As máquinas levan semanas executando obras de movemento e excavación de terras na parcela P2 do PERI da Maestranza para a construción dun edificio de vivendas de luxo.
O caso é que no expediente da licenza de obras (que entidades como Defensa do Común considera “ilegal” polo “improcedente cambio de cautela arqueolóxica”), outorgada á á empresa Lipromo consta o previo “Proxecto de Control e Seguemento Arqueolóxico-Proxecto de Construcción de Vivendas na Avda. Metrosidero, nº 2-Parcela 2 PERI Maestranza”, debido a que pode afectar a parte do sistema defensivo da cidade.
O expediente obriga a facer un seguemento arqueolóxico a pé de obra por parte dunha persoa arqueóloga con experiencia demostrada. Algo que non lle consta á asociación demandante, que xa remitiu un escrito ao Concello preguntando por este asunto.
Por iso, Defensa do Común solicita que “por parte dos servizos municipais se xire visita de inspección ás obras en curso de execución aos efectos de verificación do cumprimento do Proxecto de Control e Seguemento Arqueolóxico así como das correlativas obrigas da empresa promotora e construtora en relación cos condicionantes da licenza en materia de protección e salvagarda do patrimonio cultural. E mais en concreto, se proceda a verificar in situ se as obras de movemento/excavación de terras contan coa presenza, a pe de obra, dun arqueólogo, realizando as funcións previstas e delimitadas no dito Proxecto de Control”.
Ademais, apuntan que unha vez se analice “o informe do arqueólogo municipal e dos servizos municipais a adopción das medidas cautelares previstas na lexislación do patrimonio cultural, incluíndo, no seu caso, a paralización das obras”.
Máis novas
A paralización da urbanización da Maestranza, “unha vitoria relevante”
