UGT e USO anunciaron mobilizacións para esixir seguridade no traballo ante a recente agresión sufrida por un vixiante do Hospital de Oza. Advirten de mobilizacións “sostidas e indefinidas” para denunciar a “situación crítica” que atravesa o persoal de seguridade privada que presta servizo en hospitais e centros sanitarios.

Iniciarán as concentracións o 22 de decembro ás 11.30 horas no Complexo Hospitalario Universitario da Coruña (CHUAC) e continuarán en Santiago de Compostela. Concretamente, o mércores 7 de xaneiro ante a Consellería de Sanidade e o, tamén mércores, 21 de xaneiro, ante o Hospital Clínico Universitario de Santiago. Por último, –aínda que insisten en que o calendario de mobilizacións continúa aberto–, o mércores 28 de xaneiro mobilizaranse outra vez ante a Consellería.

A intención, apuntan nun comunicado, é manter as protestas “sine die” ata que a Administración “asuma a súa responsabilidade”. No comunicado denuncian que os vixiantes de seguridade, “a primeira barreira fronte ao conflito”, traballan con persoais “insuficientes”, “medios escasos” e unha presión “constante”, “sostendo un sistema que se beneficia da súa profesionalidade mentres lles negan condicións dignas”. Os sindicatos sinalan directamente á Consellería de Sanidade como responsable da situación por un modelo que, acusan, levou á seguridade privada no ámbito sanitario “a un punto de colapso”.