Inicio Blog Páxina 423

O reitor da UDC recibe ao alumnado da Cátedra Inditex de Lingua e Cultura Españolas de Daca, en Bangladesh

europapress
-
0
O reitor da UDC recibe ao alumnado da Cátedra Inditex de Lingua e Cultura Españolas de Daca, en Bangladesh

O reitor da Universidade da Coruña (UDC), Xullo Abalde, recibiu a un grupo de estudantes da Cátedra Inditex de Lingua e Cultura Españolas da Universidade de Daca, en Bangladesh.

Ao acto, celebrado este venres no Reitorado da UDC, asistiu tamén a vicerreitora de Internacionalización e Cooperación da UDC, Pilar García de la Torre; así como membros da Cátedra, a súa directora, María José Martínez, o seu subdirector, Evaristo Zas, e a súa coordinadora en Daca, Amparo Porta.

Segundo informa a UDC, o grupo de estudantes está formado por seis alumnos –tres mulleres e tres homes– que obtiveron os mellores resultados nos diplomas DELE, títulos oficiais acreditativos do grao de dominio do español que outorga o Instituto Cervantes en nome do Ministerio de Educación e Formación Profesional de España e para os que a Cátedra está habilitada como “único centro oficial de exames do país”.

A Cátedra de Inditex de Lingua e Cultura Españolas, engade, é o resultado do convenio asinado Inditex e as universidades da Coruña, Santiago de Compostela e Daca. “O obxectivo destes estudos é a promoción da lingua e a cultura españolas en Bangladesh a través de diversas actividades académicas e de difusión cultural”, conclúe o organismo.

O Mercado Templario do Burgo de Faro quece motores

editor
-
0
O Mercado Templario do Burgo de Faro quece motores

Queda menos para a celebración do Mercado Templario do Burgo de Faro, que engalará a vila de Culleredo do xoves 29 de xuño ata o domingo 2 de xullo. Unha festa organizada polo Concello, xa consolidada como elemento dinamizador do municipio atraendo a milleiros de persoas.

Situarase, como é habitual, no paseo do Burgo, nas inmediacións da ponte. O espazo recibirá personaxes e contará con actividades da idade medieval, en conmemoración da época histórica na que a vila foi un referente.

Programa


A inauguración será o xoves ás 17.00 horas, e ás 20.30 horas terá lugar a inauguración oficial. Cada día haberá numerosos espectáculos, segundo a programación da organización: pasacalles, espectáculos de lume, batucadas, humor, e personaxes como zancos, seres mitolóxicos, ou bufóns, entre outras moitas propostas.

Os postos serán variados, dende artesanía ata gastronomía. Para os nenos e nenas haberá cada día un espazo aberto para xogos infantís, obradoiros e atraccións ecolóxicas. E a música será un son común no Mercado.

O_Burgo_Mercado_templario_2023

A Gala do Fútbol da Costa – QPC e a final da #CopadaCosta, a envexa do fútbol modesto galego

Ubaldo Cerqueiro
-
0
A Gala do Fútbol da Costa – QPC e a final da #CopadaCosta, a envexa do fútbol modesto galego

Cando a xente do Fútbol da Costa conta por aí que teñen álbumes de cromos, un carrusel tecnolóxico cos goles en directo, que hai 2 radios, 3 periódicos de papel, non sei cantos dixitais, fotógrafos especializados en promocionalo nas redes seguindo a actualidade, unha Gala de premios, unha final de Copa con 2.500 persoas no campo, ata unha tele chegaron a ter... a xente non o cre.

Porque o Fútbol da Costa engloba 34 clubs da Costa da Morte que compiten nas categorías Preferente, 1ª Galicia, 2ª Galicia e 3ª Galicia, é dicir, as “peores ligas federadas do mundo”, as categorías federadas máis baixas do fútbol amateur Preferente. Máis abaixo non se pode caer.

Pero o Fútbol da Costa é un sentimento, unha paixón. Un axente con vida propia, que como sempre din dende o xornal Quepasanacosta, “trascende o deporte para convertirse nun elemento vertebrador de toda unha dispersa comarca como é a Costa da Morte”.

Esta é a fin de semana máis importante do ano para o Fútbol costeiro. A fin de semana na que se despide a temporada con dúas citas moi especiais, que serven para que a xente se poña cara, para que un de Malpica e un de Muros se vexan, se coñezan, se respecten.

A VIII Gala do Fútbol da Costa – QPC

Publico na Gala do Futbol da COsta 2022 en Malpica
O público adoita encher os auditorios, como o do Centro Cívico de Malpica na Gala do ano pasado celebrada en Malpica

Dende 2014 leva o diario Quepasanacosta realizando estes “Óscars do Fútbol da Costa”. Ao máis puro estilo #BalóndeOuro, e cun completo sistema de votacións nos que participan unhas 80 persoas vinculadas co fútbol (adestradores, capitáns, directivos, xornalistas…), escollen os mellores do ano tanto do fútbol masculino como do FUTFEM. Os Nominados e nominadas pasarán unha noite de San Xoán chea de nervios para ver se poden levar para o seu salón un dos prezados trofeos, xa convertidos en elementos fetiche da comarca: o balón da Olería de Buño feito polas artesás de Feituras.

Este 2023, a VIII edición celébrase o sábado en Corcubión, como homenaxe aos 50 anos do club local.

Balons da Oleria de Buno da Gala do Futbol da Costa
Balóns da Olería de Buño da Gala do Fútbol da Costa

A FINAL DA COPA, A GRAN FESTA

O domingo é hora da doble final da Copa da Costa na Fontenla, en Santa Comba. Pola mañá, ás 12:00h, U.C. Cee e Bergantiños F.C. buscarán alzarse co título da 3ª edición da Copa feminina. Espéranse centos de persoas arroupando a un #FUTFEM que está crecendo de xeito exponencial nestes ano, contando xa con 10 equipos en competición

Pola tarde, a partir das 16:30h, o campo irase enchendo de afeccionados que non queren perder o seu asento na gran festa do fútbol costeiro. Ás 18:00h arrincará o choque entre SD Sofán e CD Baio, ante a presenza dunhas 2.500 persoas, e numerosos medios, incluídos a retransmisión en directo pola Radio Nordés e pola TVG.

 

 

 

O presidente da Deputación da Coruña espera repetir acordo con BNG

europapress
-
0
O presidente da Deputación da Coruña espera repetir acordo con BNG

O presidente en funcións da Deputación da Coruña, Valentín González Formoso, mostrouse este xoves convencido de volver alcanzar un acordo co BNG para repetir coalición na institución provincial, cuxa constitución estima para o 18 de xullo.

A preguntas dos medios tras un acto na Coruña, González Formoso explicou que este mesmo xoves realizarase un “primeiro paso” de cara á constitución do novo goberno provincial, coa votación dos partidos xudiciais, con excepción do do Barbanza.

“A partir de aí, iniciaremos conversacións co socio de goberno habitual, o BNG, e seguro que chegaremos a un acordo para constituír un goberno outra vez estable e que teña como obxectivo claro facer avanzar unha provincia que é o motor económico, social e cultural de Galicia”, dixo Formoso. Así marcou como retos da institución que “ese motor siga funcionando” dentro “dun proceso de modernización” da súa estrutura interna e “dos obxectivos cara a fóra“, en campos estratéxicos como os investimentos, o apoio ao tecido produtivo e a aposta polo “tecido creativo” e do coñecemento.

En canto aos prazos, estimou que, segundo os seus cálculos, a constitución podería ser o 18 de xullo, aínda que a data “aínda non está pechada“.

Pola súa banda, no mesmo acto, a alcaldesa da Coruña, Inés Rey, considerou unha “boa noticia” que vaia a haber de novo “un goberno progresista” na Deputación da Coruña e eloxiou a figura de Valentín González Formoso, “que é un magnífico presidente” e que “apoia, como ten que facer unha institución provincial, a todos os concellos” con “independencia de quen goberna” o municipio.

 

Aproveita… que aínda atopas sardiñas a bo prezo

europapress
-
0
Aproveita… que aínda atopas sardiñas a bo prezo

O quilo de sardiña alcanza un prezo duns 8 euros o quilo nas pescaderías da Praza de Lugo, na Coruña, na mañá deste xoves, o día antes da noite de San Xoán. En declaracións a Europa Press, o responsable de Mariscos Abad, Gonzalo Abad, explica que nesta xornada os prezos son máis ou menos similares a hai un ano, pero prevese que para o venres o quilo suba a entre os 10 e 15 euros.

Tamén na Coruña, Teri Ceán sinala que na súa pescadería a sardiña atópase a entre 7 e 8 euros, mentres que a de tamaño pequeno que “é case ‘parrocha” está a 6 euros. De cara ao 23 de xuño non cre que se vaia “moito máis alá de 10 euros o quilo”.

Igualmente, Alfredo, de Sondomar, confirma o prezo duns 8 euros a 24 horas da noite grande de consumo de sardiña en Galicia, á espera dunha subida o venres. Mentres, en supermercados e grandes áreas comerciais de Galicia o quilo de sardiña podíase atopar a 3,95 euros este 22 de xuño.

UNS 4 EUROS EN LONXA

Pola súa banda, o secretario da asociación de cerqueiros Acerga, Alberto Castro, explica que estes días aumentou o prezo coa aproximación do San Xoán e alcanzáronse os 4 euros o quilo en lonxa este xoves. No entanto, “o que abunda moito é o medianiño”, unha sardiña máis pequena, ao redor dos 0,70 euros por quilo.

Castro lembra que este ano hai un aumento de cantidade ao crecer a cota respecto ao ano anterior, o que levou a unha baixada de prezos durante a campaña, aínda que “esta semana está máis ou menos ao mesmo prezo que o ano pasado”. Apunta que haberá unha subida para a última xornada “en función da demanda”.

Abertos os prazos de inscricións para os obradoiros de verán no Castelo de San Antón e o Castro de Elviña

editor
-
0
Abertos os prazos de inscricións para os obradoiros de verán no Castelo de San Antón e o Castro de Elviña

Xa está aberto o prazo de inscrición nos obradoiros de verán do Castelo de San Antón e do Castro de Elviña.
As actividades, que se levarán a cabo entre o 1 de xullo e o 26 de agosto, sempre os sábados e en horario de mañá, están deseñadas para as nenas e nenos en idade de 6 a 12 anos, permitindo que os máis pequenos se acheguen ao patrimonio e historia do castelo e o castro, implicando a rapazada en talleres de carácter artístico e lúdico.

Cada unha das actividades terá unha duración de hora e media, e disporanse un máximo de 20 prazas por obradoiro. A inscrición previa está habilitada desde hoxe, e a asignación de prazas disporase por orde de chamada ao número de teléfono 981 189 850 (en horario de martes a sábado, de 10.00 a 20.00 horas).

Calendario

O calendario de obradoiros, categorizado por instalación e datas, é o seguinte:

Museo Arqueolóxico do Castelo de San Antón (sempre ás 12.00 horas)

● Sábado 1 de xullo: Mosaicos: pisando arte. Durante a xornada, a rapazada descubrirá de primeira man a arte dos mosaicos, aprendendo as diferentes técnicas para a súa produción e, xa para rematar, cada participante traballará na creación do seu propio mosaico xeométrico.
● Sábado 15 de xullo: Oleiros en San Antón. A cerámica foi un dos grandes avances da prehistoria. Tras coñecer os restos conservados no museo, falarase da decoración e formas para, posteriormente, crear potes castrexos.

● Sábado 22 de xullo: Tecendo na prehistoria. A rapazada achegarase á moda prehistórica e traballará, utilizando un tear, en pulseiras de la.

● Sábado 29 de xullo: Heraldicart. As e os participantes coñecerán polo miúdo o detalle do escudo da Coruña e as súas lendas. Ademais, as e os pequenos
elaborarán e crearán o seu propio escudo heráldico.

● Sábado 12 de agosto: A luz da lucerna. A actividade fala das orixes do lume e a evolución das técnicas para a súa produción. Experimentarase con moldes e arxila para fabricar unha lucerna romana.

● Sábado 19 de agosto: O cofre perdido. Xogo de aventuras no que a rapazada “asaltará” o Castelo para atopar un tesouro perdido. Desta forma, as e os pequenos descubrirán os lugares máis simbólicos da fortaleza.

● Sábado 26 de agosto: Rock Art. As nenas e nenos coñecerán polo miúdo os petróglifos, e traballarán na creación do seu propio.

Castro de Elviña (sempre ás 11.30 horas)

● Sábado 8 de xullo: O tesouro de Elviña. Mediante un xogo de pistas, a rapazada descubrirá o Castro poñéndose na pel do pobo ártabro e, a través de réplicas arqueolóxicas, achegarse á vida na Idade do Ferro.

● Sábado 5 de agosto: Arqueólogos en Elviña. A través dunha escavación simulada, a rapazada coñecerá o traballos das arqueólogas e arqueólogos. Haberá un
percorrido polo xacemento.

Licitadas as obras para a primeira peza do novo CHUAC por 35 millóns de euros

europapress
-
0
Licitadas as obras para a primeira peza do novo CHUAC por 35 millóns de euros

O Consello da Xunta autorizou este xoves a licitación das obras da torre polivalente do novo hospital público da Coruña, que suporán un investimento de case 35,2 millóns de euros.

Esta actuación é a primeira peza do novo complexo hospitalario, que se construirá na parcela sen edificar situada á beira do actual hospital e servirá de nexo entre as actuais instalacións e as novas.

O contrato autorizado este xoves consiste na execución da torre e a previsión de acometer a pasarela, unha vez que se aprobe o proxecto de interese autonómico, previsiblemente a finais de ano (actualmente en tramitación administrativa).

O novo edificio contará cunha superficie de máis de 12.600 metros cadrados en 16 plantas, catro delas baixo rasante, e acollerá áreas de administración, xestión sanitaria, laboratorios, ‘hotel de enfermos’, novo servizo de informática, etc.

O prazo de execución é de 18 meses e disporanse dous accesos para garantir unha mellor funcionalidade: unha entrada para usuarios do ‘hotel’ de pacientes e persoal administrativo, e outra para persoal sanitario. A Xunta tamén prevé licitar “en breve” o contrato de concurso e obra dos accesos, que suporán un investimento estimado de mñas de 25 millóns de euros.

ESTRATEXIA DE ECONOMÍA CIRCULAR DO SERGAS

Por outra banda, o Consello tamén aprobou a Estratexia de Economía Circular do Servizo Galego de Saúde (Sergas), que ten como obxectivo “buscar iniciativas innovadoras que resolvan o impacto que a actividade continuada do Sergas causa ao ambiente”.

A administración autonómica sinalou que o documento ten o propósito de asegurar “a sustentabilidade” do sistema sanitario coa vista posta nunha contorna saudable e equilibrada.

Ademais, a aplicación da economía circular permite aforrar custos, unha maior eficiencia, redución de impacto e de emisións de dióxido de carbono equivalente, entre outras melloras. A estratexia ten un horizonte fixado no 2030 e será “a principal ferramenta para impulsar o cambio dun modelo lineal cara a un circular”.

A Estratexia recolle cinco eixos de actuación: recursos e materias primas, residuos e pegada ambiental, ecodiseño de procesos, I+D+i responsable, e comportamento social.

3 anos de prisión para un veciño acusado de traficar en Cambre durante o toque de queda da COVID

editor
-
0
3 anos de prisión para un veciño acusado de traficar en Cambre durante o toque de queda da COVID

Era 18 de febreiro de 2021, cando a Garda Civil detiña unha persoa que camiñaba á altura do km. 7 da N-550 (por Cambre), quebrantando o toque de queda vixente naquelas datas debido á COVID-19.

Os axentes dábanlle o alto e, ao cachearlle, atopáronlle, nunha mochila que portaba, chisqueiros, pipas, dúas navallas e un cúter, así como unha carteira con 579,92 euros. Os funcionarios tamén rexistraron o vehículo no que se movía e, dentro do forro da súa cazadora, que estaba no asento do copiloto, atoparon pequenas bolsas heroína, cocaína e metadona, que terían un valor no mercado arredor dos 400 euros. “As pesadas exceden do consumo medio diario, aínda considerando unha provisión para varios días, sen que o informe achegado pola defensa aclare a unha efectiva condición de drogodependente, a que substancias depende, pautas ou doses de consumo”, salienta o tribunal no fallo.

Deste xeito, sección primeira da Audiencia Provincial da Coruña condenou a tres anos de cárcere e ao pagamento dunha multa de 500 euros ao home, se ben a resolución non é firme, pois contra ela que cabe presentar recurso.

A Coruña, campo de experimentación da eólica mariña en Galicia

europapress
-
0
A Coruña, campo de experimentación da eólica mariña en Galicia

Repsol e a compañía enerxética norueguesa Orsted asinaron un acordo coa Autoridade Portuaria da Coruña para impulsar o desenvolvemento de proxectos de eólica mariña na costa de Galicia e Portugal.

O convenio foi subscrito nun acto no que participaron o presidente da Autoridade Portuaria, Martín Fernández Prado, o xerente de mercado de eólica mariña en España e Portugal de Orsted, Marianne Hassl, e o responsable de Desenvolvemento de eólica mariña en Repsol, José Partida.

O acordo entre o tres entidades contempla “o desenvolvemento, construción, operación e mantemento de futuros proxectos de eólica mariña flotante” a través do uso “temporal” de infraestruturas do porto exterior da Coruña durante as fases de montaxe e integración dos aeroxeradores, bases flotantes, subestacións, cableado, sistemas de amarre e “demais equipamento necesario para o desenvolvemento do proxecto”.

“Galicia está chamada a converterse nunha rexión chave para a eólica mariña en España e Orsted e Repsol están a dar xa pasos para construír as alianzas adecuadas que garantan que estamos listos para empezar a construír desde o día uno”, sinalou Marianne Hassl.

Repsol e Orsted asinan un acordo co Porto da Coruña para o desenvolvemento de proxectos de eólica mariña / PORTO DA CORUÑA – Arquivo

Pola súa banda, o responsable de éolica mariña de Repsol tamén destacou a potencialidade de Galicia para ser “un hub destacado” no desenvolvemento desta tencoloxía, polo que avogou por “aproveitar as oportunidades que ofrece esta fonte de enerxía”, que a compañía española quere impulsar para alcanzar os 6.000 MW de capacidade instalada renovable en 2025 e 20.000 MW en 2030.

Por último, o presidente da Autoridade Portuaria da Coruña, Martín Fernández Prado, afirmou que o acordo “é moi relevante para o desenvolvemento do Porto Exterior, dado que se trata de dúas compañías líderes no sector enerxético que se suman ao proxecto Green Port”.

Morre o motorista que chocou contra un coche en Bens

europapress
-
0
Morre o motorista que chocou contra un coche en Bens

Un morotista faleceu na cidade da Coruña ao sufrir un accidente cun coche contra o que impactou cando circulaba na zona de Bens.

Segundo informou o CIAE 112 Galicia, o sinistro produciuse na estrada DP-3003 do termo municipal herculina ás 20,45 horas do pasado mércores. Tras recibir a alerta de varios particulares, a central de emerxencias mobilizou a varios efectivos, entre eles, a unha dotación de Urxencias Sanitarias 061.

Desprazados ao lugar, os profesionais sanitarios unicamente puideron corroborar a morte do piloto da motocicleta a consecuencia das feridas sufridas na colisión.

1...422423424...581Page 423 of 581

Xornal da Coruña é o primeiro gran xornal dixital exclusivamente en galego da Coruña e a súa área metropolitana

Contacta: redaccion@xornaldacoruña.gal

SÍGUENOS

© Xornal da Coruña - Xurimaru Servizos de Comunicación 2010 S.L.

QUE É XdC? | AVISO LEGAL | PUBLICIDADE | COOKIES