Continúa amosándose o enfrontamento directo entre Xunta e Concellos, neste caso o da Coruña, en relación ao mantemento e rehabilitación dos centros escolares. A fina separación entre responsabilidades dunha e outra administracións (a Xunta é a responsable de rehabilitacións e reformas e os concellos do mantemento) provoca que haia un claro deterioro nos colexios de todo o país.
Nesta confrontación, o Concello herculino vén de dar un paso máis presentando un informe á Xunta onde se detallan todas as necesidades de mellora estrutural da rede de colexios do termo municipal. O concelleiro de Educación, Formación e Innovación Tecnolóxica, Juan Ignacio Borrego, visitou as instalacións da delegación Educación da Xunta para entregarlle o informe, onde se detallan todas as carencias que están a sufrir os centros da cidade debido á falta de investimento do Goberno autonómico.
Neste sentido, Borrego insistiu na esixencia municipal de que a Xunta aprobe un plan de investimento e rehabilitación dos colexios públicos da cidade.
“Nós facemos todo o que está ao noso alcance e mesmo máis cos recursos limitados que temos. Mais necesitamos que a Xunta faga o seu traballo. Que asuma as competencias que son súas. Trátase da educación dos nosos fillos e fillas”, apuntou Borrego, que tamén esixiu a través do escrito a aprobación e execución dun Plan de Rehabilitación Integral dos Colexios na cidade da Coruña que intensifique as actuacións nos 29 centros de primaria (28 CEIPs e o CEE Nosa Señora do Rosario) e trace un camiño claro para modernizar as instalacións da cidade, que teñen unha media de antigüidade de 50 anos.
“O CEIP Curros Enríquez é un edificio dos anos 30 que ten uns problemas de accesibilidade importantes. E é só un dos exemplos das decenas de obras e investimentos das que necesitamos con urxencia que a Xunta se faga cargo. En definitiva, que fagan o seu traballo. O Concello só non pode facer fronte a todo”, engadiu o concelleiro, que tamén lamentou que, máis de 300 obras en centros educativos anunciadas pola Xunta para este verán, non houbese practicamente ningunha en centros de primaria da Coruña.
“O cambio da cuberta do CEIP Sal Lence, unha demanda histórica e moi necesaria, é o único proxecto que a Xunta ten en programación. O resto son pequenas actuacións que non son suficientes para cubrir as necesidades actuais”.
Para tratar de reconducir a situación, o Concello propúxolle á Xunta manter reunións periódicas para trasladar de forma clara e fluída todas as necesidades dos colexios públicos da cidade.
Obras municipais
Aproveita o Concello para anunciar os proxectos que temos en marcha como a reforma do patio e mellora da accesibilidade do CEIP María Pita, a renaturalización do patio do CEIP María Barbeito, a adecuación do patio do CEIP Nosa Señora do Rosario, a reforma do polideportivo do CEIP Ramón de la Sagra, a renovación do parque infantil no CEIP Concepción Arenal, a rampla de acceso do CEIP Cidade Vella ou a última fase da fachada do CEIP Raquel Camacho.
Este ano, o Concello destina 1.749.677 € a investimentos en colexios e 2.713.000 euros á execución do seu plan de mantemento anual, e este verán realizará un total de 45 intervencións en 22 colexios para emendar desperfectos.
Celemin, novo concelleiro
O pleno deste pasado luns viviu a toma de posesión de Jesús Javier Celemín Santos, concelleiro que se incorpora ao Goberno municipal para asumir a área de Infraestruturas. O nomeamento de Celemín supón o seu regreso ao executivo local. No pasado mandato, dirixiu áreas como Educación, Cultura, Memoria Histórica, Innovación, Industria e Emprego. Agora, tras a chegada de Celemín, que pilotará a concellaría de Infraestruturas.
Máis novas
As familias volveron saír á rúa para esixirlle a Xunta un Ensino Público de Calidade
As familias da ANPA do CEIP Prácticas manteñen viva a loita por unha escola digna
