A Audiencia Provincial da Coruña celebrará do 1 ao 19 de xuño o xuízo, con Tribunal do Xurado, contra tres mozos acusados da morte de Yoel Quispe, o rapaz de 22 anos falecido tras ser esfaqueado na Noitevella de 2023 na zona da rúa Juan Flórez, na cidade herculina.

Fronte á postura da Fiscalía, que pedía 14 anos de prisión por homicidio para o único mozo que está en prisión e o sobresemento da causa para os outros dous, a familia sostivo desde o inicio que os tres debían ser xulgados por asasinato. En canto ao seu grao de implicación, consideran autor material do asasinato ao mozo que está en prisión e cooperador necesario ao que, segundo esta parte, “levaba a navalla e se la facilita” ao anterior, cunha implicación tamén dun terceiro.

Así o recolle tamén o auto, que sitúa ao presunto autor da puñalada mortal como responsable de asasinato; ao segundo como cooperador necesario dese delito e ao terceiro como encubridor do mesmo. Isto supón unha variación das penas, de atala 25 anos de prisión para os dous primeiros, segundo o avogado da familia, e de tres anos para o terceiro.

Finalmente, no auto, a titular do xulgado de instrución acordou decretar a apertura do xuízo oral por asasinato, tal e como reclamaba a familia.

CONDENA POR LESIÓNS A OUTROS DOUS

Polos feitos, dous acusados de agredir á vítima aceptaron, nun xuízo celebrado hai unhas semanas no Penal número 3 da Coruña, unha condena de nove meses de cadea, aínda que con acordo de suspensión se non volven cometer outro delito e abonan a responsabilidade civil. Inicialmente, para cada un deles, o Ministerio Fiscal pedía un ano de prisión polos feitos ocorridos sobre as 06.30 horas do 24 de decembro de 2023 na confluencia das rúas Sinfónica de Galicia e Juan Flórez.

No marco dunha “rébora”, os agora condenados agrediron ao finado “con reiterados puñetazos e patadas” ata causarlle, entre outras lesións, “traumatismos na cabeza”. Yoel faleceu horas despois pola puñalada mortal que se atribúe ao único encarcerado por estes feitos.

Tras un acordo de conformidade entre as partes, os dous mozos aceptaron esa condena de nove meses por un delito de lesións e o pagamento de 1.500 euros en concepto de responsabilidade civil.