Xosé A. Touriñán e Javier Veiga ofrecerán o día 16 un monólogo solidario no Teatro Colón da Coruña, con entradas á venda a partir deste sábado, ás 11.00 horas. O espectáculo humorístico destinará o recadado á asociación Ecos do Sur, unha ONG en defensa dos dereitos humanos e das persoas migrantes e que desde 1991 axudou a máis de 21.000 persoas para favorecer a súa integración. O evento dará comezo ás 20.00 horas do próximo xoves. As entradas para a función poranse á venda a través de Ataquilla, informa o consistorio.
O “Aquí tamén se fala” leva o meirande premio á Innovación Educativa de Galicia
O premio de maior dotación e prestixio en materia de innovación educativa en Galicia ten acento galego e coruñés. Novo premio para o IES Rafael Dieste polo marabilloso Aquí tamén se fala. Cunha dotación de 10.000 euros, este recoñecemento súmase a outros como o Rosalía de Castro de Lingua da Deputación da Coruña, o do Fórum Europeo do Ensino, o de Innovación da SXL da Xunta de Galicia ou o Mil Primaveras da Comisión de Técnicos/as de Normalización da lingua.
200 centros de ensino, 20.000 estudantes
A iniciativa cultural, que impulsan os profesores Alberto Pombo, Mónica Reigía e Arcadio González, e que no curso pasado contou coa colaboración de Rubén Melide e Andrea Trasancos, converteuse na maior campaña de dinamización da lingua galega da historia, liderada por máis de 20.000 estudantes de 200 centros de ensino de todo o país que exerceron accións reais de dinamización porta a porta por máis de 50.000 espazos públicos e privados.
De Viggo Mortensen ao fútbol profesional
Deseñada para conseguir o impacto viral nas redes sociais, “Aquí tamén se fala” contou con apoios de referentes culturais nacionais e internacionais como Viggo Mortensen, James Rhodes, Tanxugueiras, Fermín Muguruza, Amaia ou Eduardo Sáez de Cabezón, alén de conseguir que os principais clubs deportivos galegos (Deportivo, Celta, Racing, Lugo, Balonmán Cangas, Obradoiro, Breogán, Voleibol Emevé ou Fútbol Sala Burela, entre outros) se sumasen a unha campaña xa histórica.
Rexistrando a banda sonora do país
“Aquí tamén se fala” é tamén unha actividade de formación para o alumnado do IESP Rafael Dieste na que se imparten obradoiros de gravación, edición audiovisual e creación musical con expertos do sector como Tomás Ageitos (Estudios A Ponte), Alberto Castaño (Axencia G) ou Nuno Pico (Grande Amore), e grazas aos que o alumnado leva adiante producións audiovisuais profesionais nas que rexistran actuacións en directo dos principais referentes da música galega actual: Fillas de Cassandra, Xabier Díaz, Antía Muíño, Amancio Prada, Ataque Escampe, Xoan Rubia etc.
#Aquitaménsefala: A BSO do IES Rafael Dieste faise en galego
Festival de música “Aquí tamén se fala”
Aínda, este grupo de estudantes e profesores, conseguiron poñer en marcha o que probablemente sexa o único festival de música profesional organizado dende un instituto público e aberto a toda a cidadanía, que conseguiu congregar na súa primeira edición a preto de 5.000 persoas na praza da Tolerancia da Coruña perante bandas como Grande Amore, Boyanka Kostova, Lontreira ou Leria.
Máis novas do proxecto
O FEAE á innovación educativa, novo premio para a campaña “Aquí tamén se fala”
O proxecto “Aquí tamén se fala” leva un dos Premio Rosalía de Castro de Lingua
Serie de entrevistas lingüisticas
Carmen Pereira, mestra de Primaria: “A rapazada precisa máis contido galego”
Xurxo Souto: “Na Coruña somos un dos lugares con maior número de galegofalantes”
Alas Coruña destaca que a sentenza do caso Samuel “xere conciencia”
O colectivo LGTBI Alas Coruña espera que a sentenza polo asasinato de Samuel Luiz — con penas de entre 24 e 10 anos de cárcere para os catro novos considerados culpables, un como cómplice, xere conciencia para que feitos así non volvan ocorrer.
En declaracións a Europa Press, a súa presidenta, Ana García, rexeita “celebrar as penas impostas” despois de que esta entidade exercese a acusación popular no xuízo. “Falamos de reparación aínda que os anos que pasen non van devolver a vida a Samuel, por iso é díficil valorar as penas”, aseverou.
Ademais, insiste na importancia de falar de reinserción para que cando os condenados saian — tres deles en prisión e pendentes dos recursos que como o caso do cuarto considerado cómplice presenten ou poidan presentar os seus avogados — “se poidan presentar correctamente na nosa sociedade”.
“E teñan acompañamento psicosocial para que sexa así, o sistema penal e de prisións está enfocado a iso á reinserción”, incide para, a colación, remarcar o fallo “minucioso” e “fundamentado” da maxistrada-presidenta no xuízo con Tribunal do Xurado. “É unha sentenza que envía unha mensaxe moi clara, que actos desta gravidade non poden quedar impunes nunha sociedade democrática, que sirva para seguir creando conciencia e traballando para que algo así non volva ocorrer na nosa sociedade”, recalca.
PP e BNG insisten en que non apoiarán os orzamentos 2025 tras o órdago de Inés Rey
O portavoz do goberno local na Coruña e concelleiro de Economía, José Manuel Lage, instou ao BNG e ao PP a ser “responsables” e mostrarse “a favor” dos orzamentos de 2025 que os socialistas levarán a pleno este mes. De non saír adiante — os nacionalistas xa avanzaron que non teñen o seu apoio –, a alcaldesa, Inés Rei, avanzou que se someterá a unha cuestión de confianza.
Así o confirmou ao anunciar que as contas para este ano levarán a unha sesión plenaria este mes e despois da postura anunciada hai uns meses polo BNG ao considerar que o goberno local non conta coa súa “confianza” por non cumprir o acordo de investidura nin tampouco o relativo ás contas de 2024.
E é que o pleno celebrado este xoves volveu a evidenciar as discrepancias entre as distintas formacións políticas. Así, o portavoz municipal de PP, Miguel Lorenzo, denunciou ausencia de negociación por parte dos socialistas en relación ás contas municipais. Dos deste ano, e en liña coa súa exposición en anteriores plenos relativos aos de 2024, asegurou que non foron “negociados” e afirmou que van acompañados de “unha estratexia”. “Se a rexedora perdese a votación da cuestión de confianza, tería que cesar”, unha situación que, na súa opinión, “non se dará” debido a que “o BNG nunca vai apoiar que goberne o PP”. “Xogan vostedes coas cartas marcadas”, dixo respecto diso.
Á súa vez, o portavoz municipal do grupo nacionalista, Francisco Jorquera, lembrou que a súa formación anunciou no seu momento que non negociaría uns novos orzamentos co goberno local tras constatar, remarcou, “incumprimentos” de compromisos contraídos. En canto á postura dos populares, sinalou que “se queixan de ser excluídos cando non mostraron en ningún momento vontade de chegar a acordos”.
Mentres, Lage instou ao PP a facer entrega “das 600 propostas que anunciaron e que ninguén tivo a oportunidade de ver” relacionadas coas contas de 2025 e fixo un chamamento á oposición para a aprobación dos orzamentos.
ASUNTOS DO PLENO
Os distintos posicionamentos expuxéronse nun pleno no que se deu luz verde á aprobación inicial da nova ordenanza que permitirá unificar o regulamento dos centros municipais de empresas habilitados en Agrela e Papagaio. Tamén se debateu unha moción presentada polo PP en demanda dun modificativo urxente para convenios nominativos e investimentos en barrios, finalmente aprobada co apoio tamén do BNG, que considerou “urxente” actuacións nestes últimos. En contraposición, o portavoz do goberno local incidiu en que esta medida é “extemporánea desde o momento que se vai a votar un orzamento”, en alusión ao deste ano.
Ademais, na sesión plenaria aprobouse a supervisión das obras do mercado de Monte Alto; así como “acomodar” o desvío do transporte público de viaxeiros debido ás obras da estación intermodal.
Noutra orde de cousas, apoiouse convocar o Consello de Memoria Democrática “nas próximas semanas” co obxectivo de avanzar na restauración democrática “desde unha perspectiva inclusiva e plural”, segundo indicou o concelleiro da área de Fomento e Promoción da Cidade, Gonzalo Castro, que defendeu que, aínda que non houbese reunións, están a acometerse actuacións.
Un total de 74 anos e medio de cárcere aos catro culpables de asasinar a Samuel Luiz
A Audiencia Provincial da Coruña, de conformidade co veredicto do Tribunal do Xurado, condenou a penas que suman un total de 74 anos e medio de cárcere ao catro persoas declaradas culpables do asasinato de Samuel Luiz, cometido na madrugada do 3 de xullo de 2021 no paseo marítimo coruñés tras unha malleira ao pensar un deles que o estaba gravando cando realmente facía unha videollamada.
En concreto, a Diego M.M., ao concorrer a circunstancia agravante de discriminación por motivos de orientación sexual, a maxistrada presidenta impúxolle 24 anos de cárcere, pena moi próxima ao máximo legal (25 anos), que non lle aplica porque o xurado non apreciou a agravante de ensañamento. Pola súa banda, a Alejandro F.G. condenouno a 20 anos de cárcere, pois explica que a non concorrencia de circunstancias agravantes nin atenuantes determina a imposición da pena na súa metade inferior, o que abarca un arco punitivo que vai de 15 a 20 anos de prisión, do mesmo xeito que no caso de Kaio A.S.C.
A este impúxolle un total de 20 anos e medio (17 anos polo asasinato e tres anos e medio polo roubo con violencia), pois indica que a súa intervención no asasinato “non alcanza a entidade” da de Diego M.M. e Alejandro F.G., de acordo co veredicto do Tribunal do Xurado. A Alejandro M.R. condenouno a 10 anos de cárcere xa que, ao tratarse dun cómplice de asasinato, sinala que procede impor a pena inferior en grao que, neste caso, abarca un arco punitivo de 7 anos e medio a 15 anos de prisión.
RECURSOS DAS DEFENSAS
Avogados da defensa manifestaron que están á espera de estudar con detemento a sentenza pola que se condena aos seus clientes. Os letrados consultados por Europa Press tamén ratificaron tras o veredicto que presentarán recurso ante o TSXG. Luís Manuel Salgado, letrado que exerceu a defensa de Diego M.M., ao que se condena a 24 anos de cárcere por asasinato e agravante de discriminación por orientación sexual e ao que se considera a persoa que iniciou o ataque grupal e que estivo ata o final, manifestou que ten que ver primeiro “a fundamentación” para logo estudar a viabilidade do recurso. “Presentarase se o mesmo é viable”, aseverou.
Pola súa banda, José Ramón Sierra, que levou a defensa de Kaio A.S.C., ao que se lle impón unha pena de 17 anos por asasinato e tres anos e medio por roubo con violencia (o móbil da vítima), afirma que, ao seu xuízo, tiña que estar “absolto”. Destaca, a pesar diso, que recaia sobre o seu cliente “un ano máis da mínima”. Con todo, incide que farán recurso, unha vez analizado o fallo, e que esta parte non estará satisfeita “ata que non teña a absolución”. Manuel Ferreiro, avogado de Alejandro M.R., ao que se condena a 10 anos de cárcere como cómplice de asasinato, insiste na “inocencia” do seu cliente e na “ausencia de proba” para a súa condena motivo polo que, insiste, en que recorrerá á espera, non entanto, de ler con detemento o fallo.
O mesmo recurso avanzou xa David Freire, letrado de Alejandro F.G., ao termo do xuízo por cuestións como non terse en conta as atenuantes de consumo de alcol e drogas. Ao seu cliente, impóñenselle 20 anos de prisión por asasinato. Á súa vez, desde o colectivo LGTBI Alas Coruña, unha das partes personadas, xunto a Fiscalía e avogada da familia e que exerceu a acusación popular, inciden en que farán unha valoración unha vez que a analicen.
A alcaldesa da Coruña someterase a unha cuestión de confianza se o orzamento de 2025 non conta con apoios
O goberno local da Coruña levará a pleno a finais deste mes de xaneiro os orzamentos para 2025 que incluirán os “recursos necesarios para facer fronte a investimentos, servizos e convenios nominativos”. De non saír adiante, a rexedora, a socialista Inés Rey, avanzou que se someterá a unha cuestión de confianza. Así o anunciou a alcaldesa quen fixo un chamamento ao resto de partidos “a sumar, a achegar e non a restar”. “Se non están á altura seguiremos cara adiante para facer que esta cidade non sufra parón algún”, explicou. Ademais, engadiu que “se o resto dos grupos non queren sumarse e achegar” recorrerá a unha cuestión de confianza. “É momento de avanzar e dar este mes a oportunidade de mostrar se apostan pola cidade ou por intereses partidistas”, recalcou.
A cuestión (ou moción) de confianza é un mecanismo que recolle a Lei Orgánica do Réxime Electoral (Loreg), unha medida excepcional que para ser invocada o PSOE debe levar a pleno as contas e fracasar no seu intento de aprobación. Se a rexedora perdese unha votación desta cuestión de confianza, tería que cesar e a oposición estaría chamada a formar un goberno no prazo dun mes. De non facelo nese período, os orzamentos que o pleno non apoiou entrarían en vigor de forma automática e a rexedora regresaría ao seu posto. Respecto das contas que levarán a pleno a finais de xaneiro, Rey destacou o seu “contido eminentemente social”. “Reunirán os compromisos adquiridos en diversas intervencións interadministrativas desde o Novo Chuac ata a estación intermodal”, detallou.
O BNG REITERA QUE INÉS REY “NON TEN A CONFIANZA” DO PARTIDO
Pola súa banda, o grupo municipal do BNG no Concello da Coruña reiterou que “neste momento” o goberno local, liderado pola socialista Inés Rey, “non ten a confianza” do partido. “Por iso é polo que no seu día anunciábamos que non negociariamos uns novos orzamentos”, lembra. Así, nun comunicado, o BNG indica que considera unha “opción lexítima” a presentación por parte do goberno local dun proxecto de orzamentos vinculada a unha cuestión de confianza. Non entanto, insiste que “neste momento” o goberno local non conta coa “confianza” deste partido “tras constatar os múltiples incumprimentos de compromisos contraídos co BNG”, sinala sobre os incluídos no Acordo de Investidura e no de Orzamentos de 2024.
PRIORIDADES EN 2025
A alcaldesa fixo estas declaracións na rolda de prensa convocada para relatar os asuntos aprobados na Xunta de Goberno celebrada este mércores e tras sinalar as “prioridades” de cara ao 2025 do goberno local. Entre elas, citou dar resposta ao problema da vivenda, avanzar na transformación urbana da cidade e levar a cabo un “ambicioso” plan para os barrios.
Ademais, asegurou que se abordarán “retos fundamentais” como a posta marcha da Axencia Estatal de Supervisión da Intelixencia Artificial (Aesia) “de forma efectiva”, a adecuación do estadio de Riazor e da propia cidade para acoller o Mundial 2030, así como a definición do proxecto Coruña Marítima.
En canto á Xunta de Goberno, aprobou, entre outros asuntos, a concesión da licenza á Axencia Estatal de Administración Tributaria para a substitución da fachada do edificio que alberga a sede da súa delegación na Coruña. “Teñen seis meses para iniciar as obras e 20 para a súa execución, con máis de catro millóns de euros”, indicou a rexedora res
Intervidos case 5.000 xoguetes “inseguros e perigosos” en varios establecementos da comarca da Coruña
A Patrulla Fiscal e Fronteiras (Pafif) da Coruña, en colaboración co Destacamento Fiscal e Fronteiras do Porto, interveu un total de 4.626 xoguetes considerados “inseguros e perigosos”, 2.046 artigos pirotécnicos e catro pistolas (carabinas e pistolas accionadas por aire ou outro gas comprimido non asimiladas a escopetas), en diversos establecementos da comarca da Coruña.
Nun comunicado, o instituto armado explicou que os obxectos foron detectados durante as inspeccións realizadas con motivo da campaña de Nadal para velar pola seguridade dos xoguetes.
Segundo detallou a Garda Civil, as pezas intervidas supuñan un “grave risco” para os usuarios ao carecer dos controis de seguridade e etiquetaxe establecida, estar fabricados con materiais de escasa ou dubidosa calidade e carecer parte deles da marcado CE e dos datos do importador ou fabricante.
En concreto, realizáronse un total de 12 inspeccións coordinadas co obxectivo de garantir a seguridade dos produtos comercializados e o cumprimento da normativa fiscal. Por estes motivos foron levantadas 11 actas denuncia por supostas infraccións da normativa sobre a seguridade nos xoguetes –Real Decreto 1205/2011– e cinco por supostas infraccións da Lei 12/1995 de reprensión do contrabando.
Ademais, rexistráronse catro denuncias no marco da Lei 4/2015 de protección da seguridade cidadá e unha por supostamente infrinxir a Lei 2/2012 de protección das persoas consumidoras e usuarias de Galicia.
O temporal deixa moito vento, casas alagadas e rescates
O temporal deixou un total de 65 incidencias en Galicia na mañá deste mércores, principalmente na provincia da Coruña (47), seguida de Pontevedra (17) e tamén una en Lugo, segundo datos do 112 Galicia. Nunha xornada con diferentes alertas laranxas e amarelas por choiva e vento, o municipio con máis incidencias foi Santiago, cun total de 10, seguido de Brión, Oleiros, Ames e Vigo, con tres en cada caso.
Ata o momento, as incidencias máis repetidas teñen que ver coa presenza de ramas ou árbores nas vías de comunicación (27) e coa choiva, que está a provocar problemas en vivendas (catro inundacións rexistradas ata o momento) e estradas (17 obxectos ou restos de accidentes e dúas inundacións).
Entre as incidencias destacadas, o GES de Brión explicou que na súa zona estaban a actuar nunha vintena de vivendas alagadas. Pouco antes das 8,00 horas un particular avisou de dous ríos desbordados en leste mesmo concello.
Ademais, a parte baixa do centro compostelán Divino Maestro, na rúa de Branco Nájera, alagouse, polo que os nenos tiveron que volver a casa. O aviso chegou ás 7,50 horas a través dun particular, e no operativo participaron os Bombeiros e a Policía Local.
Tamén en Santiago rexistráronse varios avisos por inundacións en estradas. Na vía Edison, diversos particulares explicaron sobre as 7,45 horas que estaban encima dos seus vehículos porque a altura da auga era considerable, o que obrigou a intervir aos bombeiros municipais. Tamén houbo problemas na rotonda do Vieiro, no barrio de Fontiñas, entre outros sitios na capital de Galicia.
COCHE ARRASTRADO
Por outra banda, en Lousame, unha muller tivo que ser rescatada do seu vehículo polo GES de Boiro: un río desbordado provocou que o coche fora arrastrado pola corrente ao longo dunha pista forestal do lugar de Cernande, en Tállara. A implicada atópase en bo estado.
En Vigo, un particular alertaba dez minutos antes das 9,00 horas de que se atopaba atrapado pola auga dentro do seu portal, na rúa Areal. Era incapaz de saír ao exterior pola forza da corrente, que estaba a empezar a alagar o interior do edificio. Desde o 112 Galicia alertouse aos Bombeiros de Vigo.
En canto a accidentes de tráfico, un coche chocou contra unha árbore que se atopaba na estrada na AG-55 ao seu paso por Gándara, municipio de Zas, e acabou dando varias voltas de campá. Ocorreu minutos antes das 8,00 horas. Neste operativo participan 061 e a Garda Civil de Tráfico, así como os servizos de mantemento da estrada.
En canto aos concellos máis afectados, neste momento Santiago é o que conta con máis avisos activos, sobre todo por inundacións en estradas, baixos e vivendas. Outros avisos por vías alagadas chegan desde os concellos de Ribeira, Carballo, Moaña, Vigo ou Noia.
TEMPORAL
A Xunta activou a alerta laranxa por vento no oeste da provincia da Coruña, ademais de manter o nivel de aviso tamén laranxa por temporal costeiro tanto na Coruña como en Pontevedra.
Durante esta mañá, Galicia rexistrou ventos de máis de 150 quilómetros por hora. En concreto, o valor máximo, segundo Meteogalicia, contabilizouse en Penedo do Galo, en Viveiro, con 152,1 km/h ás 07.20 horas deste mércores.
Tamén na Gándara, en Vimianzo, rexistráronse refachos de vendo de 141 quilómetros por hora ás 06.30 horas e na cidade da Coruña, de case 130 km/h. En Cuntis e en Oia superáronse o 120 km/h.
Pola súa banda, en Rois acumuláronse ata 71,5 litros de choiva por metro cadrado. En canto a temperaturas, en Ribadeo chegouse aos 17,8 graos ás 07.50 horas, sendo a máxima no que vai de día, mentres que a mínima alcanzouna A Veiga ás 08.00 horas, con 2,4 graos.
Meteogalicia espera un mediodía e unha tarde “algo máis tranquila” tras o paso da fronte, aínda que os refachos de vento seguirán sendo fortes no norte das provincias da Coruña e de Lugo e en zonas altas.
Atrasado máis de 6 horas un avión de enlace entre A Coruña e Madrid pola revisión tras chocar cunha ave
A revisión á que tivo que ser sometido un avión de Air Europa este mércores no aeroporto coruñés de Alvedro obrigou a atrasar máis de seis horas a súa saída. Fontes de Aena confirmaron que o voo que debía partir da Coruña ás 12.30 horas deste mércores sufriu un atraso. A saída foise aprazando ao longo da xornada e actualmente está fixada para preto das 19.00 horas. O motivo, segundo comentaron fontes próximas a Europa Press, foi unha incidencia sufrida polo avión no traxecto da capital española á Coruña, cando puido chocar contra unha ave. Esta circunstancia non afectou en nada á aterraxe da aeronave, pero a compañía estimou necesario realizar unha revisión da mesma que obrigou a atrasar o regreso.
En liberdade con retirada de pasaporte os donos de A&M Tours, a axencia de viaxes da Coruña acusada de estafar a un cento de migrantes
Os donos dunha axencia de viaxes da Coruña, unha parella, detida por presunta estafa na venda de billetes de avión, quedaron en liberdade con retirada do pasaporte, segundo informaron a Europa Press fontes do Tribunal Superior de Xustiza de Galicia (TSXG). Ademais, a nivel xudicial, prohibíuselles saír de España e fixáronse comparecencias xudiciais ante o xulgado, precisaron tamén sobre este caso.
A medida adóptase despois de que o pasado 19 de decembro o maxistrado do Xulgado de Instrución número 5 da Coruña, en funcións de garda, decretase o ingreso en prisión provisional do dono da axencia de viaxes A&M Tours e da súa parella, detida con posterioridade por ser a titular do CIF da citada axencia.
A ambos arrestóuselles despois de que un cento de persoas presentase denuncia por estafa na venda de billetes de avión. Os afectados son persoas que emigraron a España e que pretendían viaxar nestas datas aos seus respectivos países. Ao tratar de voar, atopáronse que, aínda que tiñan un papel garantindo a reserva despois de abonar a correspondente contía, as súas pasaxes non foran emitidas.
