Lanzan hoxe os Bombeiros Comarcais de Galicia un cru comunicado. No marco da súa folga (na que unicamente se negan a cubrir horas extras, pero que está creando verdadeiros problemas na xestión, quedando zonas de Galicia orfas varios días á semana), a súa Representación Sindical acodía onte á Xunta de Galicia para asinar un Protocolo de Colaboración coa finalidade de establecer un marco de diálogo e colaboración en aras a normalizar o funcionamento dos catro consorcios provinciais de Bombeiros.

A parte traballadora, que representa aos 500 bombeiros comarcais de Galicia, xa avisara que “ese protocolo ten que estar consensuado con nos e que a desconvocatoria de folga non se vai producir namentres non haxa avances na negociación do Convenio Colectivo que ten que homoxeneizar as condicións de tódolos Bombeiros de Galicia”. Malia non recibir resposta, acodiron á cita no edificio da Vicepresidencia, onde viron pasar a unha marea de autoridades tanto da Xunta como das Deputacións (todas responsables do Consorcio).

Autoridades que pasaron por diante dos representantes sindicais “dirección a porta de saída cun simple saúdo de despedida, pola nosa parte sentimos que é un desplante e un menosprezo nunca antes presenciado cara a parte traballadora”, lamentan.

Tras preguntar se ían ou non ser recibidos, “a Xunta accede a recibirnos indicándonos que non contaban con nos alí para a reunión, malia estar nós na convocatoria de reunión e aparecendo na firma do Protocolo”.

Protocolo unilateral?

Máis dano fixo a nota de prensa que enviou onte a Xunta sinalando que os bombeiros non queren adherirse a esa firma. “Unha nota que ten a única pretensión de desacreditarnos diante da cidadanía e tapar a ineptitude da Administración para resolver este conflito e demostra a incapacidade de prestar o servizo que teñen encomendado”.

Pero os Bombeiros deixan clara a realidade: “Todo este protocolo que agora presentan non cambia en nada a situación dos Parques nin dos Bombeiros. Teñen a intención de negociar e de darnos algo que xa é noso por lei, que non é outra que a condición de laboral fixo e as condicións que xa deberíamos ter dende fai uns anos atrás e que nos estiveron negando”.

Os problemas

De paso, explican os problemas principais por parte da xestión: “Están xogando a ruleta rusa cos peches de Parques de Bombeiros, que os decreta a Administración polo mal dimensionado que ten o servizo e a precaria situación na que están os seus traballadores. Queren agachar na convocatoria de folga por parte dos traballadores a incapacidade manifesta dos Consorcios para a prestación do Servizo”.

Por todo piden un pouco de autocrítica aos políticos e que solucionen a situación indigna dos traballadores, que teñen que facer ducias de horas extras para manter abertos os parques.