Páxina 214 – Xornal da Coruña – Noticias da Coruña e área Metropolitana

“O Xerente da Área Sanitaria non sabe falar c@s traballador@s”

-

7 Febreiro, 2025

“O Xerente da Área Sanitaria non sabe falar c@s traballador@s”

Aínda soan os ecos da manifestación realizada este pasado xoves 6 de febreiro no CHUAC, en apoio ao enfermeiro e garda agredidos o pasado luns, e para esixir medidas de seguridade para todas/os as/os profesionais.

Durante a concentración, segundo denuncia a Comisión de Centro do CHUAC, “o Xerente non saíu a falar cos/as traballadores/as pese a ser requirido”.

Como xa contamos o outro día, a situación agrávase ao comprobar que Luís Verde contaba cun dispositivo especial das forzas da orde pública (UIP) así coma reforzo de 3 gardas de seguridade para impedir o acceso ó seu despacho.

“O dispositivo”, mesmo con antidisturbios, “foi desproporcionado e non respondía ó transcorrer desta manifestación, as/os profesionais foron extremadamente respectuosas/os, so querían explicacións e solucións do máximo responsable da área sanitaria”, explican dende a Comisión.

De feito, durante a manifestación cando as traballadoras estaban concentradas diante do edificio da Xerencia, “un integrante das forzas da orde emprendeu un carga que acabou nunha lesión a unha compañeira que requiriu atención urxente”.

A Comisión de Centro condena todo acto de violencia, e lembra que “a responsabilidade da Xerencia é garantir a seguridade en toda a área sanitaria para evitar que doentes e profesionais sufran agresións”.

“Por un entorno seguro no traballo”, reivindican os profesionais

Máis novas

O colectivo sanitario sae á rúa para esixir “un traballo seguro”

Un paciente agride cunha arma branca a un enfermeiro e un garda de seguridade no complexo hospitalario da Coruña

Galicia celebra o Día dos Medios en Galego lembrando o nacemento da primeira publicación en galego

CULTURA

editor

-

7 Febreiro, 2025

0

Galicia celebra o Día dos Medios en Galego lembrando o nacemento da primeira publicación en galego

Un 7 de febreiro de 1876, Valentín Lamas Carbajal editaba en Ourense O Tío Marcos da Portela. Pode que sexa a primeira publicación monolingüe en galego, e de aí que a Asociación de Medios en Galego decidise instaurar o Día dos Medios en Galego o 7 de febreiro. Unha data aprobada no Parlamento Galego con unanimidade de todos os partidos.

Hoxe mesmo, venres 7 de febreiro, a AMEGA celebra a data cun concerto no Playa Club da Coruña, baixo o lema “A Lingua que nos une”.

Toda a información sobre AMEGA en mediosengalego.gal, e as entradas (7€) para o concerto están á venda en entradium.com.

100 medidas para o galego

Outra das iniciativas que pon en marcha este ano AMEGA co motivo da celebración do Día dos Medios en Galego é a elaboración de 100 medidas para mellorar a situación do galego. A partir do 7 de febreiro estará habilitada a páxina web medidas.gal, a través da que se convidará á cidadanía a facer as súas aportacións.

Co gallo da celebración deste ano do Día dos Medios en Galego, o Colexio Profesional de Xornalistas de Galicia quere expresar a súa preocupación polos datos recentes sobre o uso do galego e reclama medidas valentes de normalización para garantir que os medios cumpran co papel que lles corresponde no mantemento desta lingua, así como unha aposta polo xornalismo de proximidade.

Para a entidade resulta “inevitábel facer referencia aos datos publicados recentemente polo Instituto Galego de Estatística sobre o uso da lingua”, na que se refrenda que por primeira vez na historia “o galego xa non é a lingua predominante en Galicia e o seu coñecemento e comprensión está claramente a recuar”.

O Colexio de Xornalistas lembra o “papel fundamental” dos medios

Perante estes datos, a Xunta de Goberno do Colexio Profesional de Xornalistas de Galicia lembra que “o xornalismo en galego ten tamén un papel fundamental para a supervivencia da lingua“.

De feito, as devanditas cifras vólvense aínda máis preocupantes cando ollamos o consumo de medios: o 55,38% da poboación só le prensa en castelán, o 43,74% só escoita a radio en castelán e o 34,41% só ve a televisión en castelán.
Se sumamos os datos daquelas persoas que din consumir os medios máis en castelán que en galego, as porcentaxes soben até o 95,46%, 84,87% e 81,42%, respectivamente.

“Estes datos, con todo, non poden sorprendernos nun ecosistema mediático que, contra a realidade histórica de Galicia, tense desenvolvido de maneira moi maioritaria en castelán”, recoñece a entidade. “Para que os medios de comunicación galegos se parezan máis lingüisticamente á sociedade que queren reflectir, son necesarias políticas valentes que regulen dunha maneira efectiva as axudas, e mesmo a concesión de publicidade institucional, para potenciar que o xornalismo en galego sexa unha realidade e non só unha anécdota entre as páxinas e minutos de información en castelán”.

Lembran ademais que “o desenvolvemento da información en galego está tamén ligado á información de proximidade, un tipo esencial de xornalismo que periga ante os recortes e as distintas crises no sector da comunicación”. “A identificación que boa parte da sociedade galega fai da lingua coa súa contorna máis próxima facilita que a información local sexa non só un espazo máis propicio senón até favorecedor para o uso do galego”. Por iso, piden “potenciar os medios locais, as delegacións e o emprego de xornalistas nas cidades e vilas é tamén unha maneira de loitar polo mantemento da lingua”.

AMEGA

A Asociación está formada por unha corentena de medios, entre os que estamos o Xornal da Coruña, os curmáns Xornal de Bueu, Xornal da Baruña, Lugo Xornal, e os membros fundadores Quepasanacosta e Galicia Confidencial. Ademais, tamén está formada por outros medios xeneralistas como as emisoras municipais, Nós Diario, Nós TV, ou por medios específicos como a Revista Pincha, Mazarelos, Tempos Novos…

Pero a entidade sempre quere promover a existencia de máis de 140 medios en galego, que espallan a nosa lingua a través da comunicación.

Máis novas

AMEGA celebra o Día dos Medios en Galego cun concerto na Coruña de Leria e a Banda da Loba

De Ninghures e Fillas de Cassandra trouxeron a festa dos medios en galego á Coruña

Guadi Galego e as Tanxugueiras lanzan o seu “Inconformismo”

CULTURA

Ubaldo Cerqueiro

-

7 Febreiro, 2025

0

Guadi Galego e as Tanxugueiras lanzan o seu “Inconformismo”

Guadi Galego e as Tanxugueiras, trío galego formado por Sabela Maneiro, Aida Tarrío e Olaia Maneiro, acaban de lanzar hoxe, 7 de febreiro, a canción Inconformismo. Un tema que reivindica a necesidade de construír un mundo máis xusto.

Á saída deste novo tema únese o anuncio do concerto de fin de xira de “Síntese Horizonte”, o espectáculo co que a de Cedeira se presentou ao vivo no último ano, e que se pechará na Sala Capitol o próximo 25 de outubro. As entradas xa están á venda en salacapitol.com.

Máis novas

AMEGA celebra o Día dos Medios en Galego cun concerto na Coruña de Leria e a Banda da Loba

Xa nas plataformas o novo sinxelo de De Ninghures

Xa nas plataformas o novo sinxelo de De Ninghures

CULTURA

Ubaldo Cerqueiro

-

7 Febreiro, 2025

0

Xa nas plataformas o novo sinxelo de De Ninghures

Hoxe, que se celebra o Día dos Medios en Galego co concerto no Playa de Leria e A Banda da Loba, outra das bandas revelación da escena galega dos últimos anos presenta novo sinxelo. ‘En fin, que máis dá’ é o último avance de ‘Feira’, un tema producido por Juan de Dios Martín que conta coa participación de Xoel López como guitarrista. Unha sorte de canto á vida e á amizade, “unha viaxe para gozar” e que se inspira no Tishoumaren (Desert Blues) e no pobo Tuareg.

O grupo nado arredor entre Compostela e a Foliada da Fonsagrada, pero tamén con membros de Bergantiños, vendeu en menos dunha semana máis do 50% das entradas dispoñibles para o concerto de presentación de ‘Feira’ na Sala Capitol, que terá lugar o 13 de marzo

Xa tendes o sinxelo en todas as plataformas.

Máis novas

AMEGA celebra o Día dos Medios en Galego cun concerto na Coruña de Leria e a Banda da Loba

The Guitar Lab, o músico coruñés Ton Eirín rescata instrumentos

Pepe Cunha, 25 anos á fronte do mellor programa de música galega contemporánea, “Ábrete de Orellas”

Amoebo lanza “Unha foto”, o seu novo sinxelo

The Guitar Lab, o músico coruñés Ton Eirín rescata instrumentos

CULTURA

Ubaldo Cerqueiro

-

7 Febreiro, 2025

0

The Guitar Lab, o músico coruñés Ton Eirín rescata instrumentos

Que fan os músicos e aprendices da cidade cando unha guitarra ou un baixo se medio escaralla? Pois a loita contra a obsolecencia programada no eido da música rematou na cidade.

“Como músico, decateime de que faltaba un bo servizo na cidade para os instrumentos de corda, sobre todo as guitarras eléctricas e os baixos, pero non só eses. Detectei a necesidade e a demanda dun servizo profesional, que ía máis alá dos axustes ou reparacións básicas que pode facer un afeccionado ou unha tenda de música”. Así explica Toni Eirín, técnico de son e vocalista da banda coruñesa EXIT, a orixe de The Guitar Lab., un servizo de axuste, reparación e modificación de instrumentos de corda que comezou a dar forma a mediados do ano pasado e que xa está plenamente operativo, con encargos de distintos puntos de Galicia.

Aposta profesional para seguir vivindo do mundo da música do frontman da banda residente máis mítica da última década na Sala Mardigrass. Con máis de dúas décadas de experiencia como guitarrista e cantante, pero tamén como técnico de son titulado, e co trasfondo de ter traballado en tendas de música, estudos de gravación, dobraxe e produción musical, ademais de en escena e moita autoformación, Eirín tamén destaca o seu interese por campos como a acústica, a electricidade e a electrónica e a súa experiencia profesional cunha oferta de traballo máis que precisa de 25 anos con multitude de profesionais da música. “Ese contacto e ese coñecemento, onde conflúen artesanía e técnica, axúdanche a saber non só o que precisa o instrumento, senón tamén o que quere a xente, e iso é moi importante. A persoa que toca apreciará que a súa guitarra sexa moi cómoda, que teña cordas máis baixas, que vibre máis ou que vibre menos…”, exemplifica.

Para conseguilo, Eirín confía na súa experiencia, pero tamén en ferramentas e tecnoloxía de punta porque, segundo sinala, a pesar de que o traballo que realiza é “artesanal e moi manual”, este equipo permítelle operar con precisión milimétrica e tomar medidas para que o resultado sexa “o que ten que ser”. “Os equipos empregados nestes campos evolucionaron moito nos últimos anos e intento estar ao día destas novidades para ofrecer os mellores resultados”, observa.

Con cita previa

The Guitar Lab funciona con cita previa, que se pode concertar a través do correo electrónico ou WhatsApp dispoñible na súa páxina web, theguitarlab.es, ou na súa conta de Instagram @the.guitarlab. Esta fórmula permite unha maior axilidade e fluidez no servizo, que ten un prazo medio de entrega de tres días, ao dar a posibilidade de realizar unha consulta inicial rápida a través deste medio telemático sobre o tipo de intervención que requirirá o instrumento.

Arranxo e personalización

Hoxe en día, o catálogo abarca desde axustes para un correcto mantemento do baixo ou da guitarra ata reparacións e modificacións que impliquen traballos combinados de carpintería, luthiería e electrónica.
Ademais, nos próximos meses ampliará a súa oferta para incluír instrumentos de pintura, que permitirán personalizar o seu baixo ou guitarra e adaptalo aos seus gustos persoais ou facer que pareza instrumentos emblemáticos, e a ‘reliquia’. Esta técnica, ofrecida por grandes marcas como Fender e Gibson, implica modificacións feitas a man para simular o envellecemento natural das pezas, co obxectivo de darlles un aspecto clásico ou antigo. “Este servizo, que pode chamar a atención dun público profano, é unha tendencia que existe desde hai anos no mundo das guitarras e que ten moita demanda”, subliña Eirín.

Compañeiros renden homenaxe ao exsecretario comarcal de UXT José Carrillo, un “sindicalista de raza”

SOCIEDADE

europapress

-

7 Febreiro, 2025

0

Compañeiros renden homenaxe ao exsecretario comarcal de UXT José Carrillo, un “sindicalista de raza”

Compañeiros sindicalistas, xunto a autoridades, renderon este venres unha homenaxe ao que desde 1992 ata 2020 foi secretario comarcal de UXT na Coruña, José Carrillo, ao que definiron como “un exemplo de sindicalista de raza”.

Foi nun acto con presenza, entre outros responsables políticos, do delegado do Goberno en Galicia, Pedro Branco; a subdelegada, María Rivas, e a alcaldesa da Coruña, Inés Rey, pero tamén de exdirigentes e actuais membros do sindicato.

Entre eles, estivo o secretario xeral de UXT Galicia, José Antonio Gómez, quen definiu a Carrillo como “un digno herdeiro de Pablo Iglesias” e destacou a súa vontade de chegar a acordos en en cuestións vinculadas ao ámbito sindical.

O homenaxeado, á súa vez, insistiu na necesidade de seguir defendo “dereitos”. “Non hai nada conquistado”, aseverou para incidir tamén na importancia de afiliarse. Pola súa banda, o delegado do Goberno definiuno como “unha figura fundamental para entender o sindicalismo” na Coruña e en Galicia.

Natural de Arzúa (A Coruña), Carrillo empezou a traballar como dependente de comercio para na década dos 70 ter os seus primeiros contactos co mundo laboral e sindical. En 1979 afíliase ao PSOE e a UXT, participando nas primeiras eleccións sindicais en democracia. En 1983 entrou a traballar na Fábrica de Armas da Coruña, incrementando a súa representación sindical ata que foi elixido secretario comarcal.

O Pleno tamén aproba a Ordenanza para regular as Vivendas de Uso Turístico

editor

-

6 Febreiro, 2025

0

O Pleno tamén aproba a Ordenanza para regular as Vivendas de Uso Turístico

Ademais do rexeitamento da proposta dos Orzamentos 2025 e a convocatoria por parte do goberno socialista dunha cuestión de confianza, o pleno desta mañá de xoves 6 de febreiro si sacou adiante, cos votos aa favor de PSOE e BNG, a ordenanza das VUT para regular o
sector e aumentar a oferta de vivendas en alugueiro.

O concelleiro Francisco Díaz Gallego subliñou a necesidade da entrada en vigor desta normativa, argumentando que as VUT “repercuten na cidade en aspectos como o acceso a vivenda, reducindo o parque de alugueiro, incrementando tamén os seus custos”, ademais das dificultades de compatibilizar as VUT cos usos residenciais, tanto polos conflictos que poden xurdir entre as persoas de paso e a veciñanza como á hora de costear os servizos públicos que presta a cidade.

Díaz Gallego fixo fincapé na importancia de “frear o proceso de xentrificación do parque de vivendas residencial” . “A ordenanza VUT non é a solución única, mais é unha peza do puzzle que é preciso activar”, lembrando que seguen traballando na declaración de Zona de Mercado Residencial Tensionado.

O PP amosou a súas disconformidade con esta ordenanza, argumentando que “non é o problema que ten o sector na cidade” e que a medida vai favorecer aos grandes tenedores e perxudicar aos pequenos propietarios.

A ordenanza

As VUT non poderán estar situadas nunha planta inmediata superior a unha vivenda de uso residencial.
Si se permitirá o seu emprazamento en plantas primeiras ou baixas, atendendo, iso si, ás especificidades do Plan xeral en ámbitos como o PEPRI, e tamén se permitirá implantar as VUT en edificios destinados a este tipo de usos en exclusiva.

O Concello concederá un prazo de tres meses desde a entrada en vigor da ordenanza para que as persoas titulares de inmobles VUT poñan en orde ou obteñan a súa habilitación administrativa. No caso de que non cumpran coa normativa municipal marcada no texto desta ordenanza VUT, terán que dalos de baixa no Rexistro da Xunta.

A ordenanza pasará agora ao trámite de exposición pública antes de volver ao pleno para a

Máis novas

3 de cada 4 vivendas que se ofertan na Coruña xa son de uso turístico

Inés Rey someterase a unha cuestión de confianza vinculada aos Orzamentos tras saír rexeitados do pleno

A ordenanza que regulará as vivendas de uso turístico deixará a máis de 1.500 pisos en situación irregular

A Coruña cumple cos requisitos para a declaración de Zona de Mercado Residencial Tensionado

As 10 promocións urbanísticas formuladas na Coruña prevén a construción de 18.000 novas vivendas

Denuncian unha marea de pingueiras que asolagan o Hospital Marítimo de Oza “dende hai anos”

BARRIOS

Ubaldo Cerqueiro

-

6 Febreiro, 2025

0

Denuncian unha marea de pingueiras que asolagan o Hospital Marítimo de Oza “dende hai anos”

Persoal do Hospital Marítimo de Oza, dependente do Complexo Hospitalario Universitario da Coruña (CHUAC), denuncia os problemas de filtracións que presenta o edificio dende hai anos e que provoca a presenza constante de goteiras durante os meses de chuvias.

Segundo explican os profesionais, “o problema afecta á estrutura anexa ao edificio principal, na que se sitúa a área de rehabilitación e fisioterapia. Este inmoble ten un tellado plano, a xeito de azotea, onde durante o inverno, entre novembro e marzo ou abril, se acumula a auga da chuvia, formando unha auténtica piscina. Esta auga posteriormente fíltrase a través da estrutura de formigón, que presenta problemas de illamento e de impermeabilización”.

A auga cae en forma de goteiras dentro das áreas de traballo de fisioterapia, nas zonas de consulta e xestión, as zonas de tránsito dos pacientes e a sala de espera. As acumulacións de auga no teito mesmo produciron o desprendemento dun panel interior do teito da sala de espera, que caeu ao chan sen producir danos persoais, grazas a que a área en risco estaba previamente sinalizada.

Filtracions Hospital Marítimo de Oza 2 — Ata caeu un doble teito

Estes problemas afectan sobre todo ás consultas de fisioterapia e á área de tratamento, que durante os meses de inverno están cubertas de sabas, empapadores e cubos de auga, coas consecuentes incomodidades para persoal e pacientes. En ocasións, as consultas e tratamentos deben desprazarse a outras localizacións e, de igual xeito, doentes e traballadores deben evitar os cubos colocados no chan para recoller a auga das pingueiras.

“Non é agradable traballar desta maneira e tampouco resulta cómodo para os pacientes, que por exemplo deben esquivar os cubos colocados para recoller a auga que se filtra”, explican os facultativos. “É unicamente grazas ao esforzo do persoal e á nosa boa fe que estas eivas non teñen maiores consecuencias, porque non nos importa ir movéndonos a outras localizacións, pois doutro xeito os pacientes quedarían sen atención”.

“O persoal que sufrimos esta situación estamos cansos, estamos fartos”, sentenzan. “Cada vez que protestamos veñen arranxar o teito, pero son só parches. Esiximos da Xerencia da Área Sanitaria unha solución permanente ao problema que sufrimos”.

Responsabilidades

A situación leva anos sendo advertida ante Veolia, empresa á que está subcontratada o mantemento das instalacións. Porén, o único que os traballadores de Veolia poden facer son actuacións puntuais para limitar os efectos das pingueiras.

Hai dous anos tamén comunicamos a situación ante a Xerencia do Hospital, que de inmediato enviou un servizo de mantemento que se encargou de lixar e pintar e quitar os cubos. Pero este tipo de actuacións son, unicamente, parches que non solucionan o problema.

O colectivo sanitario sae á rúa para esixir “un traballo seguro”

MOV. SOCIAIS

Ubaldo Cerqueiro

-

6 Febreiro, 2025

0

O colectivo sanitario sae á rúa para esixir “un traballo seguro”

Continúa mobilizándose o colectivo sanitario da Coruña en apoio ao enfermeiro e garda agredidos o pasado luns esixindo melloras en materia de seguridade.

Despois da masiva concentración do martes, a Comisión de Centro do CHUAC convocaba unha nova manifestación, con posterior asemblea. E desta volta si que houbo un gran colapso pola cantidade de facultativos presentes. I é que o regueiro de ameazas e agresións que sofre o colectivo, a meirande parte das veces en silencio, dos últimos tempos é continuo.

Con arengas de “Verdes dimisión” (en relación ao xefe de Área sanitaria) e pancartas de “Dignidade para os pacientes”, “Queremos traballar seguras” e “Todos somos Isma”, en relación ao compañeiro agredido, o colectivo demostrou sentirse orfo en materia de seguridade.

A situación chegou a tensarse cando un grupo de sanitari@s intentaron entrar en Dirección, que estaba custodiada por antidisturbios, e segundo o colectivo sanitario, unha enfermeira foi empurrada por un axente.

Que piden

@s sanitari@s aseguran “seguir descoñecendo os protocolos específicos de actuación e seguridade fronte a doentes potencialmente agresivos pese a ser solicitados polas/os delegadas/os de prevención de riscos en reunión extraordinaria do Comité de Seguridade e Saúde no día de onte”.

Critican que onte a Xerencia presentou un “protocolo de actuación en urxencias psiquiátricas” do 2012, do que o persoal non tiña coñecemento, como quedou de manifesto no comité de seguridade e saúde.

Deste xeito, a Comisión esixe aplicación de medidas sen máis demora ante a situación de desprotección na que se atopa o persoal do Complexo para minimizar os riscos ás que están sometidos, tales coma:

Implantación inmediata dos protocolos de actuación e seguridade para todas/os as/os profesionais.
Circuítos de atención definidos,
Incremento das presencias e equipos de seguridade, E
Espazos adecuados de atención ás/ós doentes de perfil agresivo en urxencias,
Incremento da capacidade da unidade de agudos,
Profesionais especialistas suficientes para dar cobertura as necesidades da poboación da Coruña…

PROTESTAS TAMÉN EN PROSEGUR

Pola súa banda, os sindicatos CCOO, UGT, USO e CIG reclamaron a Prosegur, concesionaria da seguridade e vixilancia do Chuac, información e máis coordinación. Segundo trasladan a Europa Press fontes de Comisiones Obreiras, este xoves pola mañá celebrouse unha reunión entre a empresa e as centrais para avaliar a resposta ante este incidente. Polo momento, a medida xa adoptada foi o reforzo da seguridade en urxencias.

Singularimente, CCOO rexistrou dous escritos, ante o Servizo Galego de Saúde (Sergas) e Prosegur, para solicitar un maior intercambio de información sobre riscos e medidas preventivas no Chuac, máis formación do persoal e un plan de coordinación. Durante a reunión, sinalan fontes sindicais, a empresa deuse 15 días para remitir a documentación. “En principio hai boa vontade”, destaca CCOO.

Con todo, esta central sinala que xa levan esixindo “melloras” nas súas condicións “desde fai dez anos”. E é que “non hai apuñalamentos todas as quendas”, pero practicamente “en todas as quendas” se teñen que exercer contencións e apoios na seguridade. Prosegur encárgase do servizo de seguridade do Chuac e de toda a área sanitaria da Coruña-Cee desde o verán pasado, cando lle gañou a nova adxudicación a Eulen, anterior concesionaria. Isto supuxo a subrogación de máis de 70 traballadores.

As fontes sindicais consultadas non están moi conformes co cambio de empresa. “Aínda nos estamos coñecendo”, aseguran, á vez que recoñecen que o diálogo con Eulen era “bastante máis fluído”. Así mesmo, destacan a diferenza de medios cos vixiantes doutros hospitais. Mentres que no da Coruña contan con chalecos anticortes “limitados”, no de Santiago teñen un por traballador e, mesmo, un espray de defensa que no Chuac non lles permiten.

Máis novas

O persoal sanitario concéntrase no CHUAC en apoio aos dous agredidos e esixindo máis seguridade

Un paciente agride cunha arma branca a un enfermeiro e un garda de seguridade no complexo hospitalario da Coruña

Finalizada a instrución polo crime de Cabanas e decreta a apertura de xuízo oral

europapress

-

6 Febreiro, 2025

0

Finalizada a instrución polo crime de Cabanas e decreta a apertura de xuízo oral

O Xulgado de Instrución número 2 de Ferrol finalizou a instrución polo crime de Elisa Abruñedo, a veciña de Cabanas cuxo cadáver foi localizado en setembro de 2013 nas inmediacións do seu domicilio tras varias horas desaparecida.

Segundo informou o Tribunal Superior de Xustiza de Galicia (TSXG), acordouse, en consecuencia, decretar a apertura de xuízo oral contra R. S., un veciño de Narón, que permanece en prisión provisional desde outubro de 2023, tras ser detido pola Garda Civil como presunto autor, tras unha investigación de máis de dez anos.

Agora, o caso remitirase á Audiencia Provincial da Coruña para a súa enjuiciamiento por parte dun Tribunal do Xurado, por se os feitos fosen constitutivos dos delitos de agresión sexual e asasinato.

A xuíza tamén acordou no auto que se manteñan as medidas cautelares acordadas en relación á situación persoal do acusado, que permanece en prisión provisional, nun cárcere de León, e ao aseguramiento das responsabilidades pecuniarias. Ademais, a resolución é firme, polo que contra ela non cabe interpor recurso.

INDICIOS

Na resolución e segundo das dilixencias practicadas, despréndense indicios suficientes para proseguir as actuacións contra o sospeitoso. Así, recóllese que presuntamente o acusado conducía o seu vehículo durante a tarde do 1 de setembro de 2013 e, tras observar camiñando en solitario á vítima, deixou o coche mal estacionado nun camiño veciñal.

A continuación, o acusado, segundo os indicios existentes, abordouna por detrás, golpeouna e inmobilizouna. Despois, levouna cara a unha zona boscosa existente á marxe da estrada ata alcanzar un lugar oculto á vista, onde a agrediu sexualmente.

Acto seguido, valéndose dunha navalla, coitelo ou similar que gardaba no peto do pantalón, supostamente apuñalouna no torso e o pescozo, o que lle provocou a morte.

A xuíza sinala que das dilixencias practicadas resultan “indicios racionais e suficientes de criminalidade” contra o acusado. E destaca as declaracións prestadas en sede policial e xudicial polo procesado, así como por testemuñas, e os informes do Equipo da Policía Xudicial da Garda Civil de Ferrol, e do Laboratorio de Criminalística da Garda Civil da Coruña.

Tamén do Departamento de Bioloxía do Servizo de Criminalística da Garda Civil, da Sección de Análise do Comportamento Delituoso da Unidade Técnica de Policía Xudicial, do Servizo de Xenética forense do Instituto de Ciencias Forenses Luís Concheiro e do Instituto de Medicamento Legal de Galicia (IMELGA).