A normalización do topónimo da cidade no Real Club Deportivo de A Coruña, conseguida pola mocidade do IES Rafael Dieste e a súa campaña #Aquítaménsefala, está tendo consecuencias.

Hoxe é o portavoz do BNG no Concello, Francisco Jorquera, o que anuncia o rogo oral que vai facer no vindeiro pleno de maio para que a “Empresa Municipal de Aguas de La Coruña (EMALCSA)”, mude a súa razón social e asuma na súa denominación a forma A Coruña como a única oficial e legal do topónimo da cidade.

“A día de hoxe, esta empresa municipal chámase Empresa Municipal de Aguas de La Coruña Sociedad Anónima, o que claramente constitúe unha anomalía, sendo que o nome da cidade é A Coruña desde a aprobación, en 1983, da Lei de Normalización Lingüística por parte do Parlamento galego”.

Lembra Jorquera que “no pasado mandato anunciouse a vontade de corrixir esta anomalía adoptando a marca Augas da Coruña, mais a realidade é que aínda non se ten dado ningún paso para a súa concreción”.
Recoñece, en calquera caso, a boa fe do goberno municipal, coa denominación da Ronda Real Club Deportivo da Coruña á V-14, isto é, a variante da coñecida como terceira ronda que conecta a AC-14 coa glorieta do Pavo Real.

O Dépor galeguizará en maio o seu nome. A mocidade fai historia