Se ben o 25 coñeceremos o seu programa educativo completo, este xoves 17 ás 13:00h, oo Centro de Arte Fundación María José Jove (FMJJ) (situado no polígono da Grela) inaugura, no marco do CAbe, Rojo.Negro.Azul.Amarillo. Trátase dun novo espazo no que “a arquitectura e o xogo comparten a capacidade de transformar a nosa relación co medio ambiente e abrir novas posibilidades de encontro, aprendizaxe e comunidade.
Este novo espazo, concibido pola arquitecta Ana Ausín e o artista Antonio Ballester Moreno, reconfigura o vestíbulo de entrada ás instalacións da Fundación na Coruña.
A intervención propón unha “transformación sinxela pero significativa dunha pasaxe dentro da sede da Fundación, convertendo unha zona de tránsito nun espazo aberto á exploración e á curiosidade. Pensado para dar cabida a usuarios de diferentes idades, o proxecto incorpora ramplas e cambios de nivel para transformar a arquitectura nunha paisaxe para o movemento”.
Este proxecto continúa unha liña de traballo desenvolvida previamente por Ausín e Ballester Moreno en proxectos como o Espazo Niño de La Casa Encendida (Madrid), deseñado para a primeira infancia. Desta vez, a proposta volve entrelazar a práctica artística, a arquitectura e a educación transformando a estrutura de acceso ao edificio nunha paisaxe que abraza os principios pedagóxicos de Emmi Pikler.
Para presentar publicamente a instalación, este xoves ás 13:00 horas celebrarase unha charla aberta, “Arquitecturas para o xogo”. Entre os participantes estarán Ana Ausín, Antonio Ballester Moreno, Susana González (directora do Centro de Arte FMJJ) e Alba Cacheda (xefa do programa de Educación e Mediación do centro).
A mesa redonda ofrecerá unha visión histórica da evolución dos espazos de xogo, desde as orixes dos primeiros parques infantís modernos ata as prácticas contemporáneas que entenden o espazo como un axente activo de aprendizaxe, invitando á reflexión sobre as dinámicas e as relacións comunitarias que se activan cando o xogo entra en espazos que non estaban orixinalmente destinados a el.
Máis novas
Nace CAbe (Coruña Arte Aberta), a nova fiestra aberta á arte contemporánea galega
