- Xornada 14 – Depor 1 – Osasuna Promesas 1
- O Dépor confirma que esta tempada só está para pelexar a metade da táboa. É igual o rival de enfronte, o problema do Dépor só é o Depor.
- Décimo cuarto partido de Imanol Idiakez como adestrador do Depor en partido oficial (4V 7E 3D). Pode que penúltimo encontro como adestrador do equipo branquiazul.
— — —
O Dépor está completamente morto para seus adentros. Está baleiro de todo o que fai falla para pelexar o obxectivo do ascenso. Non hai adestrador, os xogadores están superados polo escudo e pola afección, están bloqueados mentalmente e derrotados por catro malos partidos no comezo da Liga. Non hai reacción, non se albisca rexurdimento e os afeccionados comezan a vacilar sobre que será mellor este ano: dar por rematada a tempada en decembro ou tratar de reverter a un morto que nada ofrece ós seus.
O Dépor está baleiro de folgos e baleiro de ambición. Nada facía pensar nesta situación hai escasos dous meses, alá polo comezo da tempada. Só fixeron falta tres malos resultados para tirar todo abaixo. Non ten capacidade para aguantar o resultado con el a favor, nin é quen de ir polo partido cando está por baixo no marcador. Un dato: no que vai de Liga non foi capaz de remontar ata a vitoria un resultado en contra. Sempre que comezou perdendo, coma moito, acabou empatando.
O Depor está baleiro de obxectivo dende outubro. Perder en Fuenlabrada e máis có Fortuna en Riazor a semana seguinte, tirou por terra a pouca estabilidade deste proxecto. Catorce encontros xogados onde se repite a historia semana tras semana. Na metade da táboa, a sete puntos de playoff, a sete puntos do descenso, con dúas vitorias en Riazor de sete encontros disputados, non queda moito ó que agarrarse. Difícil dicir que será polo que pelexemos en marzo.
O Depor está baleiro de mando. Ninguén é quen de diagnosticar o problema e, mais aínda, propoñer unha solución digna para o que resta de campionato. As fichaxes non carburan e co que hai non chega para gañar a un Tarazona ou as promesas de futuro de Osasuna. Esta é a realidade do Depor. Sen mando, sen reacción, cos discursos vagos dende tódalas frontes do clube, nada ofrece este proxecto para seguir crendo nel.
- Miguel Barreiro Bugallo. Coruñés e deportivista no exilio mesetario. Sufrindo ó depor dende 1988. O que sei de fútbol, o Depor empéñase en negarmo. Firme defensor do fútbol de botas negras.
MÁIS CRÓNICAS DO DÉPOR
- Miguel Barreiro: O Dépor e a marmota.
- Miguel Barreiro: As mil caras do Dépor
- Miguel Barreiro: Tímida recuperación do Depor.
- Miguel Barreiro: As árbores e o bosque do Dépor
- Miguel Barreiro: Punto de non retorno.
- Miguel Barreiro: A canonización de Idiákez.
- Miguel Barreiro: Pobre arranque dun Dépor errático
- Miguel Barreiro: O Dépor faino todo.
- Miguel Barreiro: As novas posibilidades do Dépor.
- Miguel Barreiro: Volta ao verde.
