Despois de presentar ao candidato de Podemos, esta fin de semana tocaba coñecer outra das persoas que pelexará por liderar a candidatura unitaria de esquerdas nas eleccións municipais de 2027 na Coruña. Trinidad Palacios presentou este sábado no Centro Cívico Monte Alto a súa candidatura á Alcaldía da Coruña por Movemento Sumar Galicia, nun acto no que defendeu a necesidade de abrir unha nova etapa política e recuperar “a ambición, a vangarda e o carácter progresista da Coruña”.
Palacios iniciou a súa intervención cun breve percorrido pola súa traxectoria persoal e profesional. Coruñesa de nacemento, lembrou a influencia da súa familia e a súa experiencia laboral, primeiro na consultoría e, durante os últimos oito anos, como traballadora sociosanitaria no Servizo de Atención a Domicilio no Fogar da Coruña.
Palacios insistiu en que Movemento Sumar Galicia quere construír unha alternativa propia: “Non vimos para ser a muleta de ninguén. Vimos para gobernar e para ser decisivos en 2027”. Tamén manifestou a súa oposición a un eventual goberno do PP de Miguel Lorenzo con Vox e reivindicou fronte a ese escenario unha cidade “aberta, plural, diversa e tolerante”.
Finalmente, fixo un chamamento ás forzas do espazo progresista, ás persoas independentes, ao tecido asociativo e á sociedade civil para participar na construción dun proxecto común que permita que “A Coruña recupere a súa ambición, a súa capacidade de estar á vangarda e o seu carácter progresista”.
Críticas e propostas
Palacios pregunto se se pode considerar progresista que a alcaldesa incrementase o seu salario un 73 % ao chegar ao goberno. Tamén puxo
sobre a mesa o modelo de aparcadoiros privados, os beneficios da empresa de autobuses e a privatización de servizos esenciais como o SAF ou as escolas infantís.
Entre as propostas do grupo, citou a creación dunha empresa pública de coidados, un parque municipal permanente de alugueiro asequible, avanzar cara a un modelo público de transporte urbano, ampliar BiciCoruña a todos os barrios e revisar desenvolvementos urbanísticos que, ao seu xuízo, non responden ao modelo de cidade que defende.
Pero sobre todo, o Movemento Sumar Galicia reclama ambición en vivenda, así como unha clara aposta polos servizos públicos, os coidados, a mobilidade sostible e un modelo de cidade máis xusto, aberto e ambicioso
No acto, estivo acompañada pol presidenta de Movemento Sumar Galicia e portavoz do Grupo Plurinacional Sumar no Congreso, Verónica Martínez Barbero, por Paulo Carlos López e o candidato de Podemos Aitor Neira, entre outros.
Máis novas
A Candidatura Unitaria de Esquerdas critica os altos prezos dos aparcamentos do CHUAC e o Materno
