Continúa aberto o conflito arredor do Programa de Lecer, que segue sen solventarse e sobre todo, as clases seguen sen comezar. O peor é que parece que durante o mes de marzo tampouco vai haber clase, sumando outro mes sen traballar aos docentes e outro mes sen clase para os máis de 6.000 de usuarios dos cursos culturais do Fórum e do Ágora.
Esta pasada tarde de luns, unha vintena de docentes, cansos de promesas baldías e de 18 días de silencio municipal, pecháronse no Pazo de María Pita, esixindo o comezo das aulas e unha solución á súa situación laboral.
O Concello avanzara a través da prensa que ía ir afrontando os pagos das débedas, pero nada se sabe desa empresa ponte que vai asumir a posta en marcha dos cursos ata a redacción do novo pliego para o novo concurso.
Finalmente conseguiron falar co Concelleiro de Cultura, Gonzalo Castro, o asesor Uxío Novoneira e a presidenta do IMCE Laura Seoane, e se ben non recibiron unha data concreta para o reinicio das aulas, si que lles explicou que tralo cobro de todas as débedas contraídas por Serviplús (que xa está facendo efectivo dende fondos municipais dende o pasado venres, e que poderá durar arredor de dúas semanas) comezará o proceso de contratación dunha empresa para a continuidade do servizo e a subrogación do persoal ata a súa próxima licitación, que fontes municipais esperan que sexa “canto antes”, e para cuia negociación os docentes solicitar ter presenza.
Máis novas do conflito sobre o Programa de Lecer
O Programa de Lecer e as débedas dos docentes, pendentes da vontade da empresa reincidente
O Concello rescata, a medias, aos traballadores do Programa de Lecer do Fórum e do Ágora
