O maxistrado do Xulgado do Penal número 3 da Coruña condenou a pagar unha multa de 10.530 euros a cada un dos catro membros do comité de empresa da antiga planta de Alu Ibérica na Coruña por agresión a responsables de recursos humanos e danos no mobiliario de oficina, segundo informa o Tribunal Superior de Xustiza de Galicia (TSXG).
O xuíz, que lles impuxo o pago conxunto dunha indemnización de 590 euros, considerounos autores dun delito de coaccións, doutro de danos, de dous delitos leves de lesións e dun leve de malos tratos de obra. Na sentenza, considera probado que o 17 de decembro de 2020, sobre as 18.30 horas, “en unión dun numeroso grupo de polo menos dez persoas”, dirixíronse ás instalacións da empresa tras coñecer o despedimento dunha traballadora.
E “postos de común e previo acordo, actuando de maneira coordinada e concertada coas outras persoas que non se puideron identificar”, foron a unha das oficinas na que se atopaban tres persoas, quen tiñan diferentes cargos no departamento de recursos humanos. “Irromperon violentamente, provocando unha grave alteración do seu funcionamento ordinario”, indica o titular do Xulgado do Penal número 3 da Coruña no fallo, no que asegura que, tras discutir cos directivos, “acometéronos fisicamente”.
FEITOS PROBADOS
En concreto, a dous deles, segundo entende probado o xuíz, “empuxáronos con forza, tirándoos ao chan e contra os andeis da oficina”. Ademais, a un deles dous tamén o arrastraron para sacalo da oficina e déronlle patadas; e, ao outro, “déronlle varias patadas nas pernas cando estaba no chan”. Á terceira persoa, segundo o xuíz, os acusados tamén a empuxaron e zarandearon, aínda que non presentou denuncia polos feitos.
Para sanar das lesións, necesitaron unha primeira asistencia facultativa. Os procesados, “con ánimo de causar un quebranto patrimonial alleo”, causaron danos a parte do mobiliario e a obxectos persoais dos prexudicados, recolle a sentenza. A persoa que desempeñaba funcións de coordinación e ligazón da dirección xeral co departamento de recursos humanos, ao ouvir o que estaba a suceder, segundo explica o maxistrado no apartado de feitos probados da resolución, dirixiuse á oficina na que se atopaban os outros prexudicados.
Con todo, cando estaba no corredor, os acusados “empuxárono con forza, tras o cal déronlle varios golpes e patadas”. O xuíz afirma que, como consecuencia “da tensión e presión ocasionada polos feitos”, sufriu pouco tempo despois, e cando aínda se atopaba nas instalacións da empresa, un infarto de miocardio, polo que foi asistido por unha ambulancia e trasladado ao hospital. O titular do Xulgado do Penal número 3 da Coruña destaca que o infarto non é imputable aos acusados, pois explica que non é posible vincular ese resultado coa súa actuación. Ademais, afirma que a previa doenza do afectado era descoñecida para eles e que “non cabe, nin sequera imaxinar, que tivesen intención algunha de provocarlle esa máis grave lesión”.
VERSIÓNS
Na sentenza, afirma que, aínda que hai “dúas versións absolutamente discrepantes dos feitos”, existen “corroboracións periféricas de natureza obxectiva que reforzan a conclusión de que o acontecido nas instalacións de Alu Ibérica o día de autos foi algo máis que unha reunión de traballo airada entre os representantes dos traballadores e os responsables de recursos humanos da empresa”.
Así, subliña que existen “uns lesionados e uns danos materiais que só poden ser atribuídos á acción coordinada dos acusados”, á vez que conclúe que “os indicios de criminalidade son evidentes e engarzan entre si dunha maneira lóxica e coherente”. En canto ao delito de desordes públicas que lles imputaban, o xuíz afirma que “non hai proba algunha de que se causou unha perturbación relevante da paz pública, máxime cando a presenza dos acusados na oficina durou escasos minutos”. Con todo, explica que a acción “ten unha natureza claramente violenta”. Contra o fallo cabe recurso.
