As traballadoras das residencias privadas de todo o país están secundando este martes a segunda das catro xornadas de folga convocadas pola CIG en demanda dun convenio colectivo digno e salarios xustos. Na cidade, a pesar dos servizos mínimos “abusivos”, fixérono cun parón ao mediodía, as profesionais da residencia de Padre Rubinos, así como as da residencia domusVi de Arteixo.
Durante as concentracións, denuncian unha marea de problemáticas que afectan ás traballadoras: “sobrecarga de traballo, asunción de tarefas que non corresponden, falta de tempo suficiente para atender as persoas usuarias, salarios de miseria e unhas ratios obsoletas”.
O secretario de Negociación Colectiva da CIG-Servizos, Adolfo Naya, facía unha valoración moi positiva da participación nesta xornada de folga “tendo en conta as dificultades que existen polos abusivos servizos mínimos”. A este respecto, avanzou que o sindicato está valorando denunciar a varias empresas do sector que comunicaron os servizos mínimos con posterioridade ao inicio da folga ao entender “que isto constitúe unha vulneración do dereito á folga e non o imos consentir”.
Reiterou as críticas á falta de vontade negociadora da patronal, que mantén paralizadas as negociacións dende o pasado mes de outubro, condenando así o persoal a seguir perdendo poder adquisitivo e a unhas táboas salariais que, nas categorías máis baixas, xa quedaron por debaixo do SMI.
As traballadoras acodirán á manifestación nacional convocada para este sábado, 26 de abril, con saída ás 11h da Alameda de Santiago de Compostela.
Máis novas
Os maiores de Arteixo mobilizáronse pola situación de urxencia dos SAF
Persoal das auxiliares de Inditex mobilízase por unhas condicións salariais dignas
