Presentou esta mañá o grupo socialista o proxecto de Orzamentos de 2025. A pesar de anunciar o pasado mes de decembro a prórroga do documento do ano pasado, e de que tanto o PP como o BNG teñan deixado claro que non os van aprobar, o grupo de goberno presentou as súas contas.
De feito, o PP xa fixo a súa valoración do proxecto presentado.
A rexedora, rodeada de todo o seu equipo, indicou que presentará a proposta no pleno do vindeiro xoves 6 de febreiro (serán aprobadas na Xunta de Goberno Local de mañá). De non ser aprobada, o grupo de goberno convocaría unha cuestión de confianza. Isto significa que a oposición tería un mes para conformar unha alternativa de goberno, pero se non consegue chegar a un acordo para investir un novo alcalde (vai ser complicado ver ao PP e BNG chegar a un acordo), as contas serían aprobadas automaticamente.
379 millóns de euros
A proposta de Orzamentos Municipais 2025 ascende a 379 millóns de euros, 4 máis que o ano pasado. A rexedora recalcou o carácter “expansivo e progresista” destes orzamentos, “centrados nos barrios” e “configurados en torno a catro grandes eixos”: a dinamización económica a través da tecnoloxía; o reforzo das políticas de benestar social e a protección social; a mobilidade sostible e a recuperación progresiva de espazos público; e os investimentos nos barrios.
Plan de Barrios 2025-2028: rede de Oficinas de Atención Cidadá
O pla conta un investimento total, ata abril do 2027, de 53,7 millóns de euros para os barrios. Unha das medidas será a creación dunha rede de Oficinas de Atención Cidadá, que se irán implantando de xeito gradual ata 2028.
71 millóns de euros en investimentos
A sempre esperada partida de Investimentos conta con accións concretas como a:
- A redacción do proxecto de remodelación do estadio municipal de Riazor (1,5 millóns este ano),
- O mercado de Santa Lucía (3,8 millóns).
- A condicionar as dependencias municipais nas antigas instalacións da Fábrica de Tabacos (4,9M).
- A creación da nova biblioteca municipal de Novo Mesoiro (1,5 millóns).
- Biblioteca e aula dixital de Palavea (700.000 €).
- Apoio aos centros públicos de titularidade municipal (900.000 euros),
- Rehabilitación da Bágoa de San Roque (600.000 euros) .
- Reforma da praza de Pontevedra para mellorar a súa iluminación e ampliar o parque infantil (450.000 euros).
- Humanización e melloras dos espazos públicos (11,1 millóns xa previstos).
- Construíción de novos equipamentos deportivos como as pistas multideporte dos Rosales —xa en marcha—, A Silva e Urbanización Breogán, entre outras.
- Reurbanización da contorna da rolda de Outeiro, (1,5M a través do Proxecto da Rolda dos Barrios de fondos europeos).
A AESIA e o proxecto Coruña Marítima
Dous proxectos estratéxicos como Coruña Marítima e a AESIA tamén teñen partidas.
O proxecto Coruña Marítima conta cunha partida de 700.000 euros en tres anualidades para a elaboración do Máster Plan presentado en María Pita días atrás. A partida correspondente a este exercicio será de 50.000 euros. Serán outros 300.000 no 2026 e outros 350.000 no 2027.
A isto sumarase, proximamente, a posta en marcha das obras de remodelación dos Cantóns entre a praza de Mina e a sede da Autoridade Portuaria, actuación xa adxudicada e que comezará nos vindeiros meses, marcando así o punto de partida da apertura ao porto, e que deberían comezar neste trimestre.
Pola súa parte, hai 4 millóns para rehabilitar a Terraza, en Méndez Núñez, que será a sede definitiva da AESIA. Unhas obras que durarán 3 anos, polo que entre medias, e como emprazamento transitorio ata a conclusión dos traballos, as e os profesionais da Axencia traballarán nas instalacións da Casa Veeduría, edificio do século XV da cidade vella xa rehabilitado.
Mobilidade e espazos urbanos
Entre este ano e o 2030, o Concello prevé levar a cabo un investimento de 1,5 millóns no Plan de Árbores Urbanas, que neste exercicio contará cunha partida específica de 600.000 euros.
A isto sumarase, ademais, 1 de euros que permitirá impulsar actuacións como o parque Ciudad de Monte Martelo e a segunda fase do bosque de Breogán, situado preto de Uxes, Arteixo.
Haberá outro millón para a reforma integral do parque de Santa Margarida e outros 300.000 euros para mellorar o parque Europa.
Ampliarán a Rolda Peonil, que chegará proximamente á Sagrada Familia, conectando así o barrio cos treitos xa humanizados na rúa Ramón Cabanillas.
E haberá 8 millóns de euros para mellorar os parques infantís, e crear algún novo, entre eles, dous cubertos, co obxectivo que “as familias teñan, como mínimo, un parque infantil a dez minutos da súa vivenda”.
O Concello traballará na definición do novo mapa de liñas do transporte urbano, que abrirá camiño á licitación do novo contrato do servizo, prorrogada un ano máis. O obxectivo, indicou a alcaldesa, é que os pregos estén listos este ano.
Para servizo municipal BiciCoruña, prevé acometer ao longo deste ano a nova quenda de ampliación do número de bases, das 49 actuais ás 85 previstas en total.
Máis novas sobre os Orzamentos
O PP lamenta que a proposta de orzamentos para 2025 inclúa a subida de impostos a pesar da baixa execución
PP e BNG insisten en que non apoiarán os orzamentos 2025 tras o órdago de Inés Rey
A Coruña prorroga os orzamentos para 2025 tras non chegar a un acordo PSdeG e BNG
O BNG non apoiará o orzamento de 2025 para a cidade polo “incumprimento” do PSOE de acordos subscritos
O Concello inicia os trámites para aprobar unha taxa turística
