Son eternos os problemas entre o Concello de Oleiros e a Xunta de Galicia en materia de transporte. Desta volta, o Concello de Oleiros vén de instalar esta mañá un autobús destartalado na parada de Santa Cristina para denunciar a negativa da Xunta de Galicia a implantar un servizo de transporte público directo desde Perillo ata Universidade da Coruña.
“Esta política de bloqueo da Xunta está obrigando a usar o coche ou a facer un periplo en bus ata o centro da cidade a máis de 800 persoas que residen en Oleiros –alumnado e profesorado-“, denuncian dende o Concello, sinalando que habería outras tantas persoas de municipios limítrofes que tamén se beneficiarían da creación desta liña, pois todos os buses de Sada, Bergondo, Betanzos e parte de Cambre pasan por Perillo e se beneficiarían directamente desta liña.
Tal e como din as mensaxes que se poden ler no autobús, o servizo “non arranca” porque, segundo fontes municipais, “a Xunta de Galicia leva dous anos rexeitando as continuas peticións realizadas por parte do Concello de Oleiros. Unha situación que ademais é discriminatoria con Oleiros, e tamén con Sada, parte de Cambre, Bergondo, Betanzos,… que ven como en Arteixo e Culleredo si dispoñen de conexión directa aos campus”.
O Concello de Oleiros demanda a creación dunha liña entre Perillo e o campus universitario da Coruña que funcione de forma circular nas franxas horarias de entrada e saída das aulas. Dende o Concello consideran “esperpéntica” a falta de conexión coa Universidade e “unha mostra máis do miserento servizo de transporte público que a Xunta de Galicia presta na comarca da Coruña e que se nega a mellorar”.
Vai máis alá e e critica a postura habitual da Xunta, “adoptando continuamente unha posición de defensa da empresa concesionaria e do lucro das liñas, cando un servizo público coma este non se pode medir exclusivamente en termos de rendibilidade económica”.
Así, repite a proposta de creación dun Consorcio Metropolitana de Transporte, así como abordar importantes obras pendentes na rede viaria: Alfonso Molina, ponte Pasaxe, Vía Ártabra, Artabriña, Vial 18…
Máis novas
Reiteran os eternos problemas do transporte público metropolitano
O Concello de Oleiros inicia a campaña de denuncia do abandono das estradas da Xunta
Nova ofensiva do Concello de Oleiros pola finalización da Vía Ártabra
