A octoxenaria desaparecida desde o xoves na Pastoriza, en Arteixo foi localizada con vida e tivo que se trasladada en ambulancia ao hospital. Segundo informou fontes coñecedoras do operativo, a muller foi atopada este domingo na avenida Pastoriza.
O operativo de procura foi renovado desde primeira hora desta xornada e contou coa participación da Garda Civil, Policía Local, Emerxencias e o dron da Axega.
Representantes de CIG-Saúde pediron á Fiscalía provincial da Coruña que se abra unha investigación ante o que consideran “falta de medidas preventivas” para garantir a seguridade e a integridade dos traballadores tras a agresión o pasado 3 de febreiro a un enfermeiro e un vixiante de seguridade no Hospital Universitario da Coruña por parte dun paciente.
Fixérono a través dun escrito e por se os feitos puidesen ser constitutivos de infracción penal, segundo expuxo o secretario de Saúde Laboral de CIG na Coruña, Ernesto López, quen sinalou que a iniciativa responde a un acordo na asemblea de traballadores.
O dirixente sindical demandou, ademais, á Consellería de Sanidade que se actúe con medidas de prevención e non cando pase unha incidencia.
“Nós non queremos que sucedan delitos, queremos que a xente vaia a traballar e que non pasen estas cousas”, asegurou en alusión á reunión mantida polo conselleiro de Sanidade, Antonio Gómez Caamaño, co fiscal superior de Galicia, Fernando Suanzes, e con críticas, ademais, á xestión do departamento autonómico.
“A xerencia — do Chuac– ten que coidar da súa xente”, expuxo tamén ao considerar que debe garantir a súa seguridade e ao non descartar que poida haber por parte desta algún tipo de infracción penal por “omisión”.
“Non hai nin protocolos actualizados, nin transmisión nin coordinación”, sentenciou para incidir en que Fiscalía debe valorar unha posible “querela” contra o xerente da área sanitaria da Coruña, Luís Verde.
Nova mobilización polas rúas da Coruña (é raro día que non haia colectivo denunciando a súa precariedade). Este venres 14 de febreiro, foi o turno da traballadoras das residencias privadas da Coruña e Lugo, que se manifestaron en demanda dun convenio colectivo que dignifique as súas condicións laborais e salariais e na defensa dun modelo de coidados que antepoña o benestar das persoas ao lucro empresarial.
As protestas, convocadas pola CIG-Servizos, dan continuidade ao calendario de accións reivindicativas que o persoal está a desenvolver para desbloquear as negociacións e demandar a intervención da Consellaría da Política Social, como administración responsable do sector.
O persoal saíu en manifestación dende a residencia DomusVi da Cidade Vella até as oficinas da Fundación Amancio Ortega no Obelisco. Para o 28 de febreiro, a CIG xa ten convocada outra mobilización na provincia de Pontevedra.
A CIG denuncia ademais que o modelo de privatización está feito para beneficiar a grandes empresas como DomusVi, tendo en conta a día de hoxe o 70% destes centros son privados.
As delegadas da CIG lembraron que dende a sinatura do último convenio (2020-2023) por parte de CCOO e UGT, “os salarios perderon un 7,8% do poder adquisitivo ao pactarse subas inferiores ao IPC real. Se a isto lle sumamos o incremento do SMI nestes anos, atopámonos con que a maioría dos colectivos están por debaixo do salario mínimo”. Neste senso, o secretario de Negociación Colectiva da CIG-Servizos, Adolfo Naya, subliñou que coa última suba, “máis do 70% do persoal que traballa neste sector, unhas 12.000 persoas en Galiza, cobran por debaixo do SMI”.
Denuncian tamén a sobrecarga de traballo que o persoal ten que asumir a causa dunhas ratios obsoletas que non se axustan ás necesidades dos centros “nin permiten que tratemos as persoas residentes como merecen”. “Cando falamos de maltrato ás persoas residentes referímonos a que temos un tempo medido para todo, en cinco minutos non podemos asear e vestir a unha persoa, é imposíbel. E así para todas as tarefas”, denunciou a responsábel do sector en Ferrol, Beatriz Fernández.
Co agravante de que “a Xunta eliminou en decembro pasado a obrigatoriedade de contar coa presenza física de persoal de enfermería as 24 horas, polo que se está pondo o persoal auxiliar de clínica a dar medicación cando non está formado para esta tarefa”, advertiron as traballadoras.
Por iso, na negociación deste convenio, ademais dunha suba salarial digna, a redución da xornada e melloras sociais, unha das principais reivindicacións da CIG refírese a ampliación das coberturas das situacións de IT.
Outra das problemática que as traballadoras puxeron enriba da mesa son os problemas derivados da decisión da Xunta de Galiza de ingresar persoas con doenzas psiquiátricas en residencias de maiores debido á falta de centros especializados. “Pero nin estamos preparadas para atender este perfil de usuarios/as, nin os tratamentos que se lle teñen que aplicar están validados, nin os centros están adaptados ás súas necesidades. O estres acumúlase e padecemos situacións insostíbeis”, afirmou Bea Fernández.
Na mobilización da Coruña, Adolfo Naya, indicou que co percorrido elixido quíxose pór o foco sobre dúas cuestións: dunha banda sinalar a responsabilidade de DomusVi como principal empresa do sector en Galiza, a que ostenta a representación máis relevante na comisión negociadora e a que se nega de maneira máis contundente a asumir ningunha das reivindicacións sociais.
Criticou que a última proposta da patronal, presentada en outubro pasado, foi de auténtica miseria e dende entón non se produciron máis reunións da mesa de negociación. Por iso, xa avanzou que as mobilizacións continuarán e non se descarta a convocatoria dunha folga de cara á primavera.
Censurou o desinterese da Consellaría de Política Social pois “aínda que lle solicitamos unha reunión en setembro do ano pasado para tratar a situación do sector, a día de hoxe seguimos sen ter resposta”. “Só se acordan das persoas usuarias das residencias para irlles pedir o voto, para non para revisar en que condicións están e garantir unha atención digna”, rexeitou Fernández.
De aí, salientou, que con estas mobilizacións tamén se reclame que todas as residencias, centros de día e demais servizos sexan públicos “para rematar co maltrato nos coidados ás persoas maiores e dependentes” e que se avance nas condicións laborais para equiparalas ás que xa ten o persoal das residencias de xestión directa.
As traballadoras da Rede de Escolas Infantís Municipais sacan a careta a Borrego
O ministro de Transformación Dixital, Óscar López, e o presidente da Deputación da Coruña, Valentín González Formoso, inauguraron este venres o Coruña Estudo Inmersivo, definido como o maior estudo virtual de España. O proxecto, situado na Cidade das TIC, contou cun investimento de nove millóns de euros, cofinanciado pola Deputación e o Goberno central a través do Plan de Recuperación, Transformación e Resiliencia.
O acto contou coa presenza de diversas autoridades, entre elas o delegado do Goberno en Galicia, Pedro Branco, a conselleira de Economía e Industria, María Jesús Lorenzana, e a alcaldesa da Coruña, Inés Rey, ademais de representantes do Clúster Audiovisual Galego e do sector audiovisual galego.
O ministro Óscar López destacou que esta iniciativa representa un “exemplo de investimento produtivo e colaboración público-privada”, subliñando que o Goberno aposta polas novas tecnoloxías e polo desenvolvemento do hub audiovisual en Galicia. Tamén fixo referencia ao crecemento do sector nos últimos anos, resaltando que en España se duplicou o número de rodaxes e os postos de traballo relacionados co audiovisual.
López asegurou que este novo estudo suporá unha oportunidade para xerar emprego e riqueza, proporcionando un espazo equipado coa última tecnoloxía para a produción de contidos audiovisuais avanzados.
Pola súa banda, o presidente da Deputación da Coruña, Valentín González Formoso, sinalou que este proxecto permitirá potenciar o talento galego e reter creadores na comunidade. A alcaldesa da Coruña, Inés Rey, coincidiu nesta idea, resaltando que Galicia ten capacidade para exportar talento ao ámbito audiovisual internacional.
Tamén interviñeron no acto representantes do sector, como o presidente do Clúster Audiovisual Galego, Alfonso Branco, e a secretaria xeral da Universidade da Coruña, Marta García, quen destacaron a importancia dun equipamento desta magnitude, situado nas antigas instalacións da Fábrica de Armas da Coruña, agora reconvertidas en espazo tecnolóxico e de innovación.
Despois de meses esperando que o Concello cumprise as súas preguntas, as traballadoras da rede de Escolas Infantís Municipais retomaban o pasado 4 de febreiro as mobilizacións. Unhas concentracións que comezaban xa a finais de 2023 e que mantiveron un ano na rúa a estas máis de 100 traballadoras.
Falamos das Escoliñas de 0-3 anos, (Cativos, Luís Seoane, Roseiras, Caracola, Agra do Orzán, Arela, Montealto e Carrianta), que malia formar parte da rede municipal, funcionan cunha xestión privatizada, e cuias condicións laborais están moi lonxe de ser dunha rede pública: os seus salarios apenas chegan ao SMI pola escaseza dos convenios, e as súas xornadas de traballo son das máis altas de todos os convenios da ensinanza.
Todo nun ano no que teñen que saír os novos pregos para a licitación das escolas.
Onte desenvolveron unha nova concentración no Obelisco, esixindo unhas condicións laborais e salariais dignas e na defensa dunha mellora na atención ás crianzas. As traballadoras xa se puxeron de Entroido e realizaron “unha parodia do desafortunado encontro que tiveron a pasada semana co concelleiro de Educación, no que Juan Borrego mesmo lles negou que en abril do pasado ano dera o compromiso de trasladar unha resposta xustificada ás reivindicacións do colectivo”, rexeitando en todo momento a posibilidade de sentar a negociar a aplicación de melloras no servizo.
As palabras do edil provocaron unha profunda indignación entre as traballadoras, xa que incluso chegou a asegurar que non recibira ningunha solicitude de xuntanza “cando fixemos tres peticións por escrito e o único que obtivemos foi a calada por resposta”, explica o responsábel da CIG-Ensino da Coruña, Henrique García.
Aseguran que van solicitar unha reunión coa alcaldesa para tentar desbloquear a negociación, despois de ter xa realizado encontros o BNG e o PP, que levarán mocións ao pleno.
As traballadoras piden ademais que as escolas infantís municipais recoñeza a parella educativa (como si existe nas Galiñas Azuis), asegure a atención adecuada ao alumnado con necesidades educativas especiais (NEAE), e reduza os ratios, como si se vai facer na etapa infantil 3-6.
As traballadoras das Escolas Infantís Municipais esíxenlle a Borrego mellores condicións
A Agencia Española de Supervisión de Inteligencia Artificial (Aesia) celebrou este venres o seu consello reitor, coincidindo co inicio da súa actividade presencial na sede da Casa de Veeduría na Coruña, onde permanecerá mentres duren as obras da Terraza, o seu destino oficial.
Segundo informa o Ministerio para a Transformación Dixital e da Función Pública, este consello reitor é, xunto coa Presidencia, o órgano de goberno da Axencia, ao que corresponde a “alta xestión da entidade, así como establecer as súas directrices xerais de actuación”.
O mesmo, apunta, constituído por seis representantes de diversos ministerios, un experto en Intelixencia Artificial e o director xeral da Aesia, reuniuse por primeira vez de maneira presencial na Coruña para facer balance dos primeiros meses de actividade e establecer os seus obxectivos para 2025.
Este encontro, engade, coincide co inicio da actividade presencial dos traballadores da Aesia na céntrica Casa de Veeduría da cidade herculina, tras a súa instalación este mes de febreiro, mentres se realiza a reforma integral da Terraza.
Así mesmo, este venres, o ministro para a Transformación Dixital e da Función Pública, Óscar López, visitou esta sede xunto coa secretaria de Estado de Dixitalización e Intelixencia Artificial, María González Veracruz, que, ademais, é a presidenta da Aesia.
Trala composición da Asemblea Local, con Ignacio Siota ao fronte como reelecto responsábel local, esta semana o BNG realizou a sesión constitutiva, dese novo Consello Local. “Cada día vemos como medra a corrente de simpatía das coruñesas e coruñeses cara ao que representa a nosa forza política”, afirma Siota.
O órgano de dirección da formación nacionalista na cidade analizou a situación política que se vive no Concello, após a alcaldesa ter perdido a cuestión de confianza da cámara municipal no Pleno realizado o pasado martes 11 de febreiro.
“O que se viu con nitidez no debate da cuestión de confianza é que o BNG exerce o rol de forza decisiva que lle conferiron as coruñesas e os coruñeses nas pasadas eleccións e que se está a consolidar como unha clara alternativa de goberno na cidade”, afirma Siota, coruñés de 31 anos e licenciado en Ciencias Políticas e Socioloxía.
Acompañan Siota no Consello Local Keina Espiñeira, Jorge Castro, Guadalupe Martínez, Xabier Pérez Couto, Andrea Ramos, Raimundo Martínez, Mercedes Queixas, Francisco Jorquera, Isabel Risco, Fran Rei, Avia Veira, Isidro Daviña e David Soto.
Ignacio Siota volve encabezar a Asemblea Local do BNG na Coruña
Figura indiscutible do humor e da prensa galega é Pepe Carreiro. As súas tiras cómicas teñen pasado nos últimos 40 anos por xornais como Faro de Vigo, Diario de Galicia, La Voz de Galicia, El Mundo (edición Galiza), Xornal de Galicia e Nós Diario, e en semanarios e revistas como A Nosa Terra, Can sen Dono, Tempos Novos, A Trabe de Ouro e Xo! , para acabar neste século servindo de fachenda galega polas rede sociais.
Este mes de febreiro poderemos gozar de 50 das súas pezas na mostra ‘Humor para mudar o mundo. Que graza!’ que se estrea este mesmo venres 14 de febreiro, ás 19:30h no local da A.C. Alexandre Bóveda, no primeiro andar do edificio do Circo de Artesáns, na rúa Santo André, 36. Non faltará o propio humorista gráfico e creador dos Bolechas.
A mostra, organizada Federación Galiza Cultura, recolle o sentir da pluma do autor vigués: unha primeira, frase en serio e pretensiosa (Humor para mudar o mundo), que logo, na segunda, cunha contestación burleira (Que graza!) rebaixa as ínfulas da primeira parte e lle dá un baño de realidade.
É un mestre da síntese expresiva, tanto desde o punto de vista do debuxo como do texto. Neste sentido, encádrase de cheo na tradición do humor gráfico galego inaugurada por Castelao.
Profesionais sanitarios secundaron unha nova mobilización ante o Hospital Universitario da Coruña para demandar “medidas urxentes” ante as agresións ao colectivo e ao considerar que estas deben implantarse de forma “inmediata”. “Queremos traballar en condicións de seguridade”, insistiu a presidenta da Comisión de Centro, María Formoso.
Foi con motivo dunha nova protesta con varios centenares de persoas e na que corearon proclamas e puidéronse ler pancartas con frases como “máis recursos e menos discursos”, “conselleiro escoita, estamos en loita”, “coa nosa saúde non se xoga” ou “máis seguridade en centros sanitarios”, ás que se sumaron peticións de dimisión.
View this post on Instagram
Lamentou que a única resposta directa por parte do Sergas dende a agresión do día 3 é “un incremento dun profesional de seguridade e un correo electrónico” enviado aos traballadores.
Sobre o apoio psicolóxico e informativo, “non cambiou nada a situación, tivemos unha reunión coa xerencia pero non nos deron nin un borrador do protocolo de seguridade, temos todo moi bonito, papel encima da mesa pero realmente non temos nada”, remarcou.
En canto ao grupo de traballo anunciado pola Consellería de Sanidade, para implementar un novo plan con medidas, aseverou que lles parece “marabilloso” que se empecen a “facer cousas”. “Pero imos tarde, iso tíñase que iniciar o 3 de febreiro, pasaron dez días e só temos un garda de seguridade a maiores”.
“Faremos as denuncias pertinentes”, engadiu sobre a demanda a este respecto da Fiscalía Superior de Galicia para que se formalicen. Con todo, engadiu que queren que “antes de que volvan suceder eses feitos” os responsables políticos “garantan a seguridade tanto de pacientes como de profesionais sanitarios”.
“O Xerente da Área Sanitaria non sabe falar c@s traballador@s”
O colectivo sanitario sae á rúa para esixir “un traballo seguro”
Xornal da Coruña é o primeiro gran xornal dixital exclusivamente en galego da Coruña e a súa área metropolitana
Contacta:
SÍGUENOS
© Xornal da Coruña - Xurimaru Servizos de Comunicación 2010 S.L.
