O pasado 27 de febreiro a alcaldesa da Coruña calificou como «patrimonicidio» a antiga rotonda que rodeaba o Obelisco. Esa pequena zona verde naceu, según a nosa mandataria, para facilitar a circulación dos coches cando aínda había tráfico arredor do monumento e era preciso eliminala para sempre para que todas poidamos desfrutar da base do reloxo, tal e como sempre foi concebido. A vida non é sempre o máis importante.

Amais da brillante achega a lingua da señora Rey que pode que, dentro de moitos, moitos anos, obrige a Real Academia a lle dedicar un Día das Letras; as súas declaracións deixan claro unha das liñas non expresas do seu programa político pero que fomos sentindo todas as coruñesas obra tras obra, humanización tras humanización: calquera vexetal, aínda que sexan modestos arbustos e flores, como os que rodeaban o Obelisco, mancan nos ollos da líder do progresismo coruñés.

Dende que comezou a «Segunda Gran Modernización» da nosa cidade sacou das rúas moitos destes noxentos patrimonicidios:

– matou os umeiros do xardín de san Carlos (vemos na foto de portada)

– tallou as pequenas árbores que estaban diante da Delegación do Goberno e da igrexa de San Pedro de Mezonzo:

– acabou co boa parte das árbores da praza de Ourense:

– rematou coa buganvílea que dende san Carlos miraba a rúa san Francisco:

Iso sen contar coa «solución final» que o goberno de Inés Rey aplicou as palmeiras coa escusa do picudo vermello e o notable incremento do formigón e o cemento nas nosas rúas, mesmo na peonis que fixeron desaparecer moitos espazos verdes substituídos por macetas e xardineras: ese xeito tan urbanita de domesticar á nai terra.

O resto do patrimonio ferido de morte: a Fundación Luis Seoane, o vello Cárcere, os frescos de Lugrís,… poden seguir agardando a que a gran modernizadora aprenda como lle sacar rendemento económico.

• Rodrigo Osorio Guerrero, do colectivo lugrisán In Nave Civitas.

MÁIS ARTIGOS DE RODRIGO OSORIO NO XDC

• DEREITO DE RODADA.
• O DISFRAZ DA ALCALDESA.
• CONTRA A PEONFOBIA
• CONTRA O MUNDIAL DE FÚTBOL (POLO MENOS NA CORUÑA)
• TEORÍA E PRÁCTICA DA POLÍTICA PAILAROCA
• A TRISTURA DAS ONDAS DE ORZÁN, MEDIO SÉCULO DESPOIS
• S.O.S. LUGRÍS