xulgue por crimes de guerra aos responsables desta barbarie.
Máis novas
Os recoñecementos á Defensa dos DDHH da Rede Acampa pola Paz terán cores palestinas
