O secretario xeral de Ciudadanos, Adrián Vázquez, visitou este martes A Coruña, onde participou nun encontro con representantes de Ascega, no que estivo acompañado pola presidenta autonómica, Olga Louzao, e o candidato da formación laranxa á Alcaldía da cidade herculina, Manuel Moinelo. Alí, mostrouse convencido de que CS terá un papel “decisivo” na futura corporación do consistorio municipal.
“Os novo Ciudadanos está presente na sociedade coruñesa e estamos convencidos de que o noso papel será decisivo na próxima corporación municipal”, reivindicou.
Para Vázquez, Moinelo representa unha forma de facer política na que “o diálogo e a capacidade para chegar a consensos” son o seu “principal aval”.
“É necesario desbloquear a situación de inmobilismo que a cidade experimenta como consecuencia das guerras partidistas. A política municipal non se pode basear na confrontación”, asegurou o dirixente.
“Somos o único proxecto liberal, de centro e progresista para A Coruña. Non queremos que siga gobernando o PSOE con axuda de nacionalistas ou populistas, e tampouco queremos que a alternativa sexa un PP apoiado por Vox. A tradición liberal desta cidade outórganos unha oportunidade fundamental para construír unha cidade mellor”, continuou.
Pola súa banda, o candidato á alcaldía da Coruña, Manuel Moinelo, destacou a importancia de Ciudadanos no futuro da cidade. “O noso proxecto é máis necesario que nunca. A cidade experimentou ao longo dos últimos anos un retroceso froito da debilidade dun goberno local en minoría condicionado continuamente pola Marea e da incapacidade da alcaldesa para solucionar problemas xa enquistados, como o bloqueo en infraestruturas ou servizos fundamentais como o de recollida de lixo”, afirmou.
Por último, a presidenta autonómica de CS, Olga Louzao, mostrouse satisfeita polo traballo que desde a agrupación coruñesa está a levarse a cabo para “recuperar a ilusión por un proxecto honesto, necesario, diferente, e con moito futuro na Coruña, Galicia e todo o país”.
