Os tres administradores da empresa Satdata Telecom, con sede en Culleredo , acusados de estafa e un delito continuado de falsidade de documento mercantil en relación coa venda de 80 dispositivos GPS á Consellería de Medio Rural, ocorrida en 2007, aceptaron penas de entre tres e cinco meses de prisión, no xuízo fixado para este luns na sección primeira da Audiencia Provincial coruñesa.
Fixérono tras un acordo entre a Fiscalía e as defensas ao recoñecer os feitos os procesados e acordarse unha rebaixa da condena polas atenuantes de reparación do dano e dilación indebida que os procesados aceptaron. O Ministerio Público solicitaba, inicialmente, penas de prisión de cinco anos para cada un deles. Os letrados pediron a suspensión das penas de cárcere impostas e a fiscal aceptou a petición. O xuíz acordou a suspensión firme das condenas coa condición de non cometer delitos nun prazo de dous anos.
FEITOS
Os tres empresarios defraudaron máis dun millón de euros ao Banco Espírito Santo mediante o uso dun contrato coñecido como ‘factoring’, un mecanismo polo cal un cliente cede a unha entidade financeira a súa facturación para que esta se encargue de cobrala aos seus acredores e o banco adiántalle ese diñeiro a cambio duns intereses.
En febreiro de 2008, os administradores da mercantil selaron o contrato de ‘factoring’ co banco, cando xa en decembro de 2007 e xaneiro de 2008 cobraran á Xunta as facturas polos seus servizos, que incluían dispositivos GPS para motobombas e mantemento das aplicacións. Por iso, a Fiscalía apunta que, “mediante a confección desa facturación ficticia”, buscouse “facer crer o banco que esta era real”.
