O prezo da vivenda en aluguer en Galicia subiu un 11,9% en xullo respecto ao mesmo mes do ano 2023, aínda que rexistrou un lixeiro descenso, dun 0,3%, na súa variación mensual. Estes son algúns dos datos que se desprenden do Índice Inmobiliario Fotocasa. O informe tamén apunta que, con estes datos, o prezo sitúase no 9,58 euro/m2 ao mes en xullo. A Coruña é unha das cidades con máis problemas para alugar.
“O prezo do aluguer segue en niveis máximos de forma xeneralizada. De feito, 15 das 17 comunidades autónomas alcanzan marca no prezo do arrendamento. Ademais, por primeira vez na historia, o prezo do aluguer xa excede a barreira tácita dos 1.000 euros mensuais de media”, explica a directora de Estudos e portavoz de Fotocasa, María Matogueiras.
Sinala que, tras dous anos consecutivos de incrementos “moi significativos” e despois de presentar a aceleración “máis brusca da historia”, “o prezo do aluguer está máis alto que nunca”. Argumenta que a razón principal é a contracción da oferta dispoñible, unida á “intensa” demanda que aumenta debido a que nestes momentos o aluguer é “a principal vía de solución habitacional para acceder á vivenda en España”.
Así, Galicia pasou dunha variación interanual do 8,4% de xullo de 2023 ao 11,9% detectado no mesmo período de 2024. Nos últimos 12 meses analizados o prezo da vivenda pasou dos 8,56 euros/m2 ao mes de xullo de 2023 aos 9,58 euros/m2 ao mes de xullo de 2024. A nivel estatal, as comunidades autónomas con maiores incrementos interanuais (por encima do 10%) son: Asturias (17,9%), Madrid (15,6%), Castela-A Mancha (14,8%), Galicia (11,9%), Rexión de Murcia (10,3%) e País Vasco (10,0%).
PROVINCIAS E MUNICIPIOS
O estudo tamén achega datos por provincias e sinala que o prezo interanual da vivenda en aluguer en xullo de 2024 incrementouse nas catro provincias galegas. Na Coruña, un 12,4%; en Pontevedra, un 7,2%; en Ourense, un 5,7%; e en Lugo, un 5,0%. En canto aos prezos, unha provincia supera os 10,00 euros o metro cadrado ao mes, Pontevedra, con 10,67 euro/m2 ao mes. Séguenlle A Coruña con 9,70 euro/m2 ao mes, Lugo con 7,40 euro/m2 e Ourense con 6,87 euro/m2.
No que respecta aos municipios, Vilagarcía de Arousa é o que máis incrementos acumula en xullo cun 30,8%. Séguenlle as cidades con incrementos superiores ao 10% nun ano como A Coruña capital (15,2%), Vigo (11,8%), Ferrol (11,5%), Pontevedra capital (10,3%), Ourense capital (9,8%), Lugo capital (7,1%) e Santiago de Compostela (6,5%).
En canto ao prezo por metro cadrado en xullo, seis dos 11 municipios exceden o 10,00 euro/m2 ao mes e son: Sanxenxo con 18,06 euro/m2 ao mes, A Coruña capital con 11,52 euro/m2 ao mes, Oleiros con 11,33 euro/m2 ao mes, Ribeira con 11,08 euro/m2 ao mes, Vigo con 10,59 euro/m2 ao mes e Santiago de Compostela con 10,01 euro/m2 ao mes. Doutra banda, as dúas cidades máis económicas para alugar unha vivenda son: Lugo con 7,11 euro/m2 ao mes e Ourense con 7,15 euro/m2 ao mes.
A CORUÑA, A TERCEIRA CIDADE MENOS RENDIBLE PARA ALUGAR
Por outra banda, segundo os datos publicados por Pisos.com en base aos informes dos prezos de compra e de aluguer rexistrados en xullo de 2024, A Coruña é a terceira cidade de España menos rendible para alugar inmobles.
Explican que a rendibilidade bruta do aluguer en España en xullo de 2024 foi do 6,04%. Este é o rédito anual que un propietario dunha vivenda conseguiu ao pola en aluguer tras a súa adquisición.
