A Casa Museo Casases Quiroga acolle este mércores, ás 19.00 horas, a presentación da publicación ‘Rimas populares de Galicia’ de Manuel Murguía que profunda na documentación conservada sobre o frustrado proxecto do primeiro presidente da Real Academia Galega (RAG).

Así o explica a institución académica que sinala que o acadécimo correspondente Diego Rodríguez presenta a obra nun acto xunto ao presidente da RAG, Henrique Monteagudo, e o concelleiro de Cultura do Concello herculino, Gonzalo Castro. O volume reproduce uns 150 romances recompilados por Murguía a través de colaboradores como o escritor e lexicógrafo Marcial Valladares ou a súa filla, Alejandra Murguía de Castro.

A RAG lembra que ao longo de moitos anos Manuel Murguía anunciou tanto a existencia como a inminente publicación dun libro titulado ‘Rimas populares de Galicia’ que recompilaría romances. Agora, o estudo de Diego Rodríguez ofrece as páxinas “definitivas” a partir da documentación que se conserva daquel proxecto na RAG e na Fundación Barrié.