A Coruña é o municipio galego máis caro para vivir. E unha parte seguro que se debe a que 3 de cada 4 vivendas que se ofertan hoxe na Coruña están destinadas exclusivamente ás persoas que visitan a cidade. As chamadas Vivendas de Uso Turístico (VUT) seguen a copar a oferta de alugueiro “grazas á política de barra libre de Inés Rey”, segundo denuncia o grupo da Marea Atlántica, tras analizar os datos do Rexistro de Aloxamentos Turísticos (REAT), actualizados onte mesmo pola Xunta de Galicia.
Xa son 1.372 pisos turísticos a día de hoxe, e o Concello, malia levar ano e medio anunciando unha regulación dos mesmos, segue aprobando novas licencias. Este mes foron unhas 20 as aprobadas (un 1,4% de incremento no último mes), sendo xa un 32% máis que en outubro do ano pasado.
Para a Marea Atlántica, que xa denunciaba a inacción municipal en marzo de 2023, a día de hoxe “xa non hai tempo para escusas”: “a alcaldesa ten que suspender de inmediato a autorización de novos pisos turísticos e dotar o sector dunha regulación da que hoxe carece”.
Encarecimento do alugueiro convencional
Se ben hai outros factores que inflúen en certos barrios da cidade, como a xentrificación, ou a incidenciados altos soldos de empresas xeradoras de emprego como Inditex, Abanca ou Estrella Galicia, para a Marea Atlántica “a proliferación incontrolada de pisos turísticos é unha das principais causas do encarecemento do alugueiro convencional nos últimos anos. Non só porque se reduza a oferta, senón porque se quentan os prezos a consecuencia do diferencial de rendibilidade dos activos inmobiliarios”.
E as cifras son claras: unha vivenda en alugueiro produce hoxe na Coruña, de media e con datos oficiais da Xunta, uns ingresos de 8.000 euros anuais. No mercado turístico esa propiedade xeraría, segundo a principal consultora do sector, case 15.000 euros durante o mesmo período. “A fuga está servida”, sinalan dende o grupo.
Por iso, dende a Marea solicitan unha moratoria durante un ano para que “a Corporación puidese modificar o Plan Xeral de Ordenación Municipal (PXOM) para estabelecer regras onde agora non as hai. A normativa determinaría onde se poderían implantar este tipo de negocios e onde non, protexendo as zonas sensibles ou xa saturadas e poñendo así por diante a garantía do dereito a unha vivenda digna, adecuada e asequible da cidadanía”.
Lembran que en xaneiro de 2023 propuxeron en pleno paralizar a aprobación de licencias, cando na cidade había 713 pisos, a metade que un ano e medio despois.
Con todo, sorprende ver como o goberno pide á Xunta a declaración da cidade como zona tensionada, pero segue sen tomar medidas contra os pisos turísticos.
Taxa turística
Os concellos galegos poderán implantar unha taxa turística a partir do 1 de xaneiro de 2025. Así o anunciou hai pouco o presidente da Xunta de Galicia, até agora contrario a este tipo de tributos, comúns en dous de cada tres países europeos, segundo a European Tourism Association (ETOA).
É o momento de que o goberno da Coruña aproveite a ocasión e se ppoña a traballar para ter a ordenanza lista a tempo, segundo urxe o grupo da Marea Atlántica.
Unha taxa que permitiría que “a pernoctación de visitantes e a chegada de cruceiristas se traduza en novos ingresos cos que financiar políticas públicas e protexer aqueles dereitos que máis acusan a presión
turística, como é o da vivenda”, propoñen dende o grupo municipalista.
O grupo sinala a “barra libre” do goberno socialista cos pisos turísticos como “un dos factores que explica o desorbitado crecemento do prezo dos alugueiros na cidade”.
Máis novas relacionadas
A Coruña, a cidade onde máis subiron os alugueres no primeiro trimestre
Marea Atlántica denuncia ante a Valedora do Pobo “inacción” do goberno local cos pisos turísticos
O goberno local da Coruña avoga por “escoitar a todos os sectores” para regular os pisos turísticos
