Chegou o día. Pasaron un ano e tres meses dende que A Coruña foi designada oficialmente como sede do Mundial 2030. Pero hoxe, luns 16 de marzo de 2026, o Concello da Coruña asumiu publicamente a renuncia a un fito histórico para a cidade.
Nunha rolda de prensa conxunta (con previa filtración á prensa para xa ir facendo camiño), a alcaldesa Inés Rey e o presidente do RC Deportivo, despois de meses de confrontacións, uniron forzas para intentar ofrecer o seu relato de entendemento. Un relato no que unha nova (pero non a prevista para o mundial) reforma do estadio de Riazor intenta agochar a decisión que ninguén quería recoñecer: A Coruña non será sede do Mundial 2030.
Ante unha marea de medios, a alcaldesa acodía arroupada por todo o equipo de goberno e mesmo polo presidente da Deputación, Valentín González Formoso; mentres que o presidente do RC Deportivo e de Abanca, Juan Carlos Escotet facíao con Michelle Escotet e Massimo Benassi. Ambas comitivas enfrontadas no salón de plenos municipal, co grupo socialista na súa habitual posición e a dirección do RC Deportivo na bancada popular, unidas polos medios de comunicación.
Arrincou a alcaldesa cun discurso no que expiicou a renuncia nunha “toma decisións pensando no longo prazo”. “Un evento como o Mundial implica importantes esixencias organizativas e de investimento, en infraestruturas deportivas, mobilidade, alonxamento, seguridade e servizos. Por responsabilidade e con serenidade cremos que era o mellor renunciar a un evento que ía durar uns días”. “Queríamos ser sede do mundial pero non a calquera prezo”.
Rapidamente selou a renuncia coa nova que realmente viñeron a anunciar. “Alcanzamos un acordo co RCDeportivo para mellorar toda a cidade deportiva de Riazor, estadio e pavillón e todas as instalacións deportivas, e para iso ademais contamos co apoio da Deputación”, sinalou abrindo unha “nova etapa de colaboración entre Concello e RC Deportivo”.
O segundo en falar foi o presidente da Deputación, apuntando unicamente que “Riazor é un continente de ilusións para toda a provincia”.
De seguido, Juan Carlos Escotet, deu conta da formalización do acordo de colaboración entre ambas entidades. Obviando os anos que levan enfrontados, asegurando que “a entidade que presido actúa dende hai 120 anos como activo estratéxico na cidade”, apelando á “estabildiade institucional”, e asegurando que “as liñas entre Concello e Deportivo teñen que ir na mesma dirección”, asegurou que “o complexo deportivo de Riazor é un proxecto que iniciamos que pretende evolucionar o estadio e o seu entorno para integralo na vida diaria da cidade, un espazo que xere valor os 365 días do ano”.
Antecedentes e responsabilidades
Pasaron 14 meses dende a última vez que a alcaldesa falou do Mundial, e polo medio a prometida Comisión de Especial apenas tivo tempo para constituirse…
Aínda a semana pasada o Concelleiro de Cultura saía pedindo “tranquilidade”, ao tempo que deixaba caer que hai outros proxectos importantes para a cidade…
Abanca conseguíu que os focos se sitúen sobre o goberno municipal, e a cidadanía dubida se esta decisión é froito da incompetencia municipal ou dos intereses da banca. A quen lle bota a culpa o coruñesismo e o deportivismo desta derrota común?
O club, clave na decisión
A rexedora púxose á disposición dos xornalistas ao remate da rolda de prensa conxunta e deixou claro o papel do club na renuncia ao Mundial, como contamos aquí:
Inés Rey: “Houbo que elixir, e nós escollemos o benestar do club e unha etapa de entendemento mutuo”
Máis novas
Inés Rey asegura que a cidade non periga “en absoluto” como sede do Mundial 2030
